Bir neçə aydır ki, Ekologiya və Təbii Sərvətlər Nazirliyi atmosfer havasında zərərli maddələrin artmasının qarşısını almaq üçün hərəkətə keçib. Ötən həftə də nazirlik bununla bağlı mətbuat konfrans keçirib, ictimai-iaşə obyektlərinin fəaliyyəti zamanı atmosferə yayılan tüstünün, zəhərli qazların və iy-qoxunun ekologiyaya mənfi təsirindən danışılıb və bu problemin qarşısının alınması ilə bağlı müzakirələr aparılıb.

Rubrika.az Musavat.com-a istinaden xeber verir ki, ETSN əməkdaşları bununla bağlı monitorinqlər aparıb və havaya tüstü yayan restoran sahiblərinə məktub göndərərək xəbərdarlıq ediblər.

Montorinqlər zamanı bəlli olub ki, Bakıda ən çox tüstü çıxan ərazi Babək prospekti ətrafında olan restoran və kafelərin yerləşdiyi ərazidir. Həmin ərazilərin fotoşəkilləri çəkilərək nəzarətə götürülüb.

Artıq restoran və şadlıq saraylarına edilən xəbərdarlıqdan üç aya yaxın müddət keçib. Görəsən, sahibkarlar nazirliyin bu xəbərdarlığından bir nəticə çıxarıbmı?

Musavat.com-un müxbiri bir neçə şadlıq və restorana baş çəkib, vəziyyətlə maraqlanıb.

"Ümid" şadlıq sarayının məsul şəxsi Etibar Ümidov nazirliyin onlara etdiyi xəbərdarlıqdan məlumatlı olduğunu bildirdi. Elə buna görə də tüstünün qarşısını almaq üçün avadanlığı yaxın günlərdə gətirəcəklərini bildirdi: "Ekologiya Nazirliyinin xəbərdarlığından məlumatımız var. Tüstünün qarşısını almaq üçün xüsusi avadanlıqlar satılır. Hansı ki, o avadanlıqların ən ucuzu 16 min manatdır. Lakin daha da bahalıları var. Xaricdə istehsal olunanlar var ki, qiyməti 30 və 100 min manata qədərdir. Biz 16 min manatlıq avadanlığı alınması ilə bağlı Ekologiya Nazirliyinə müraciət edəcəyik. Bu gün sənədləri nazirliyə təqdim edəcəm. Standartlara cavab verərsə, təsdiqləyəcəklər. Daha sonra alacağıq. Bu 6 metrlik avadanlığı kababxanaya yerləşdirəcəyik. Deyilənə görə, tüstünü buxara çevirir. Daha bahalı avadanlıq almağa imkanımız çatmır".

"Bahar" şadlıq sarayının rəhbər şəxsi isə nazirliyin bu xəbərdarlığından məlumatsız olduğunu bildirdi: "Bu barədə bizə heç nə deyilməyib. İlk dəfədir sizdən eşidirəm. Hər hansı avadanlığın alınması ilə bağlı məktub gəlməyib".

Növbəti baş çəkdiyimiz ünvan "Xudafərin" şadlıq sarayı oldu. Rəhbər şəxslərdən heç kim olmasa da, restorana nəzarət edən şəxs artıq həmin avadanlığın gətirildiyini bildirdi.

Restoran və kafelərin ən sıx olduğu yerlərdən biri də “Qara Qarayev” prospektidir. Prospekt boyunca yol kənarlarında yerləşən binaların həyətində onlarla kafe fəaliyyət göstərir. Oradan çıxan tüstü həm ekologiyanı çirkləndirir, həm də yaxınlıqda yerləşən binaların sakinlərini zəhərləyir. Lakin bu obyekt sahiblərinə "dur" deyən yoxdur. Xırda obyekt kimi görünsələr də, gün ərzində yüzlərlə müştərini qonaq edir. Yəni, buranın da tüstüsü ətrafa yayılır. Dəfələrlə həmin obyektlərlə bağlı sakinlər şikayətlərini bildirsələr də, heç bir nəticəsi olmayıb.

Ekologiya və Təbii Sərvətlər Nazirliyinin mətbuat xidmətinin rəhbəri İradə İbrahimova müsavat.com-a bildirdi ki, müasir standartlara cavab verən təmizləyici qurğuların quraşdırılması barədə xəbərdarlığa əməl etməyən ictimai iaşə obyektlərinin sahibləri barəsində sərt tədbirlər görülməyə başlanılıb: "Görülən tədbirlərdən sonra eyni vəziyyət davam edərsə, nazirlik həmin obyektlərin fəaliyyətinin dayandırılması ilə bağlı müvafiq qurumlar müraciət edəcək".

İ.İbrahimova xatırladıb ki, İnzibati Xətalar Məcəlləsinin 237.2-ci maddəsinə əsasən atmosfer havasının mühafizəsi haqqında qanunvericiliyin tələblərinin pozulmasına görə vəzifəli şəxslərin 3500-4500, hüquqi şəxslərin 20000-25000 manat məbləğində cərimə olunması nəzərdə tutulur.






Rubrika.az

Facebook-da paylaş