DÇ-2022: Daha 2 ölkə final mərhələsinə vəsiqə qazanacaq
15-11-2021, 09:42
Bu gün 2022-ci il dünya çempionatının Avropa zonası üzrə seçmə mərhələsində X turun daha 8 görüşü keçiriləcək.
C, F və I qruplarında oynanılacaq qarşılaşmaların hamısı Bakı vaxtı ilə saat 23:45-də start götürəcək.
C qrupunda İtaliya millisi səfərdə Şimali İrlandiya ilə, İsveçrə isə evdə Bolqarıstanla qarşılaşacaq. Hazırda "Skuadra Adzurra" yalnız top fərqinə görə isveçrəliləri üstələyir. Bu mənada, komandalar final mərhələsinə birbaşa vəsiqə üçün xal ititrməməklə yanaşı, böyük hesablı qələbə qazanmağa çalışacaqlar.
F qrupunda bütün suallara aydınlıq gəldiyindən, Şotlandiya - Danimarka qarşılaşması formal xarakter daşıyacaq. 27 xala malik Danimarka seçməsi final mərhələsinə, 20 xalı olan Şotlandiya isə pley-offa vəsiqəni əvvəlcədən rəsmiləşdirib. İsrail - Farer adaları və Avstriya - Moldova qarşılaşmalarının nəticələri isə 3-cü pillənin taleyinə aydınlıq gətirəcək.
I qrupuna başçılıq edən İngiltərə millisi final mərhələsinin bir addımlığındadır. San Marinonun qonağı olacaq britaniyalıları heç-heçə də qane edəcək. İkinci sırada yer alan Polşa yığması isə mundiala birbaşa yollanmaq üçün evdə Macarıstana böyük hesabla qalib gəlib İngiltərənin "cırtdanlar"a uduzmasını gözləməlidir. Albaniya - Andorra görüşü ilə yanaşı, bu matçın nəticəsi həm də 3-cü yerin taleyinə aydınlıq gətirəcək.
DÇ-2022, seçmə mərhələ
X tur
15 noyabr
C qrupu
23:45. Şimali İrlandiya - İtaliya
23:45. İsveçrə - Bolqarıstan
Xal durumu: İtaliya 15 (7 oyuna), İsveçrə - 15 (7), Şimali İrlandiya - 8 (7), Bolqarıstan - 8 (7), Litva - 3 (8)
F qrupu
23:45. İsrail - Farer adaları
23:45. Şotlandiya - Danimarka
23:45. Avstriya - Moldova
Xal durumu: Danimarka - 27, Şotlandiya - 20, İsrail - 13, Avstriya - 13, Farer adaları - 4, Moldova - 1
I qrupu
23:45. San Marino - İngiltərə
23:45. Albaniya - Andorra
23:45. Polşa - Macarıstan
Xal durumu: İngiltərə - 23, Polşa - 20, Albaniya - 15, Macarıstan - 14, Andorra - 6, San Marino - 0.
Qeyd edək ki, daha əvvəl Avropa zonasından Almaniya, Danimarka, Belçika, Fransa, Xorvatiya, Serbiya və İspaniya yığmaları DÇ-2022-yə vəsiqə qazanıb. Pley-off mərhələsində isə hələlik Portuqaliya, İsveç, Şotlandiya, Rusiya və Şimali Makedoniya millilərinin çıxış edəcəkləri dəqiqləşib.(report)
RUBRIKA.AZ
Geri qayıt