Məlum olduğu kimi dekabrın 20-də Dağlıq Qarabağ Bölgəsinin Azərbaycanlı İcmasının qurultayı keçirilib. Qurultayın nəticəsini gözləniləm saymaq olar. Belə ki, tədbirdə təşkilatın hazırkı sədri Bayram Səfərov vəzifəsini gözlənilmədən tərk edib.

Ardınca isə Xarici İşlər Nazirliyinin əməkdaşı Tural Gəncəliyev Dağlıq Qarabağın Azərbaycanlı İcmasının yeni sədri seçilib. Həmçinin icmanın vəfat etmiş üzvləri Vahid Səfixanov, İlyas Həsənov, Cəlal Allahverdiyevin yerinə yeni simaların seçilib.

Rubrika.az-ın məlumatına görə, Dağlıq Qarabağın Azərbaycanlı İcmasının yeni idarə heyəti təsdiq edilib. Asif Cahangirov icra heyətinin sədrinin müavini vəzifəsinə seçilib. Digər müavin isə Qarabağ Araşdırmalar Mərkəzinin sədri Elçin Əhmədov olub.

Maraqlıdır, Dağlıq Qarabağın Azərbaycanlı İcmasının yeni sədri kimdir və bu dəyişiklik nəyə hesablanıb? Məlumat üçün bildirək ki, Tural Gəncəliyev 1980-ci ildə Şuşa şəhərində anadan olub. Ali təhsillidir. Bakı Dövlət Universitetini Hüquqşünaslıq ixtisası üzrə bitirib. Azərbaycan Respublikasının İnsan Hüquqları üzrə Müvəkili – Ombudsman Aparatında və Xarici İşlər Nazirliyində müxtəlif vəzifələrdə çalışıb.

Hazırda XİN-in Beynəlxalq Hüquq və Münasibətlər İdarəsinin birinci katibi vəzifəsində çalışır.

Qeyd edək ki, Dağlıq Qarabağ Bölgəsinin Azərbaycanlı İcmasının 23 üzvü var. Bunlar Bayram Səfərov (sədr), Elçin Əhmədov, Fərhad Bədəlbəyli, Rövşən Rzayev, Elman Məmmədov, Vaqif Fərzəliyev, Şahmar Usubov, Eyvaz Hüseynov, Kamal Abdullayev, Polad Bülbüloğlu, Həvva Məmmədova, Abbas Məlik-Yeqanov, Ramiq Məhərrəmov, Murad Adıgözəlzadə, Cavid Əliyev, Ceyhun Əliyev, Məhəmmədli Bayramov, Mehdi Abdullayev, Mehdi Mehdiyev, Şaban Qurbanov, Vahid Səfixanov, İlyas Həsənov, Cəlal Allahverdiyevdir.

Rubrika.az xatırladır ki, yerli media Bayram Səfərovun icma rəhbəri vəzifəsindən getməsi ilə bağlı ehtimallar səsləndirib. Həmin məlumatlarda iddia olunur ki, bu gözlənilməz dəyişikliyin səbəbi kimi Bayram Səfərovun son dövrlərdəki qalmaqallı açıqlamaları göstərilə bilər. Bildirək ki, son zamanlar bayram Səfərovun bahalı villalarıının fotoları da dərc olunmuş və bu məsələ böyük rezonansa səbəb olmuşdu. Bununla belə onun sədrlikdən uzaqlıaşdırılmasının təkcə bununla bağlı olduğunu düşünməmək üçün də səbəblər var.

Rubrika.az mümkün ehtimallar içərisində yuxarıda səslənən versiyanı da kənara qoymadan son dəyişikliyin həm də Qarabağ danışıqları ilə bağlı ola biləcəyinin nəzərdən qaçırılmamasının vacibliyi qənaətindədir. Belə ki, Ermənistan rəsmiləri dəfələrlə sülh danışıqlarında qondarma “DQR” təmsilçilərinin də iştirak etməsinin vacibliyini dilə gətiriblər. Hər dəfə isə bu rəsmi Bakının etirazlarına səbəb olub və nəticə etibarilə “DQR” məlum formatdan kənarda qalıb.

İndi isə Qaradağ probleminin həlli istiqamətində fəallığın yüksəldiyi bir ərəfədə siyasi proseslərdə naşı təsiri bağışlayan, ixtisasca iqtisadçı Bayram Səfərovun diplomat Tural Gəncəliyevlə əvəzlənməsi Qarabağın azərbaycanlı icmasının danışıqlar prosesinə qatıla biləcəyi ehtimalını gücləndirir. Belə olan halda danışıqlar Azərbaycan və Ermənistan səviyyəsində aparılır, Qarabağın erməni və azərbaycanlı icmaları isə həmin proseslərdə hansısa statusla iştirak edə bilər.

Qeyd edək ki, belə bir format rəsmi Bakının sülhyaratma ilə bağlı prinsipial mövqeyinə uyğun gəlir. Belə ki, Dağlıq Qarabağdakı ermənilər onsuz da Azərbaycan vətəndaşlarıdır, sülyaratma prosesində və sonrakı mərhələdə həmin icmanın problemləri də rəsmi Bakının diqqət mərkəzində olacaq. Bu baxımdan Qarabağın azərbaycanlı və erməni icmaları arasındakı təmasların artırılması, onlar arasında intensiv görüşlərin keçirilməsi də nəzərədə tutula bilər.

Hər halda Qarabağın azərbaycanlı icmasına ixtisasca hüquqşünas olan diplomatın rəhbər gətirilməsi belə bir ehtimalın yaşamaq haqqını tanıyır.

Zülfüqar Hüseynli
Rubrika.az

Facebook-da paylaş