Azad İsazadə: “Bu cür akssesuara sahib olmaq istəyi daxili komplekslərdən, psixi problemlərdən irəli gəlir”

Bu günlərdə musavat.com saytında 25 il SSRİ Ali Soveti Rəyasət Heyətinin katibi vəzifəsində çalışmış, sonradan özünü güllələyən Mixail Georqadze haqqında maraqlı məqalə dərc edildi.

Məqalədə qeyd olunurdu ki, insanların hər zaman “təmiz kommunist” kimi tanıdığı katibin, sən demə, evində qızıl unitaz belə, varıymış. Ümumiyyətlə, həm SSRİ, həm də indiki dövrdə bir çox dünya liderlərinin, diktatorların, milyarderlərin qızıl unitaz “xəstəsi” olduğu hər kəsə məlumdur.

Məsələn, Səddam Hüseynin, Donald Trampın, sabiq Ukrayna prezidenti Mixail Yanukoviçin, Fars Körfəzi ölkələrindəki şeyxlərin və digərlərinin bu cür qiymətli akssesuarları olub. Hətta ötən il Solomon Quqqenhaym muzeyi prezident Donlad Trampa Van Qoqoun çəkdiyi məşhur “Qarla peyzaj” əsərinin əvəzinə qızıldan unitaz akssesuarını təklif etmişdi. Unitazın müəllifi Mauritsio Kattelana olan akssesuar “Amerika” adlandırılıb. Muzeydən prezidentə bildirilib ki, unitaz bir il ərzində muzeyin tualetində nümayişə çıxarılıb və istifadəçilərin xidmətində olub.

Araşdırmalar onu göstərir ki, son bir neçə ildə qızıl unitazların hazırlanıb, satışa çıxarılması artmağa başlayıb. Məsələn, ötən il Amerikada qızılla örtülmüş unitaz 5 milyon dollara satışa çıxarılmışdı.

Bəs maraqlıdır, insanlar niyə təbii ehtiyaclarını qızıldan olan aksesuara ödəmək istəyir? Səbəb harınlıq, yoxsa?..

Psixoloq Azad İsazadə mövzu ilə bağlı “Yeni Müsavat”a danışıb: “Varlı və yaxud kasıb olmasından asılı olmayaraq, insanın gözü ya tox, ya da ac olur. Acgöz insanın pulu artdıqca, özü üçün hər şeyin bahalısını almağa çalışır. Dəfələrlə şahidi olmuşuq ki, bəzi milyarderlər çox sadə həyata tərzi keçirməyə, sadə geyimlərdən istifadə etməyə çalışır. Lakin əksəriyyət öz varlılığını nümayiş etdirmək istəyir. Bu da onu göstərir ki, gözütox olmaq varlılığa, kasıblığa baxmır.

Məlum olduğu kimi, bir çox liderlər, diktatorlar nəinki qızıl unitaz, hətta qızıldan silahlar, ağılagəlməz akssesuarlar alır. Bu cür akssesuara sahib olmaq istəyi daxili komplekslərdən, bir sıra psixi problemlərdən, özüntəsdiq istəyindən irəli gəlir. Hər dəfə digərlərindən fərqlənmək üçün müxtəlif üsullar tapırlar. Kimin imkanı var, qızıl unitaz alır, kimin yoxdursa, sosial şəbəkələrdə çoxlu sayda şəkillərini paylaşır və s. Bu, nə pis, nə də yaxşıdır, hər kəs öz dünyagörüşünə görə hərəkət edir.

Xatırlayıram ki, 90-cı illərdə Rusiyada milyarderlərin biri öz ölümünü videoya çəkmişdi. Milyarder qızıl unitazda oturub, qızıl silahla özünü güllələyib, öldürmüşdü. Yəni, onun nə qədər var-dövləti, qızıl unitazı olsa da, onun yaşamağa istəyi olmayıb. Ümumiyyətlə isə təbii ehtiyacların ödəndiyi avadanlığı nümayiş etdirmək ayıb, etikadan kənardır. Lakin deməli, ehtiyac var ki, bu gün çoxlu sayda qızıl unitazlar hazırlanır, satışa çıxarılır”.

Rubrika.Az

Facebook-da paylaş