"Mənə hədə-qorxu gəldi, 300 min manat ziyana düşdüm" - Maqsud Mahmudovun şəriki
18-04-2022, 17:50
Ukraynada tutularaq Azərbaycana gətirilən Maqsud Mahmudovun cinayət işi üzrə məhkəmə iclasında şahid qismində təqsirləndirilən şəxsin şəriki olmuş Mədinə İsrafilova dindirilib.
Bakı Ağır Cinayətlər Məhkəməsinin hakimi Faiq Qəniyevin sədrliyi ilə keçirilən prosesdə o bildirib ki, 2011-ci ildə Yasamal rayonu ərazisində yerləşən lombarda işləyib:
"Lombarda adi işçi kimi çalışırdım. 2015-ci ildə Qaradağda yerləşən lombarda rəhbər təyin olundum, 500 manat əməkhaqqı alırdım. 2019-cu ildə banklarda qızıllar mənim adımda idi. Maqsud mənə dedi ki, yetim qızsan, gəl, qızılları sataq ölkədən qaçaq. Razılaşmadım. Mənə hədə-qorxu gəldi. Maqsud Ukraynaya qaçanda zərəçəkmişlər mənim üstümə düşdü, 300 min manat ziyana düşdüm. Maqsud mənə dedi ki, necə ödəyirsən ödə mənə maraqlı deyil. Mən hələ də bu insanın borcunu verməklə məşğulam”.
Proses davam edir.
15.34
Ukraynada tutularaq Azərbaycana gətirilən Maqsud Mahmudovun cinayət işi üzrə məhkəmə iclasında şahidlər dindirilib.
Bakı Ağır Cinayətlər Məhkəməsinin hakimi Faiq Qəniyevin sədrliyi ilə keçirilən prosesdə təqsirləndirilən şəxsin keçmiş həyat yoldaşı Səhər Abbasova ifadə verib.
O bildirib ki, Maqsudun borcları olduğuna görə Parlament prospektində yaşadıqları evi satıblar:
"Sumqayıtda yerləşən Las Veqas restoranını da satdıq. Maqsudun borcları çox idi.
Onun bahalı qabları var idi, trenajor avadanlıqları var idi, onları borc yiyələrinə verdi.
Nəsimi rayonu Alı Mustafayev küçəsində obyektinin olmasından xəbərim yox idi. İki qarajı olub. Badamdarda 12 sot torpaq mənim adımda idi".
Şahid qismində ifadə verən Sevinc Hacıyeva Nazim Hikmət küçəsində yerləşən lombardda nəzarətçi kimi fəaliyyət göstərdiyini deyib:
"Həmin lombard Maqsud Mahmudova məxsus idi. Əvvəl işlər yaxşı gedirdi. Qızıllar yığılıb qoyulurdu banklara və oradan pullar götürülürdü. Son illər müştərilər arasında narazılıq yarandı. Mən qızılları da qəbul edirdim, ödənişləri də. Faizlər artırdı. Məhz bu səbəbdən bankda girov qoyulan qızılları götürə bilmirdik. Biz vətəndaşdan qızılı 8 faizlə götürürdük".
Təqsirləndirilən şəxs S.Hacıyeva ilə üzləşmə zamanı bəzi suallar verib. Şahid deyib zərərçəkmiş İlham Kərimova ayrı-ayrı vaxtlarda 150-200 manat civarında pul verib.
Məhkəmə iclası davam edir.
Qeyd edək ki, Cinayət Məcəlləsinin 178.3.2 (dələduzluq külli miqdarda ziyan vurmaqla törədildikdə) maddəsi ilə Daxili İşlər Nazirliyi tərəfindən beynəlxalq axtarışa verilmiş Mahmudov Maqsud Soltan oğlu 2021-ci ilin iyul ayında Ukrayna ərazisində tutulub.
O, sentyabrın 18-də Ukraynadan Azərbaycana gətirilərək istintaqa təhvil verilib.
İstintaq dövründə onun barəsində xüsusi dəyəri olan əşyaları talama maddəsi ilə ittiham irəli sürülüb.
İş üzrə 90 nəfər zərərçəkmiş var. Zərərçəkmişlərdən ikisi müğənni Afət Fərmanqızı və Vasif Məhərrəmlidir. //report//
RUBRİKA.AZ
Geri qayıt