Redaksiyamıza Sumqayıt Dövlət Universitetinin Tarix və coğrafiya fakultəsinin IV kurs, 869 N-li qrup tələbəsi Şirinov Şahmar Rəsul oğlundan SDU rektoru Elxan Hüseynovla bağlı şikayət məktubu daxil olmuşdur. Müraciəti olduğu kimi dərc edirik:

Azərbaycan Respublikasının I Vitse Prezidenti xanım M.Əliyevaya,
Azərbaycan Respublikası Prezident Administrasiyası Hümanitar şöbəsinin müdiri xanım F.Abdullazadəyə,
AR-nın Baş Prokuroru cənab Z.Qaralova,
AR –nın Təhsil naziri cənab M.Cabbarova,
Ombudsman Aparatının sədri xanım E.Süleymanovaya,
“Şəffaflıq Azərbaycan” Korrupsiyaya qarşı mübarizə İB-nin İcraçı direktoru xanım R.Səfərəliyevaya,
Sumqayıt Dövlət Universitetinin rektoru Elxan Hüseynova

SDU rektorunun mənim tələbələr sırasından xaric edilməyim barədə verdiyi əsassız əmrindən

Ş İ K A Y Ə T

Mən, 2013-cü ildə Azərbaycan Müəllimlər İnstitunun Sumqayıt Filialının Tarix və Coğrafiya fakultəsinə daxil olmuşam. Burada iki il əyani təhsil aldıqdan sonra filialın bağlanması baş verdi. Biz tələbələri Təhsil nazirinin əmrinə əsasən Sumqayıt Dövlət Universitetinin Tarix və coğrafiya fakultəsinə təhsilimizi davam etdirmək üçün köçürdülər. 2015/2016-cı tədris ili üçün tələb olunan illik 1300AZN təhsil haqqını hissə-hissə, 2016-cı ilin sentyabrın 7-də 800AZN, 25 noyabr 2016-cı ildə isə 300AZN pul ödəmişdim. 2016/2017-ci tədris ili üçün də 12.01.2017-ci il tarixində əvvəl 700AZN, 04.04.2017-ci il tarixində isə 800AZN təhsil haqqı ödəməklə III və IV kurslara görə cəmi 2600AZN olmaqla, təhsilhaqqımı tam ödəmişdim.(İllik təhsil haqqı 1300AZN-dir)

Lakin bu ödənişlərə baxmayaraq fakultə dekanı rektorun adına guya təhsil haqqını ödəmədiyim barədə xəbərim olmadan təqdimat yazmışdır. Bu təqdimatın əsasında da SDU rektoru Elxan Hüseynovun 12.04.2017-ci il tarixli, T-29/4 nömrəli əmrinə əsasən təhsil haqqını ödəmədiyimə görə tələbələr sırasından xaric edilməyim barədə əmr verilmişdir. Rektorun belə bir əmri barədə mənə aprelin sonunda məlumat verilmiş və mayın 2-dən dərsə gəlməməyim bildirilmişdir.

Xatırladım ki, hələ AMİ-nin Sumqayıt Filialında təhsil alarkən ailə vəziyyətimizin ağır iqtisadi durumunu nəzərə alan H.Əliyev Fondunun tövsiyəsilə həm mənim 1-ci və 2-ci kurslarda təhsil haqqımın, həm də atasız yaşadığımız ailəmizə məxsus Sabunçu rayonu, Anaşkin küçəsi, döngə 1 ünvanında yerləşən damı uçuq daxmamıza yerli icra hakimiyyəti tərəfindən 40 ədəd şifer yardımı edilmişdir.

Çox hörmətli Mehriban xanım! Əvvəlcə Sizə 2 il öncə kasb ailəmizə göstərdiyiniz qayğıya görə şəxsən təşəkkürümü bildirir və çox xahiş edirəm ki, min bir əziyyət və zülmlə əldə edərək SDU-ya son 2 il üçün ödədiyimiz 2600 manat təhsil haqqının Universitetdə necə yoxa çıxmasının araşdırılmasına və mənim təhsilimi davam etdirmək üçün Təhsil Nazirliyinə və SDU rəhbərliyinə göstəriş verməyinizi xahiş edir və əvvəlcədən minnətdarlığımı bildirirəm.

Rubrika.az

Facebook-da paylaş