Ağayeva Bəsti Əfqan qızı, oğlu Ağayev Sahib Qüdrət oğluna qarşı ədalətsiz məhkəmə qərarından şikayətçidir.

Müraciət edən Bəsti Ağayeva oğlunun əsassız ittihamlarla həbs edildiyini bildirib. Onun sözlərinə görə, Azərbaycan Dövlət İqtisad Universitetinin məzunu olan oğlu əvvəllər «Unibank»da işləyib. 2014-cü ildə Sahib Ağayevin işlədiyi banka borcu yaranıb.
S.Ağayev bankın İdarə Heyətinin sədrindən yaranmış borcun aylara bölünməsini xahiş edib və bildirib ki, borcunu aybaay ödəyəcək. Necə olsa, bankın işçisidir və əmək haqqı alır. Lakin İH sədri bununla razılaşmayıb. Bank rəhbərliyi S.Ağayevlə bağlı iddia ərizəisi ilə məhkəməyə müraciət edib. Ağır Cinayətlərə Dair İşlər üzrə Məhkəmədə işə baxılıb və S.Ağayev barəsində dələduzluq maddəsi ilə 8 il müddətinə azadlıqdan məhrumetmə cəzası verilib. Apelyasiya Məhkəməsi də qərarı qüvvədə saxlayıb. Ali Məhkəmədə isə fərqli qərar çıxarılıb.(teref)Hakim İlham Cəfərov qərarın düzgün olmadığını və bu işin mülki məsələ olduğunu təsdiqləyərək cinayət işinin ləğvi barədə qərar verib və Apelyasiya Məhkəməsinə işi yenidən araşdırmaq tapşırılıb”. B.Ağayeva deyir ki, 2015-ci ilin yanvarında oğlu Apelyasiya Məhkəməsinin qərarı ilə bəraət alıb və azad edilib. Şikayətçi bildirib ki, məhkəmənin qərarı ilə «Unibank» S.Ağayevə təzminat ödəməliydi. Lakin «Unibank» yenidən protestlə çıxış edib. Ali Məhkəmə işi bir daha ibtidai istintaqa göndərib. Apelyasiya Məhkəməsi S.Ağayev barəsində 3 il 6 ay həbs cəzası kəsib: “Cəzanın bir hissəsi artıq çəkilmiş olduğundan oğlum azad edilməliydi. Həmin müddətdə oğlum «Port-Baku»da xəzinədar vəzifəsində çalışırdı. 2016-cı ilin martında isə oğlum barəsində bu dəfə «oğurluq» maddəsi ilə cinayət işi açıldı. Ali Məhkəmənin hakimi İlqar Qasımov aprelin 20-si kassasiya şikayətinə baxıb və 1 ay sonra qərar veriləcəyini bildirdi. Mayın 18-də məhkəmə prosesi keçirildi və, hakim oğurluq maddəsinin qaldırılaraq «mənimsəmə» ilə əvəz ediləcəyini dedi. Lakin sonra hakimin köməkçisi qərarın qüvvədə saxlandığını söylədi”.
B.Ağayeva hakimin qərarının niyə dəyişdirildiyini anlamadığını söylədi: «Oğlum hazırda 6 saylı cəzaçəkmə müəssisəsindədir. Amma günahının nə olduğunu hələ də nə özü bilir, nə də mən. Məhkəmələr oğlum barəsində ədalətsiz hökm çıxarır. Bəlkə də burada başqa amil var. Bəlkə də bank rəhbərliyi onlara hansısa yollarla təsir edir. Bilmirəm, heç nə deyə bilmirəm. Bircə onu bilirəm ki, oğlum günahsızdır. Mən məhkəmələrdən sadəcə, ədalətli qərar gözləyirəm”. B.Ağayeva məhkəmələrin ədalətsizliyindən Azərbaycan Respublikasının Prezidenti cənab İlham Əliyevə və birinci vitse-prezident Mehriban xanım Əliyevaya şikayət edəcəyini dedi: “Mən cənab Prezidentin ədalətinə inanıram. Mehriban xanıma da bir ana kimi müraciət edirəm ki, oğlumun işinə ədalətli baxılması barədə göstəriş versinlər”.

Rubrika.Az

Facebook-da paylaş