Prezident İlham Əliyev özünəməxsus kadr siyasəti ilə fərqlənib. Bəzən uzun zaman medianın müzakirələr apardığı, müxtəlif namizədlər arasında spekulyasiya etdiyi hər hansı bir posta cənab prezident elə bir təyinat edir ki, aparılan bütün müzakirələrdə bəlkə də adı keçməyən tək namizəd o olur.

Biz bunun dəfələrlə şahidi olmuşuq. Eyni zamanda dövlət başçısı onun etimadını doğrultmayanlara qarşı da qəti və sərt mövqe sərgiləyib. Onun kadr siyasətini analiz edəndə aydın olan tək odur ki, bu siyasət kimlərinsə, nələrinsə maraqlarına deyil, sırf dövlətin və xalqın maraqlarının qorunmasına xidmət edir. Məhz bu səbəbdəndir ki, ümummilli liderin formalaşdırdığı monolit bir komanda bu gün İlham Əliyevin ətrafında uğurla fəaliyyət göstərir və bütövlüyünü qoruyur.
Azərbaycan keyfiyyətcə yeni mərhələyə qədəm qoyub. İlham Əliyevin başlatdığı inqilabi və sosial islahatlar hətta ən qatı rəqibləri tərəfindən belə tənqid olunmayacaq qədər mütərəqqi xarakter daşıyır. Eyni yol kadr islahatlarına da şamil oluna bilər. Bu islahatlar heç də komandanın tərkibinin dəyişməsindən ibarət deyil - burada əsas məqsəd kimin harada faydalı ola biləcəyini müəyyənləşdirməkdir. Son dəyişikliklər bir daha sübut etdi ki, İlham Əliyev bu sahədə əvəzedilməz liderdir. O, doğurdan da monolit bir dövlətin rəhbəridir!
Güc strukturlarının rəhbər heyətində edilən dəyişikliklər əslində hansısa yerdəyişmə deyildi. Bu daha güclü və çevik bir idarəetmə sisteninin formalaşmasına xidmət edir. Ramil Usubovun 25 illik nazirlik dönəmi və onun hansı xarakterə sahib olduğunu hamı bilir. Usubov hər bir dövlət və onun rəhbəri üçün həmişə arzuolunan bir generaldır. Vaxtilə Heydər Əliyevin onun haqqında dediyi yüksək fikirləri Usubov bu günə qədərki şərəfli fəaliyyət yolu ilə sübut edib. Təsadüfi deyil ki, İlham Əliyev də dövlətin general mundirlərini qürurla daşıyan Usubova hər an ən yüksək dəyəri verib. Elə son təyinat da bu dəyərin göstəricisidir.
Həmçinin onun tərk etdiyi posta gətirilən şəxs də ən azında R.Usubov məktəbinin layiqli davamçısı, yetirməsidir. Vilayət Eyvazovun DİN sıralarında keçdiyi xidmət yolu, dövlətə, xalqa və liderə şəxsi sədaqət simvolu olması deməyə əsas verir ki, o yeni vəzifədə də eyni uğurla və şərəflə öz missiyasını yerinə yetirəcək. Bu DİN-də R.Usubov tərəfindən illərdir formalaşan dəmir nizam-intizamın davamı, xalqa xidmətin yeni mərhələsidir. Bu yolda vətənin və xalqın qürur yeri olan cənab generallara yeni-yeni uğurlar arzulayırıq.

Şəmsəddin Əliyev
Azərbaycan Mətbuat Şurasının icraçı katibi


Facebook-da paylaş