Müğənni Roza Zərgərli “Altın Kelebek” müsabiqəsinə namizədliyi çərçivəsində “Böyük dəyişim” proqramında həyatı barədə danışıb.

Rubrika.Az Musavat.com-a istinaden xəbər verir ki, ifaçı bir neçə dəfə ölümdən qayıtdığını deyib:
“Ev termometrini qırıb, civəsini sordum ki, ölüm. Amma ölmədim.
Bir dəfə də kliniki ölüm keçirdim. Kliniki ölümdən əvvəli və sonranı xatırlayıram. Ölümü xatırlamıram”.

Daha sonra Zərgərlinin yaxını ifaçının başına gələnlərdən danışıb:
“İlk dəfə atası və anası TV-i izləyərkən gizlincə mətbəxə keçib və oradakı bibəri yeyib. Bundan zəhərlənən Roza 9 gün komada qaldıqdan sonra kliniki ölüm keçirib. Morqa aparılıb. Daha sonra atasına xəbər verilib ki, qızınız ölüb. Atası qohumlara xəbər verib ki, Roza ölüb. Onu Tovuza gətirəcəyəm. Amma sonra Roza ayılıb”.

Müğənni isə başına gələn hadisəni belə nəql edir:
“Həmin qidadan atam da, anam da yemişdi. Onlara heç nə olmamışdı. Ancaq mən zəhərlənmişdim. Yatdığımı xatırlayıram, oyananda isə morqda idim, hər tərəfə bəyaz rəngdə idi”.

Roza Zərgərli ikinci dəfə bacı-qardaşı ilə avtomobildə gedəndə ölümlə üzləşib:
“Rayona getmişdim. Oradakı qızlar başında ləyən, iki əllərində də vedrə ilə gəzirdilər. Mən dedim ki, bu hərəkəti təkrarlayacağam, amma edə bilmədim. Arx var idi, həmin arxa yıxıldım. Suyun üzərinə çıxıb, təzədən batırdım. Sonra kimsə məni çıxartdı. Məni süni nəfəs verərək ayıltdılar”.

İfaçı övladını itirməsindən də bəhs edib: “Birinci qızım Bənövşəni, sonra oğlumu dünyaya gətirdim. Çox böyük həcmdə qan itkisi yaşadım və əməliyyat olundum. Özümə gələndə dedilər ki, uşağın biri yoxdur. Dedilər ki, sağ qalmağınız möcüzədir.
Müğənni daha sonra övladlığa götürdüyü Natəvandan danışıb:
“Qızıma dedim ki, hansı hədiyyəni istədiyini soruşdum. O da dedi ki, anamın kim olduğunu, məni niyə atdığını bilmək istəyirəm. Pis oldum, dedim, mənimsən, niyə ananı axtarırsan? Mən o qadını tapdım, rəfiqəm kimi evə gətirdim. Xalamın oğlu ilə Natavanı tanış etmişdim, onları evləndirəcəkdik. Qadını görüb dedi ki, bu qadın bizə layiq deyil. Sonra qızımla anası tanış oldu. Bir gün klip təqdimatından qayıdanda gördüm ki, Natəvan məni atıb, anası ilə gedib. Qızımın rəfiqəsi dedi ki, o anası ilə gedir. Qızım dedi ki, mən öz anamla gedirəm, sən anam deyilsən. Bu mənim üçün növbəti zərbə oldu. Həmin gündən sənətdən getdim, dostlarımın arasından itdim. Bir gün şəhərdə gəzərkən kiminsə “Mamıçka” deyə səsləndiyini eşitdim. Mənə elə gəldi ki, yer ayrılıb, içərisinə girmişəm. Geriyə dönəndə gördüm ki, qızım və anasıdır. Qeyri-ixtiyarı diz çökdüm. Biz barışdıq, onu tək qoymadım. Hazırda iki nəvəm var, qızımın da gözəl ailəsi var. Natavan bildi ki, dünyaya gətirən ana deyil. Anası mənəm”.

Övladlığa götürdüyü oğullarından söhbət açan Roza onlarla necə tanış olduğundan danışıb:
“Biz Corcla eyni filmə çəkilirdik. Iki ay görüşmədən, eyni meydançada oynayırdıq. Bir dəfə ondan soruşdum ki, anan nə işləyir? Dedi ki, anam yoxdur. Dedim, çox üzr istəyirəm, bilmirdim ki, vəziyyət belədir. Əsas odur ki, Allah atana qüvvət versin, sənə arxa dayaq olsun. O, bu dəfə bildirdi ki, Roza xanım mən uşaq evində böyümüşəm. Ona ilk sözüm “Sən mənim oğlumsan” cümləsi oldu. Corcu övladlığa götürəndə bilmirdim ki, qardaşı da var. Bir gün zəng gəldi ki, Corcun anası gəlib yanına və o, xəstə qadındır. Corc ağlayır, kömək edin. Onlara kömək etdim, anasını xəstəxanaya yerləşdirdim. Ruhi xəstə idi, uşaqlarından başqa heç kimi tanımırdı. Mənim ikinci adım leyladır. Corcun anası məni görüb dedi ki, sən müğənnisən, səni hamı sevir, adın da Leyladır. O, bunu mənə deyəndə şoka düşdüm, çünki adımın Leyla olduğunu bilən yox idi. Uşaqları mənə vəsiyyət elədi. Dedi ki, Jerard bir ay sonra sənə “ana” deyəcək, amma Corc deməyəcək. Elə oldu ki, Corc mənə ana dedi. O aşiq oldu, sevgilisi Sinemlə məni tanış edərkən qıza dedi ki, tanış ol, bu, mənim dünyalar gözəli anamdır”.


Rubrika.Az

Facebook-da paylaş