Bakı şəhər sakini Rasim Abbasov Daşınmaz Əmlakın Dövlət Reyestri xidmətinin Binəqədi rayon şöbəsindən şikayətçidir. O, bildirir ki, problemi ilə bağlı müvafiq qurumlara müraciət edib, kömək ala bilməyincə məsələni ictimailəşdirmək qərarına gəlib.

Şikayətçi başına gələnləri musavat.com-a geniş formada aşağıdakı kimi anladıb: “Uzun müddət 1 saylı Evtikmə Kombinatında işləmişəm. Hələ sovet dövründə oradan mənə 7-ci mikrorayonda yerləşən 17 nömrəli yataqxanadan order əsasında 1 otaq verdilər. Daha sonra isə əlavə 2 otaq da aldım. Hazırda isə bu mülki özəlləşdirmək üçün Daşınmaz Əmlakın Dövlət Reyestri xidmətinin Binəqədi şöbəsinə müraciət etdim. Bir müddət sonra mənə cavab gəldi ki, sənədləriniz orijinal deyil. Dedilər ki, guya onlara sənədlərin sürətini göndərmişəm. İkincisi də əsas gətirdilər ki, guya mən sosial kirayə müqaviləsi bağlamalıyammış. Niyə kirayə müqaviləsi bağlamalıydım ki, bu evi mənə order əsasında veriblər. Bütün sənədlər də əlimdədir. Hazırda yaşadığım binada hər kəs evini özəlləşdirib. Bəs onlar bunu necə ediblər? Bu sualın da cavabını sonradan öyrəndim. Məni get-gələ saldıqdan sonra məhkəməyə müraciət etdim və birinci instansiya məhkəməsini uddum. Sonra bunlar apellyasiya şikayəti verdilər. Nəhayət bir müddət sonra öyrəndim ki, bu qurum özəlləşdirmə üçün hər otağa 1000 manat pul istəyir. Mənim də evim 3 otaqlı olduğu üçün ümumilikdə 3 min manat pul istəyirlər. Məhkəməyə verəcəyimi bildirəndə isə dedilər ki, hara istəyirsən get ver. Belə çıxdı ki, pul verməsəm məsələni uzada-uzada gedəcəklər. Bizim üçün fərqi yoxdur. Evi özəlləşdirməkdə məqsədim o idi ki, satım, müalicə olunum. Elə evi satmaq istədiyim adam dedi ki, mənim tanışlarım var, özəlləşdirə bilərəm.

Sonra o mənə gəldi dedi ki, 3 min manat pul istəyirlər. Hüquqşünaslardan öyrənmişəm ki, bütün sənədlərim yerindədir və heç bir əsas yoxdur ki, bu mənzili özəlləşdirməsinlər. Məsələ puldur. Bunlar konkret olaraq rüşvət istəyirlər ki, mən də bunu verəcək gücdə deyiləm. Özüm Qarabağ veteranıyam və iki dəfə yaralanmışam. İki dəfə də könüllü olaraq döyüşdə iştirak etmişəm. Birinci dəfə 1992-ci ilin mart ayında Xocalı soyqırımından sonra könüllü olaraq müraciət edib, müharibəyə qatıldım. 1992-ci ilin sonlarında tank mərmisinin partlaması nəticəsində sağ qulağımın pərdəsi deşildi, ayaqlarımda da problem yarandığı üçün müalicə olunmaq məqsədilə ordudan ayrıldım. Müalicə olunduqdan sonra 1994-cü ildə yenidən orduya yazıldım. Həmin ilin may ayında isə yenidən yaralandım. Qolum yaralı olduğu halda bir müddət müalicə alıb, cəbhəyə qayıtdım. Atəşkəs müqaviləsi imzalanana qədər cəbhədə olmuşam. 1995-ci ildən ev növbəsində növbəmi götürüb, həmin yuxarıda qeyd etdiyim otağı aldım. Bu gün əslində dövlət mənə ev verməlidir. Dövlətdən ev istəmirəm, ancaq öz evimi də özəlləşdirə bilmirəm. İmkan vermirlər ki, evimi özəlləşdirəm. Yenə də səbəb gətirsəydilər, əsas göstərsəydilər bu, başqaydı. Ancaq əlimdə hər sənədim olduğu halda məndən 3 min manat pul istəyirlər. Hara müraciət edək? Nə edək? Heç bir çarə yoxdur”.

Səslənən ittihamlarla bağlı Daşınmaz Əmlakın Dövlət Reyestri xidmətinin Binəqədi rayon şöbəsi ilə əlaqə yaratmağa cəhd etsək də, buna nail ola bilmədik.(Musavat.com)

Rubrika.az





Facebook-da paylaş