Ləğv edilmiş Milli Təhlükəsizlik Nazirliyinin (MTN) rəhbəri Eldar Mahmudovun həyatı təhlükədədir

Ulus.Az xəbər verir ki, MTN şefi belə olmasaydı şəxsi mühafizəsini gücləndirməzdi. Keçmiş nazir şəhərə köçər-köçməz təhlükəsizlik tədbirlərini artırıb.

Belə ki,əldə etdiyimiz məlumata görə, sabiq nazir Nardarandakı imarətindən köçərək, Badamdardakı malikanəsinə yerləşib.

MTN şefinin köç etdikdən mühafizəçilərinin sayını artırdığı qeyd olunur. Keçmiş nazir hətta vəzifədən getdikdən sonra işdən çıxardığı cangüdənlərini də işə qaytarıb.(bakipost)

Mühafizəçilərə imarətdən çox da uzağa getməmələri tapşırılıb. Onlar E.Mahmudovun villasında qalır, ərazidən ayrılmamaq məqsədilə idmanla məşğul olmaq üçün belə evin yaxınlığındakı “The Crescent Beach” və “Badamdar” oteldəki idman zallarına gedirlər.

MTN şefinin Nardarandan Badamdara köçməsinin səbəbləri açıqlanmasa da, onun qeyri-rəsmi ev dustağı olduğu bildirilir.

Ölkədən çıxışı yasaqlanan sabiq nazirin Azərbaycan ərazisində də sərbəst hərəkəti məhdudlaşdırılıb.

Lakin bir müddət əvvəl E.Mahmudovun Bakı küçələrindən birində öz maşınında göründüyü ilə bağlı məlumat yayılmışdı. Ehtimal olunur ki, sabiq nazir Nardaranda özünü daha təhlükəsiz və rahat hiss edib.

Mahmudov hesablayıb ki, Badamdar kimi mərkəzi bir ərazidə mühafizəni gücləndirməyə ehtiyac var. O, daim diqqət mərkəzində və nəzarətdədir.

Xüsusi xidmət orqanları onun hər bir hərəkətindən və telefon danışıqlarından məlumatlıdır. O baxımdan Badamdara yerləşən E.Mahmudov mühafizə xidmətinə təkan verib.

Qeyd edək ki, E.Mahmudov 2004-cü ildə Milli Təhlükəsizlik Nazirliyinə rəhbər təyin olunub. 2015-ci il oktyabrın 17-də isə vəzifəsindən kənarlaşdırılıb.

Daha sonra isə MTN ləğv edilib, nazirliyin vəzifəli şəxsləri işdən çıxarılıb, bir çoxu isə müxtəlif cinayətlərdə ittiham olunaraq həbs olunub. MTN-in yerində Dövlət Təhlükəsizlik Xidməti və Xarici Kəşfiyyat Xidməti yaradılıb.

Rubrika.Az

Facebook-da paylaş