“Maksimal sürət həddinin 140 km/saata çatdırılması planlaşdırılır”

Rubrika.az musavat.com-a istinadla bildirir ki, Bakı-Gəncə-Bakı sürət qatarı artıq 1 həftədən çoxdur ki, fəaliyyətdədir. Belə ki, ilk dəfə olaraq 2018-ci il dekabrın 29-da saat 9:00-da sürət qatarı Bakıdan Gəncəyə yola düşdü.

Qatarla ilk səfəri “Azərbaycan Dəmir Yolları” Qapalı Səhmdar Cəmiyyətinin sədri Cavid Qurbanov başda olmaqla, QSC-nin rəhbər şəxsləri, deputatlar, jurnalistlər və incəsənət adamları etdilər. Sürət qatarı Gəncəyə 3 saat 45 dəqiqəyə çatdı. Lakin ümumilikdə hazırkı göstəriciyə görə, Bakı-Gəncə arasında orta sürət 90, maksimum sürət 140 kilometr saat nəzərdə tutulub. Gələcəkdə isə bu, 160 km saata qədər qaldırılacaq.

Növbəti gün, yəni dekabrın 30-da qatarla Bakıdan Gəncəyə sıravi vətəndaşlar səfər etmək imkanı qazandılar.

Qatar vaqonları “Stadler” şirkətinin istehsalıdır. Sərnişinlər VIP və biznes sinif vaqonları ilə yanaşı, ekonom vaqonlardan da istifadə edə bilirlər. Hər bir vaqon kiçik mətbəx, soyuducu və simsiz internetlə təchiz olunub.

Bakı-Gəncə-Bakı sürət qatarı ayın cüt günlərində Bakıdan, tək günlərində isə Gəncə şəhərindən saat 09:00-da yola düşür. Qatarın Biləcəri, Yevlax və Goran stansiyalarında dayanacaqları mövcuddur. Dörd vaqondan ibarət qatarda birinci klass (9 yer), biznes (62 yer) və standart (296 yer) olmaqla, cəmi 367 oturacaq yeri var. Gediş biletləri dəmir yolu kassalarında və internet saytında onlayn satılır.

Bəs ötən 1 həftə ərzində qatarın fəaliyyəti necə yadda qaldı?

Azərbaycanda ilk dəfə sürət qatarının işə düşməsi sevinclə qarşılandı. Qatarın Gəncəyə ilk çatdığı gün izdiham yaşanıb, konsert proqramı təşkil edildi. Müxtəlif ictimai şəxslər, qəzet redaktorları qatarla bağlı təəssüratlarında layihəni yüksək qiymətləndirdilər. Onlar, bu qatarı gələcəyin qatarı adlandırdılar. QSC-nin açıqladığı məlumatda qeyd etdi ki, qatarın sürəti getdikcə qaldırılacaq. Hazırda sürətin aşağı olmasının səbəbi kimi yollarda tamamlanmayan işlər əsas gətirildi.



Bütün bunların fonunda sosial şəbəkədə müəyyən bir qrup şəxs sürət qatarı ilə bağlı xoşagəlməyən fikirlər yazıb, layihə haqqında mənfi rəy formalaşdırmağa çalışdılar. Onların bu addımlarına yanvarın 5-də qatarın Kürdəmirdə bir neçə dəqiqə yolda qalması bir qədər də təkan verdi. Sosial şəbəkədə bir qrup istifadəçi yazdı ki, əslində qatar yolunda lazımi işlər görülməyib, açılışı tez etmək üçün bəzi işləri tam görməyiblər. Onlar qatarın dayanmasını iddia etdikləri bu faktlarla əlaqələndirdilər.

Bu və ya digər məsələlər, sürət qatarının işə düşdüyü zamandan bu günə qədər fəaliyyəti barəsində məlumat almaq üçün “Azərbaycan Dəmir Yolları” ilə əlaqə saxladıq. Qurumun mətbuat xidmətindən “Yeni Müsavat”a bildirildi ki, qatarın fəaliyyəti yüksək qaydada təşkil edilib və hazırda sərnişindaşımada hər hansı bir problem yoxdur: “ Bakı-Gəncə-Bakı istiqamətində sürətli sərnişin qatarı fəaliyyətə başlayandan bu günə qədər Bakıdan 284 sərnişin, Gəncədən isə 190 sərnişin daşınıb. Yəni ümumilikdə deyə bilərik ki, bu günlər ərzində sürət qatarı vasitəsilə cəmi 474 sərnişin daşınıb”.

Yuxarıda qeyd etdiyimiz qatarın dayanması məsələsi ilə bağlı da qurumdan qəzetimizə açıqlama verilib. Bildirilib ki, 5 yanvarda Bakı-Gəncə-Bakı sürət qatarı yolda olarkən, gərginliyin verilməsində xırda problem yaranıb:

“Həmin problem dərhal aradan qaldırıldı və qatarın hərəkətində indi hər hansı ləngimə yoxdur. Sosial şəbəkələrdə yazılıb ki, hadisə zamanı guya qatarın işçi heyəti sərnişinlərlə kobud davranıb. Belə halın baş verməsi mümkün deyil. Hər kəsdən sərnişinlərlə maksimum dərəcədə nəzakətlə davranmaqları tələb olunur. Hələ ki bu yeni xəttə buraxılmış qatarlardır və oraya da tam təlim keçmiş işçi heyəti cəlb olunub”.

Dəmir yolunda işlərin tamamlanmaması məsələsi ilə bağlı isə qurumdan aşağıdakılar bildirilib:

“Ümumiyyətlə, sosial şəbəkələrdə bəzi istifadəçilərin belə yanaşması yanlışdır. ”Azərbaycan Dəmir Yolları" QSC-də gedən yeniləşmə prosesinin əsas tərkib hissələrindən biri də yolların əsaslı təmiridir. Bu istiqamətdə dəmir yolunda kompleks işlər görülür. 2016-cı ildən dəmir yollarının əsaslı təmirinin növbəti mərhələsi həyata keçirilir. Artıq Bakı-Böyük Kəsik istiqamətində yollar dünya standartlarına uyğun, əsaslı təmir olunub, eyni zamanda həmin yollarda yeni yoldəyişənlərin quraşdırılması başa çatıb. Təmas şəbəkəsində yenidənqurma işləri tam başa çatdırıldıqdan sonra maksimal sürət həddinin 140 km/saata çatdırılması planlaşdırılır".

Rubrika.Az

Facebook-da paylaş