Kriminal aləm üzvləri hakim qarşısına çıxarılıb. Onlar Bakıda silahlı atışmada iştirakda ittiham edilirlər.

Musavat.com xəbər verir ki, Bakıda silahlı atışmada təqsirləndirilən Xəyyam Səlimxanov, Murad Həsrətov, Tunar Nağızadə, Emin Əliyev və İlham Ramazanovun cinayət işi üzrə məhkəmə başlayıb.

Bakı Ağır Cinayətlər Məhkəməsində hakim Samir Əliyevin sədrliyi keçirilən prosesdə təqsirləndirilən şəxslərin anket məlumatları dəqiqləşdirilib. Məlum olub ki, təqsirləndirilən şəxslərdən Xəyyam Səlimxanov və Tunar Nağızadənin şəxsiyyət vəsiqəsi işdə yoxdur. Hakim bildirib ki, bu həmin şəxslərin anket məlumatlarını dəqiqləşdirməyə imkan vermir və buna görə də məhkəmənin hazırlıq iclası keçirilməyib.

Proses fevralın 15-də davam edəcək.

Hadisə ötən il yanvarın 7-də Nərimanov rayonu Fətəli Xan Xoyski küçəsi 134 ünvanında yerləşən "Nənəmin Təndiri" restoranın yaxınlığında baş verib. Belə ki, əraziyə toplaşan iki kriminal qruplaşmanın 15-20-yə yaxın üzvünün mübahisəsi zamanı odlu silahlardan istifadə olunub.

İlkin məlumata görə, hadisə zamanı xəsarət alan olmayıb. Hüquq-mühafizə orqanlarının əməkdaşları hadisə yerində araşdırma aparan zaman "Makarov" tipli tapançaya aid gilizlər aşkar ediblər.

Qeyd edək ki, təqsirləndirilən şəxslərdən Xəyyam Səlimxanov, Murad Həsrətov, Tunar Nağızadə və Emin Əliyev həmçinin Cinayət Məcəlləsinin 234-cü (narkotik vasitədən istifadə) maddəsi ilə ittiham edilirlər.(Musavat.com)

Rubrika.az

Facebook-da paylaş