Azərbaycanda daha iki bank bağlanmaq təhlükəsilə üz-üzədir.

Rubrika.az bildirir ki, maliyyə bazarlarındakı mənbənin Modern.az-a verdiyi məlumata görə, yaxın vaxtlarda Maliyyə Bazarlarına Nəzarət Palatası bununla bağlı qərarını açıqlayacaq. Mənbə qeyd edir ki, artıq hər iki bankın rəhbərliyinə rəsmi məktub da göndərilib. Bankların rəsmi olaraq bağlanması elan olunmasa da, artıq əmanətçilər öz əmanətlərini geri çəkmək istəyir. Bankların maliyyə resursları tükəndiyindən əmanətlərin geri qaytarılmasında problemlər yaşanır.

Dünənki yazımızda bankların adını çəkməsək də, vətəndaşlardan gələn istək üzərinə həmin bankların adlarını onların rəsmi mövqeyini işıqlandırmaqla açıqlayırıq. Maliyyə bazarındakı mənbə bildirir ki, sözügedən banklar “Amrahbank” və “Bank of Baku”dur.

“Amrahbank”ın PR meneceri Elmira Vəliyeva Modern.az-a açıqlamasında bankda işlərin davam etdiyini bildirib:

“Siz bizə zəng edibsiniz və gördüyünüz kimi işimizin başındayıq. Yayılan məlumatlar qeyri-rəsmidir. Maliyyə Bazarlarına Nəzarət Palatası tərəfindən bizə rəsmi xəbərdarlıq olunması ilə bağlı məktub yayılıb. Biz elə bir məktub almamışıq. Kim “Amrahbank”a ünvanlanmış rəsmi xəbərdarlığı görüb? Yoxdur belə bir şey. Camaat özündən siyahı uydurub, bizim də adımızı ora salıb. Görürsünüz iş gedir, biz işdəyik”.

E.Vəliyeva vətəndaşların öz depozitlərini geri çəkməkdə problem yaşaması ilə bağlı iddiaları da qəbul etməyib:

“İstəyirsiniz, gəlin özünüz müşahidə edin. Müştərilərimizlə bizim aramızda heç bir problem yoxdur”.

Bağlanmaq təhlükəsi yaşandığı iddia olunan “Bank of Baku”nun PR meneceri Gülşən Cumayeva da Modern.az-a öz növbəsində məlumatların həqiqəti əks etdirmədiyini bildirib:

“Əgər belə bir hal yaşansaydı, rəsmi qurum açıqlama verərdi”.

Rubrika.az

Facebook-da paylaş