Bakıda 5 il əvvəl qısqanclıq zəminində qətl törədən Kürdəmir rayon sakini Asim Ağamalıyevin barəsində hökmdən verilən kasasiya şikayətinə baxılıb.

Rubrika.az teleqraf.com-a istinadən xəbər verir ki, Ali Məhkəmədə hakim İmran Hacıqayıbovun sədrliyi ilə baş tutan prosesdə məhkumun kasasiya şikayəti araşdırılıb.

Asim Ağamalıyevin vəkili Murtuzəli Abbasov kasasiya şikayətini belə əsaslandırıb ki, müdafiə etdiyi şəxsin barəsində birinci instansiya məhkəməsinin hökmü, Bakı Apelyasiya Məhkəməsinin qərarı qanunsuzdur.

Onun sözlərinə görə, müdafiə etdiyi Asim Ağamalıyevin əməlində cinayət törətməsi barədə heç bir sübut yoxdur.

Kasasiya şikayətinin dəlillərini araşdıran hakim heyəti sonda qərar elan edib. Qərara görə, şikayət təmin olunmayıb.

İttihama görə, 2014-cü il noyabrın 20-də Binəqədi rayonunun Biləcəri qəsəbəsindəki “Vulkan" motelinin hamam otağında Sumqayıt şəhər sakini Afaq Şükürovanın meyidi tapılıb. Mərhumu qohumunun - Kürdəmir rayon sakini Asim Ağamalıyevin boğaraq öldürdüyü müəyyənləşib.

Afaq Şükürova ailəli olsa da, onun öz doğma əmisi oğlu ilə də münasibətləri olub.

2014-cü ilin noyabrın 20-də gecə “Vulkan” motelində hadisə baş verən zaman Afaq Şükürova orada əmisi oğlu ilə birlikdə olub.

“Vulkan” motelinə istirahətə gələn xanımla kişi arasında mübahisə düşüb. Motel otaqlarının birində əylənən cütlüyün mübahisəsi sonda qadının faciəli ölümü ilə nəticələnib.

İlkin məlumatda qadını əyləndiyi kişinin bıçaqladığı qeyd edilsə də, sonradan bu məlumat hüquq-mühafizə orqanları tərəfindən təkzib olunub.

Əməliyyat-istintaq tədbirlərindən sonra Afaq Şükürovanın özünü asaraq intihar etdiyi versiyası irəli sürülüb.

Lakin araşdırmalar zamanı məlum olub ki, Afaq Şükürova öz doğma əmisi oğlu Asim Ağamalıyev tərəfindən oteldə zorlanıb.
Sonra onların arasında mübahisə yaranıb. Mübahisə zamanı Asim Ağamalıyev Aşaq Şükürovanı öldürüb.

Asim Ağamalıyevin barəsində Cinayət Məcəlləsinin 120.2.6-cı (başqa cinayəti gizlətmə və ya onun törədilməsini yüngülləşdirmə məqsədi ilə, habelə zorlama və ya seksual xarakterli başqa zorakı hərəkətlərlə əlaqədar adam öldürmə) və 29,149.1 (zorlamaya cəhd) maddələri ilə ittiham elan edilib.

Bakı Ağır Cinayətlər Məhkəməsinin hökmü ilə Asim Ağamalıyev 18 il müddətinə azadlıqdan məhrum edilib. Onun cəzasının ilk 3 ilini həbsxanada, 15 ilini isə ciddi rejimli cəzaçəkməsi qərara alınıb.

Hökmdən narazı qalan Asim Ağamalıyev apelyasiya şikayəti verib. O, birinci instansiya məhkəməsinin barəsinsdə çıxardığı hökmü ağır olduğu bildirib. Asim Ağamalıyev cəzasının yüngülləşdirilməsini istəyib.

Bakı Apelyasiya Məhkəməsinin qərarı ilə Asim Ağamalıyevin barəsində olan hökm dəyişdirilib.

Yeni hökmə əsasən, Asim Ağamalıyevin cəzası 16 ilə endirilib.

Bu qərardan narazı qalan Asim Ağamalıyevin vəkilləri kasasiya şikayəti verib.

Bir müddət əvvəl Ali Məhkəmədə hakim İmran Hacıqayıbovun sədrliyi ilə araşdırma aparılan zaman Asim Ağamalıyev cəza çəkdiyi Penitensiar Xidmətinin Şəki Penitensiar Müəssisəsindən məhkəməyə ərizə göndərib.

Məhkum ərazisində kasasiya şikayətinə baxılmasından imtina etdiyini göstərib. O, qeyd edib ki, şikayətinə əlavələr edəcək və bu səbəbdən işin geri qaytarılmasını xahiş edib. Bu səbəbdən həmin vaxt məhkumun istəyi nəzərə alınmışdı və kasasiya şikayəti baxılmamış saxlanılmışdı.

Yenidən kasasiya şikayəti ilə Ali Məhkəməyə müraciət edən məhkum bu dəfə günühsız olduğunu, barəsində bəraət hökmünün çıxarılmasını istəyib.

Rubrika.Az

Facebook-da paylaş