150 min dollarlıq dələduzluqda ittiham olunan Elnur Nağızadənin Gürcüstana, oradan Böyük Britaniyaya yollandığı deyilir
Tələbə Qəbulu üzrə Dövlət Komissiyasının mətbuat xidmətinin sabiq rəhbəri Elnur Nağızadə hazırda Londonda yaşayır.

Bu haqda “Yeni Müsavat”a daxil olan xəbərdə deyilir ki, E.Nağızadə 2016-cı ilin aprelində ölkədən çıxıb. O, Gürcüstana, oradan isə Böyük Britaniyaya yollanıb. 3 ildir ki, Londonda yaşayan E.Nağızadənin adı böyük rüşvət və korrupsiya qalmaqalına qarışmışdı. Bakı şəhər sakinləri Vüsal Ibrahimov və Zaur Əsgərov hüquq-mühafizə orqanlarına verdikləri şikayət ərizələrində 2015-ci ilin avqust ayında Elnur Nağızadəyə işə düzəlmək məqsədilə 150 min ABŞ dolları verdiklərini bildiriblər. Onlar işlə təmin olunmadıqlarını və pullarını geri ala bilmədiklərini vurğulayıblar. Həmin dövrdə Baş Prokurorluğun yaydığı məlumata görə, Elnur Nağızadə ilə bağlı daxil olmuş şikayət əsasında Baş Prokuror yanında Korrupsiyaya Qarşı Mübarizə Baş Idarəsində fakta görə Cinayət Məcəlləsinin 178.3.2-ci (dələduzluq), 308.1-ci (vəzifə səlahiyyətlərindən sui-istifadə etmə) və 320.1-ci (rəsmi sənədləri, dövlət təltiflərini, möhürləri, ştampları, blankları saxtalaşdırma, hazırlama, satma və ya saxta sənədlərdən istifadə etmə) maddələri ilə cinayət işi başlanıb.

Elnur Nağızadə başlanmış cinayət işi üzrə təqsirləndirilən şəxs qismində cəlb edilməklə barəsində məhkəmənin qərarı ilə həbs-qətimkan tədbiri seçilərək axtarışa verilib. Hazırda onun tutularaq istintaqa cəlb edilməsi istiqamətində istintaq və əməliyyat-axtarış tədbirləri davam etdirilir.

Amma maraqlıdır ki, Elnur Nağızadənin qohumları bu məsələdə DİM sədri Məleykə Abbaszadəni günahlandırırdı.

Elnur Nağızadənin əmisi Tahir Nağıyev qardaşı oğlunun həyatının təhlükədə olduğunu bildirmişdi. O, Məleykə Abbaszadənin ünvanına bir sıra ittihamlar səsləndirmişdi və qeyd etmişdi ki, mətbuat konfransı keçirərək, bu dediklərini əsaslandıracaq. Lakin sonradan Tahir Nağıyev də yoxa çıxdı. O zaman məsələyə münasibət bildirən komitə sədri Məleykə Abbaszadə E.Nağızadənin əməllərini istintaqın araşdırdığını söyləməklə kifayətlənmişdi...

Rubrika.az

Facebook-da paylaş