“Ard-arda iki musiqiçi həbs olundu. Bildiyimə görə dövlət qurumları bir müddət öncə meyxanaçılara xəbərdarlıq edib ki, meyxana sözlərinə diqqət etsinlər. Mən hər zaman efirdə bu haqda danışırdım. Amma bəziləri elə bilirdi ki, onlara paxıllıq edirəm”.

Bu sözləri musavat.com saytına açıqlamasında meyxanaçı-müğənni Namiq Qaraçuxurlu deyib. O,

“Kazbek” mahnısının ifaçısı “Vüqar Səda” ləqəbli Vüqar Abdullayev ilə “Rüzgar” ləqəbli reper Aydın Hüseynovun 30 sutkalıq saxlanılmasına münasibət bildirib: “Musiqiçilər mənə qulaq asmadılar, amma nəhayət dövlət qurumları hərəkətə keçdi. Bu məndə olan məlumatdır, bəlkə də, yanılıram. Amma meyxanaçıların həbsinin tərəfdarı deyiləm, onlar gəncdir. Kaş xəbərdarlıq olunardı. Bəlkə də olunub. Onlar diqqət etmədikləri üçün onlara cəza verilib”.

N.Qaraçuxurlu meyxanalarda istifadə olunan təhqiramiz ifadələrə də toxunub: “Meyxananı kitab dilində demək olmaz. Onun içərisində vulqar sözlər də olar. Amma baxır, harada deyirsən. Mən vaxtilə etikadan kənar meyxanalar demişəm, onlar yayılıb. Amma sonra özümü yığışdırmışam. Amma elə meyxanaçılar var ki, düşüncələri dardır, bu cür şeylər xoşularına gəlir. Dalbadal təhqiramiz sözləri olan meyxanalar deyirlər. Amma vaxt gələcək peşman olacaqlar”.

İfaçı Nura Surinin toylarda müğənnilərin bir-birilərini çətin vəziyyətə salması barəəs səsləndirdiyi fikirlərə də münasibət bildirib: “Bu çoxdanın sənətidir, böyüklərimizdən qalan məktəbdir, gənc müğənnilərimiz də təkraralayır. Bəlkə də mənim də ayağımın altını qazanlar olub. Amma hiss etməmişəm. Mən də çox mənasız hərəkətlərlə qarşılaşmışam, fikir verməmişəm. İndi isə sözümü deyirəm”.

Qaraçuxurlu müğənnilərin efirdə qeyri-etik ifadələr işlətməsindən danışıb: “Müğənnilər diqqətli olmalıdır. Bəzən stressli olurlar. Stressi atmaq üçün zarafat edirlər. Onun da mənası pis çıxır, sonr da yayılır. O müğənnilərə xəbərdarlıq olunmalıdır. Biz də diqqətli olmalıyıq”.

İfaçı əməliyyat olacağını da deyib: “Ayağımda millər qalıb, əməliyyat olunacağam. Iki həftə əsa ilə gəzəcəyəm”.

Rubrika.Az

Facebook-da paylaş