“Mən hər bir dövlət məmurunu ya icra başçısı, ya başqa vəzifəyə təyin edəndə göstəriş verirəm ki, get insanlara qulluq et, xidmət göstər, dövlətə xidmət et, təmiz işlə. Amma əfsuslar olsun ki, bəziləri nəticə çıxarmırlar. Onların da cəzası verilir və veriləcək”.

Bu fikirləri çıxışında prezident İlham Əliyev açıqlayıb. Prezident məmurları nümunə olmağa çağırıb:

“Məmur xalqın xidmətçisidir, vətəndaşa xidmət, kömək göstərməlidir, yekəxanalıq etməməlidir. Hansısa qanunsuz tələb irəli sürməməlidir. Özünü təvazökar aparmalıdır. Özü və ailə üzvləri nümunə olmalıdır. Rüşvətxorluqla, soyğunçuluqla məşğul olmamalıdır”.

İ.Əliyev yeni daxili siyasi kursda növbəti dəfə icra başçılarına barmaq silkələyib, onlara xəbərdarlıq edib.

Bu o deməkdir ki, prezidentin hansı icra başçısının nə etdiyindən agahdır. Ölkə başçısı bilir ki, yerlərdə qanunsuzluq edən, özbaşınalıqla məşğul olan, xalqı incidən kiçik padşahlar var. Və zamanında Qubada və İsmayıllıda baş verən hadisələr mərkəzi hökumətə göstərib ki, kiçik padşahların zülmünün sonu necə qurtarır.

Bunu nəzərə alan ölkə rəhbərliyi iqtidarın siyasi kursuna zidd gedənlərə bir neçı dəfə xəbərdarlıq edir. Bu əmrlərdən nəticə çıxarmayanlar isə cəzalandırılır. Necə ki, İ.Əliyev özü bu sözü açıq şəkildə bəyan edib.

Son illərdə məmur özbaşınalığı tüğyan edən regionlar arasında Zərdab, Laçın, Lənkəran, Xaçmaz, Göyçay, Gəncə, Şəmkir rayonları aparıcılıq edir.

Habelə, Masallı, Astara, Ağsu, Ağstafa, Ağcabədi, Binəqədi, Yasamal, Nəsimi, Səbayel rayonlarından çoxsaylı şikayətlər gəlməkdədir. Bu statistika adıçəkilən rayonların icra başçılarının fəaliyyətini ortaya qoyur.

Bu araşdırmalar və analizlərin çıxardığı nəticənin ümumi leytmotivi ondan ibarətdir ki, oliqarxlamış odioz nazirlər və yüksək çinli məmurlar iqtisadi böhranın dünyada dərinləşdiyi bir zamanda əhali arasında təşviş, gərginlik yaradır.

İqtisadiyyatın ağır durumda olması, əhalinin kreditləri ödəyə bilməməsi, kommunal xərclərin qalxması, rayonlarda insanların bir tikə çörək uğrunda sözün həqiqi mənasında savaş aparmasını nəzərə alsaq məmurların prezidentlə xalqı üz-üzə qoyduğunu görmək olar.

RUBRİKA.AZ

Facebook-da paylaş