Sakinlər bildirirlər ki, 1 ay sonra onların taleyi ilə bağlı yekun qərar verilməsə, etiraz edəcəklər

Oktyabrın 4-də Bayıl yamacında sürüşmə zonasında yaşayan bir qrup sakin etiraz aksiyası keçirib. Sakinlər bildirirlər ki, artıq havalar soyusa da onların vəziyyətinin necə olacağı məlum deyil. Onlar “Yeni Müsavat”a bildiriblər ki, müvafiq qurumlar hələ də köçürüləcəkləri ilə əlaqədar konkret söz demir.

Məlumat üçün qeyd edək ki, yanvarın 24-də Bayıl yamacında baş vermiş sürüşmə nəticəsində ərazidə olan 98 ev təhlükəli vəziyyətə düşüb, sakinlər ərazidən çıxarılaraq sığınacaqlara yerləşdiriliblər. Hadisədən bir neçə gün sonra isə ərazidə 4 ev tam uçub, 2 ev isə yararsız vəziyyətə düşüb. Sürüşmə zamanı tam dağılmış fərdi yaşayış evlərinin sahiblərinə veriləcək birdəfəlik kompensasiyanın məbləği müəyyən edilib və Nazirlər Kabinetinin qərarı ilə həmin evin sakinlərinə ödənilib. Digər ailələr isə 11 aylıq kirayə mənzillərə köçürülüblər. Sakinlər bildirirlər ki, artıq 11 ay başa çatmaq üzrədir. Ona görə də müvafiq qurumlardan konkret qərar gözləyirlər.

Bayılda sürüşmə ile ilgili görsel sonucu

Sakin Zahid Aslanov “Yeni Müsavat”a söyləyib ki, onlar 11 ayın başa çatmasını gözləyirlər: “Oktyabrın 4-də 10-dan çox sakin məhəlləmizdə toplaşıb vəziyyətlə bağlı müzakirə etdik. Qərara gəldik ki, 1 ay da gözləyək. Əgər konkret qərar verilməsə, aksiya edəcəyik. Camaat bilmir ki, sabahkı günü necə olacaq. Artıq havalar soyuyub və vəziyyətmiz də getdikcə çətinləşir. Sürüşmənin olmadığını söyləsələr də mənim evimdə çatlar dərinləşib. Əvvəl divardakı çat 1-2 millimetr idisə, indi 3-5 santimetrdir. Ona görə də xahiş edirik ki, müvafiq qurumlar bizim səsimizi eşidib, hərəkətə keçsinlər”.

Sakinlərlə söhbətimiz zamanı onu da öyrəndik ki, ərazidə bəzi evlərin kommunal xətləri bərpa olunub. Bir hissəsi isə qazsız qalıb. Eyni zamanda sakinlərin bir qismi kirayə mənzildə yaşamaqdan imtina edib. Öz evlərinə dönüblər. Sakinlərin sözlərinə görə, evlərinə qayıdanların hamısının kirayə pulu kəsilib. Onlar bildirirlər ki, kirayə pulunu kəsirlərsə, mənzillərinin kommunal xətlərini bərpa etsinlər ki, evlərində yaşaya bilsinlər.

Onu da qeyd edək ki, Eldar Əzizov Bakı Şəhər İcra Hakimiyyətinin müavin vəzifəsinə təyin olunduqdan sonra Səbayel Rayon İcra Hakimiyyəti başçısız qalıb. Sakinlər bildirirlər ki, icra hakimiyyətində sözlərini deməyə adam tapmırlar.

Sakinlər bildirirlər ki, sürüşmə sahəsində 400-500 metr məsafədə olan evlərin də kommunal xətləri bərpa olunmur. Onların əsas etirazları da bununla bağlıdır.

Rubrika.Az

Facebook-da paylaş