Dilqəm Əsgərovun oğlu: “Atamın azad olunacağına inanıram”

Erməni əhali Azərbaycanın əsirlərin “hamının-hamıya” prinsipi ilə dəyişdirilməsi təklifini əsirlərin dəyişdirilməsi fürsəti kimi qiymətləndirərək, hökumətə təzyiq etməyə başlayıblar. Artıq baş nazir əvəzi Nikol Paşinyan qeyri-standart vəziyyətlə üzləşib. Xalqın adamı olduğunu iddia edən Paşinyan hər necə olmasa, öz xalqının tələbinə gec-tez, adekvat cavab vermək zorundadır.

Azərbaycanın əsirlərin dəyişdirilməsi təklifinə Rusiyadan reaksiya verilib. Rusiya Xarici İşlər Nazirliyinin sözçüsü Mariya Zaxarova noyabrın 22-də keçirdiyi brifinqdə deyib ki, Rusiya Ermənistanla əsirlərin qarşılıqlı şəkildə dəyişdirilməsi ilə bağlı Azərbaycan tərəfinin təşəbbüsünü təqdir edir, lakin bunun reallaşması üçün müəyyən işlər görülməlidir.

Jurnalistin “bir müddət əvvəl Azərbaycan Beynəlxalq Qırmızı Xaç Komitəsi (BQXK) vasitəsilə "hamının-hamıya" prinsipi üzrə Ermənistanla bütün əsirlərin qarşılıqlı şəkildə dəyişdirilməsi kimi sülhpərvər təşəbbüslə çıxış edib. Və beynəlxalq qrup məsələ ilə bağlı tərəflərin görüşünü planlaşdırmışdı. Lakin Ermənistan əsirlərin bu prinsip üzrə qaytarılmasından imtina edir. ATƏT-in Minsk qrupunun həmsədri kimi Moskva İrəvanın bu addımını necə şərh edərdi?" sualına Zaxarova belə cavab verib: “Bilirsiniz, biz tərəflərin Dağlıq Qarabağ münaqişəsinin nizamlanması kimi başlıca vəzifəyə uyğun olan istənilən anlaşmanı təqdir edirik. Lakin anlaşmalar razılığı və bu razılığa nail olunması istiqamətində işləri nəzərdə tutur. Ona görə də bu cür təşəbbüslər çox yaxşıdır, amma onların razılaşmaya çevrilməsi üçün işlər görülməlidir.

Qarabağ Azadlıq Təşkilatının sədri Akif Nağı “Yeni Müsavat”a bildirdi ki, girovlarla bağlı Rusiyanın nəhayət ki, konkret mövqe ortaya qoyması vacib şərtdir. Rusiyanın Ermənistana təsir imkanlərı genişdir, Moskva istəsə bu məsələnin tezliklə müsbət həllinə nail olunar: “Ermənistan rəhbərliyi bu günlərdə əsirləri dəyişmək fikrində olmadığını bəyan etdi. Onların Azərbaycan tərəfindən verilən humanist təşəbbüsə qarşı çıxmaları hamı tərəfindən, hətta Avropa qurumları təfindən də pislənildi. Hesab edirəm ki, Rusiya bir qədər sərt mövqedə dayanarsa, məsələ mübət həllini tapa bilər. Ermənistanda da əsirlərin dəyişdirilməsi ilə bağlı tələblər səslənib, hətta Azərbaycan tərəfində saxlanılan erməni diversantı Karen Kazaryanın qaytarılması tələbilə aksiya da keçırılib. Ona görə də əsir və girovların dəyişdirilməsi məsələsinin ölü nöqtəsindən tərpənəcəyinə və Dilqəmlə Şahbazın nəhayət azadlığa qovuşmasına ümidlər çoxdur. İstisna deyil ki, parlament seçkilərindən sonra Nikol Paşinyan əsirlər məsələsində mövqeyində dəyişiklik edə bilər”.

Kəlbəcərli girov Dilgəm Əsgərovun oğlu Kürdoğlu Əsgərov da yaxın gələcəkdə atasının və Şahbaz Quliyevin Ermənistandan geri alınacağına inanır: “Ölkə başçısı İlham Əliyevin apardığı uğurlu siyasət nəticəsində mən əminəm ki, atam Dilqəm Əsgərov və Şahbaz Quliyev erməni girovluğundan azad ediləcəklər. Ailəmizin ümidi hələ də var ki, onlar geri qaytarılacaqlar. Bu yaxınlarda mətbuatdan oxudum ki, Paşinyan girovların dəyişdirilməsindən imtina edib. Atamgilin Kəlbəcərə getməkdə tək məqsədləri öz doğmalarının qəbirlərini ziyarət etmək olub. Mənim atam kəşfiyyatçı və diversant olmayıb, sadəcə, mülki adam olub və anasının məzarını ziyarət etmək üçün doğma kəndinə getmişdi.

Əvəzində onlar 4 il 5 aydır ki, qanunsuz olaraq girov saxlanılırlar və vəhşicəsinə işgəncələrə məruz qalırlar. Paşinyan öz açıqlamasında bildirir ki, guya onlar cinayətkardılar, ora gələrək hansısa qanunsuz əməllər törədiblər. Lakin atamgil öz doğma torpaqlarında cinayət törətməyiblər. Doğmalarının məzarını ziyarətə getmək cinayət deyil. Ermənistan hökuməti, Paşinyan atamgili cinayətdə günahlandırır, özlərinin etdiklərini isə gizlədirlər. Həsən Həsənovu vəhşicəsinə qətlə yetirdilər. Bunu niyə dilə gətirmirlər? Halbuki onun heç bir günahı yox idi. Qoy Ermənistan buna cavab versin, Həsən Həsənovun ölümündə kimi həbs etdilər, kim cavab verdi? Atam hansı cinayəti törədib, hansı qətldən söhbət gedir? Paşinyan əsirlərin azad olunmasında konstruktiv və humanist mövqe ortaya qoymadıqca onun öz ölkəsində ona münasibət get-gedə pisləşəcək. Son günlər baş verənlər də bunun əlamətidir”.

Rubrika.az

Facebook-da paylaş