Suraxanı rayonu, Qaraçuxur qəsəbəsi, Kərəm İsmayılov küçəsi 1/5 ünvanında sakinlərin həyatı təhlükədədir. Belə ki, qurumuş, təhlükəli vəziyyətdə olan qovaq ağacı hər an insanların evlərinin damını uçura, özlərinə xəsarət vura bilər. Hündürlüyü 10 metrdən də çox olan irigövdəli ağac hazırki sərt küləyin əsdiyi hava şəraitində insanların rahatlığını pozur. Bu günlərdə hava şəraitinin kəskin dəyişməsi təhlükə riskini bir qədər də artırır.

Bu ünvanda yaşayanlar 5 ildən çoxdur ki, ağacın kökündən kəsilməsi üçün aidiyyatı qurumlara müraciət ediblər. Hətta ağacın kəsimi üçün 3 il əvvəl qərar da verilib. Ancaq hələ də icra olunmayıb... Vətəndaşlar bədbəxt hadisə baş verməzdən öncə ağacın kəsilməsi üçün artıq mətbuata üz tutublar.

Sakinlərdən Firdovsi Vəliyev 2015-ci ilin noyabr ayında Ekologiya və Təbii Sərvətlər Nazirliyinin Ətraf Mühitin Mühafizəsi Departamentinə sakinlər adından məktub göndərib. Məktubdan sonra departamentin əməkdaşları ağaca baxış keçirib. Əməkdaşlar qovaq ağacının ətrafda yaşayan sakinlərin həyatına təhlükə yaratdığını müşahidə ediblər.

İdarə Bakı Şəhər İcra Hakimiyyətinin Yaşıllaşdırma Təsərrüfatı Birliyinə məktub da göndərib. Ancaq kəsim icra olunmayıb. Bu səbəbdən də nazirliyin Ekspertiza İdarəsi 2015-ci ilin noyabr ayında təkrar rəy verməli olub. İdarə ağacın kəsilməsi üçün Bakı Şəhər İcra Hakimiyyətinin Yaşıllaşdırma Təsərrüfatı Birliyinə məktubla təkrar müraciət edib. Ancaq qərar yenə gözardı edilib. Sakin Firdovsi Vəliyev deyir ki, bir qurum digər qurumun qərarını icra etmək istəmir, bununla da vətəndaşların həyatını təhlükəyə atırlar.

F.Vəliyev musavat.com-a onu da bildirdi ki, ağacın kəsilməsi üçün Yaşıllaşdırma İdarəsinin əməkdaşları ondan “şirinlik” istəyiblər və rüşvət vermədiyi üçün ağacı kəsməyiblər: “2013-cü ildə müracit etdik, 2 illik get-gəldən, məktublarımızdan sonra 2015-ci ildə ekspertiza rəy verdi ki, ağac kəsilməlidir. Bir rəyi 2 ilə çıxartdılar. İndi o 2 ilin üstündən 3 il də keçib, ancaq rəyi hələ də icra etməyiblər. 5 ilə bir ağacı kəsdirə bilməmişik, bu qurumlara... Səbəb də odur ki, Yaşıllaşdırma İdarəsi bizdən 500 manat rüşvət istəyir. Deyir, ağac elə yerdədir ki, o dalana kiçik texnika girə bilməz. Küçənin bu başından o başına iri texnika uzadıb, ağacı kəsməliyik. Bu isə 500 manata başa gəlir. Biz rüşvət verməkdən imtina etdikdə isə deyirlər, ümumiyyətlə, bizdə texnika yoxdur. Əgər paytaxtın o boyda Yaşıllaşdırma İdarəsində bir ağacı kəsməyə texnika yoxdursa, o idarə nəyə yarayır? Və bu necə olur ki, rüşvət versək texnika var, rüşvət vermirik deyə texnika yoxdur?”

Ərazidə olduğumuz zaman müşahidə etdik ki, ağacın kökləri şaxələnərək həyəti və evi bərbad hala salıb. Vətəndaşın hasarı uçub, evinin dam ötükləri qırılıb, otaqların divarları çatlayıb: “Hər dəfə külək əsəndə qorxuya düşürük. Tonlarla ağırlığı olan ağacın evin damına düşəcəyindən qorxuruq. Bir neçə dəfə ağacın iri budaqları qırılıb, yerə düşüb. Həyətdən keçən kommunal xətlər budağın düşməsinin qarşısını alıb. Həmin an qonşulardan birinin üstünə düşürmüş, birtəhər qaçaraq canını qurtarıb. Bir müddət əvvəl ağacı özümüz kəsmək qərarına gəldik. Ancaq Yaşıllaşdırma İdarəsindən bizə dedilər ki, bunu özbaşına edə bilmərik. Bir sözlə, Yaşıllaşdırma İdarəsi nə sakinlərə ağacı kəsməyə imkan verir, nə də özü əncam çəkir”.

Məsələ ilə bağlı Bakı Yaşıllaşdırma İdarəsininin mətbuat katibi Orxan Vəliyev bildirdi ki, şəxsi evlərdəki ağaclar onların balansında olmadığından təmsil etdiyi qurum tərəfindən bu məsələdə köməklik göstərilməyəcək. Ev sahibi öz vəsaitləri hesabına ağacı kəsməlidir.(Musavat.com)











Rubrika.Az

Facebook-da paylaş