Baş nazirin müavini, “Qaçqınkom”un keçmiş sədri Əli Həsənovun kürəkəninin ölkədən getməsinin təfərrüatı bilinib

Elman Allahverdiyevin Azərbaycanı tərk etməsinə səbəb oğlu haqda səngimək bilməyən tənqidlər olub.

Ötən ilin avqustunda Bakıda iki nəfərin ölümünə səbəb olan ağır yol qəzası törətmiş oğlu Nailin həbsindən sonra E.Allahverdiyev Bakıda yaşa bilməyib.

Nailin başına gələn faciəyə görə babasına və atasına olan amansız hücumlar, sərt tənqidlər, sosial şəbəkələrdə yazılanlar və ictimai rəyin həddindən artıq onların üstünə getməsi bununla nəticələnib.

Belə ki, oğlu həbsdə olan Elman Allahverdiyev nə bizneslə məşğul ola bilib, nə ailədaxili vəziyyət ürəkaçan imiş, nə də ictimai rəydə tənqidlərə dözməyi bacarıb.

Bu haqda demokrat.az xəbər yayıb ki, Ə.Həsənovun kürəkəni ölkədən Almaniyaya köçüb. Hazırda Almaniyada yaşayan Elman Allahverdiyevin ailəsindən küsülü qaldığı iddia olunur.

Novxanı qəsəbəsində E.Allahverdiyevə məxsus olan bir neçə biznes obyekti də işini dayandırıb.

Bir sözlə, oğul həm atanın, həm babanın karyerasını məhv etdisə, digər tərəfdən cəmiyyətin total hücumunun təsiri oldu.

Sosial şəbəkələr kifayət qədər aqressiv, amansız və bilmərrə davrandılar. Halbuki, istərsə məmur övladı olsun, istərsə sadə vətəndaş, hər kəsin başına yol qəzası gələ bilər.

Necə ki, hər gün xəbər lentlərində ağır yol qəzaları haqda xəbərlər oxuyuruq, televiziyada dəhşətli görüntülərinə şahid oluruq. Bəs onların günahı kimdədir?

Bəs cəmiyyət o qəzaları törədənlərə niyə qudurğan, harınlamış kimi baxmır? Bəs niyə digər məmur övladlarının törətdiyi yol qəzaları bu şəkildə sərt reaksiya doğrmurdu?

Məsələn, Nəsimi icra başçısının oğlunun adam ölümünə səbəb olması, Bərdədəki məlum hadisədə şöbə müdirinin adam öldürməsi, tarzənin yoldaşı və nəvəsini öldürən məmur və onlarla belə hadisələr göstərmək olar.

Amma sosial şəbəkələr bu faciələrin üstünə Ə.Həsənovun nəvəsinin qəzası qədər total hücum çəkmədi.

RUBRİKA.AZ fia.az-a istinadla xatırladır ki, hadisədən dərhal sonra Ə.Həsənov qəzada ölənlərin ailələrini ziyarət etdi.

Onların bütün xərclərini ödədi, ziyanları kompensasiya edildi, zərər çəkənlər şikayətini geri götürdülər.

Buna baxmayaraq, Ə.Həsənov vəzifə səlahiyyətindən də sui-istifadə etmədi və nəvəsi həbsə göndərildi.

Hələ də gənc Nail etdiyi səhvinə görə məhkumluq həyatı yaşayır. Bununla belə, cəmiyyətin hirsi və qəzəbi soyumadı, qərəzli münasibət sərgiləndi.

Nəticədə Ə.Həsənovdan komitə sədrliyi alındı, kürəkəni isə biznesini dayandırıb ölkədən didərgin düşdü. Bəs bu bir ailənin faciəsi deyilmi?

Bu şəkildə nəvənin səhvinə görə bütünlüklə ailəsinin üstündən xətt çəkilməsi doğru idimi? Suallara sosial şəbəkə istifadəçiləri cavab verə bilmirlər.

Azərbaycanda qudurğanlıq edən məmurlar olub, çevrilişə cəhd göstərənlər olub, xalqa xəyanət, dövlətə qarşı casusluqda ittiham edilənlər olub.

Bu ölkənin sərvətini talayanlar, rüşvətə bulaşanlar olub və cəmiyyət heç birinin üstündə süngü ilə getməyib.

Ona görə də əldə etdiyimiz xəbərlərdə deyilir ki, E.Allahverdiyevin Almaniyaya köçməsinin bir səbəbi şəxsi məsələdirsə, digər vacib səbəb məhz oğlunun başına gələnlərdir.

Eyni zamanda ömrünü dövlətə, köçkünlərin problemlərinə həsr edən Ə.Həsənov da bu münasibətə layiq deyildi.

Doğrudur, prezident onu qiymətləndirdi, baş nazirin müavini postunda işini davam etdirir. Amma məhz həmin olaydan sonra Ə.Həsənova qarşı düşmənçilik edənlər də az rol oynamadılar.

O, indi də arzulayır ki, 1 milyon köçkün Qarabağa qayıtsın, yenə o evlərdə işıqlar yansın, yenə uşaqlar həyətlərdə oynasın, yenə həyat öz axarına qayıtsın və bu komitə tarixin yaddaşına köçsün. Və belə bir dövlət xadimi nə özü, nə ailəsi bu formada münasibəti haqq etmirdi...

RUBRİKA.AZ

Facebook-da paylaş