Diplomatiyamızın “uğurları” göz qabağındadır...
2017-ci ilin noyabrın 14-də, bax, bu Xalid Fudə Məhəmməd Bakıda Azərbaycana xüsusi rəğbətindən danışırdı...

Azərbaycanın işğal altındakı torpaqlarında qondarılmış separatçı terrorçu rejimin “xarici işləri”nin nəzarətçisi Masis Mailyan dekabrın 16-18-də “işgüzar” səfərlə müsəlman(!) dövləti sayılan Misir Ərəb Respublikasında işgüzar səfərdə olub.

Rubrika.az Moderator.az-a istinadla xəbər verir ki, Xankəndidəki erməni nəşrlərinin yaydığı məlumata görə, M.Mailyan "Misirdə bir sıra işgüzar dairələrin nümayəndələri ilə görüşüb".

Səfər zamanı separatçı-terrorçu rejim nümayəndəsini Misirin Cənubi Sinay Vilayətinin qubernatoru, Şarm-əş-Şeyx şəhərinin meri Xalid Fudə Məhəmməd də qəbul edib. M.Mailyan “Misir hakimiyyətinin erməni icmasına ənənəvi dostluq münasibətini yüksək qiymətləndirib, ölkənin inkişafında ermənilərin mühüm töhfəsini və rolunu qeyd edib”.

Görüş zamanı separatçı rejimin «baş diplomat”ı qondarma “respublikanın iqtisadi inkişafının prioritet sahələrini təqdim edib. Bu çərçivədə M.Mailyan, xüsusilə, turizm sektorunu diqqətə çatdıraraq Qarabağın turistik cəlbediciliyinin artırılmasına yönəldilmiş və olduqca qənaətbəxş nəticələr verən müxtəlif təşəbbüslərə toxunub”.

Separatçı rejim nümayəndəsi rejimin nəzarət etdiyi Azərbaycan ərazisində “vergi siyasətini və böyük investorlara güzəştli şərtləri təqdim edib”. Rejim “iqtisadiyyatının bəzi sahələrinə investisiya qoyuluşunun perspektivləri ilə bağlı fikir mübadiləsi aparılıb”...

Görüşün sonunda Misirin Cənubu Sinay vilayəti ilə separatçı erməni rejimi arasında “turizm, mədəniyyət və idman sahələrində əməkdaşlığın qurulması və inkişafı barədə razılıqlar əldə edilib”...

P.S. Təəsüf hissi və qəlb yanğısı ilə xatırladaq ki, Azərbaycanın xarici işlər naziri Elmar Məmmədyarov bu günlərdə ölkəmizin qatı düşməni olan, işğal altındakı ərazilərimizi zəbt etmiş erməni separatçı-terrorçu rejimin nümayəndəsini yüksək səviyyədə qəbil edən, onunla əməkdaşlıq barədə razılıq əldə edən Misirin Cənubi Sinay Vilayətinin qubernatoru, Şarm-əş-Şeyx şəhərinin meri Xalid Fudə Məhəmmədin rəhbərlik etdiyi nümayəndə heyətini cəmi 2 il öncə Bakıda Xarici İşlər Nazirliyinin binasında qəbul edib. 14 noyabr 2017-ci ildə baş tutmuş görüş haqqında məlumatı nəzərinizə çatdırırıq(bax:https://report.az/siyasi-xeberler/xarici-siyaset/elmar-memmedyarov-misirin-cenubi-sinay-vilayetinin-qubernatoru-ile-gorusub/):

"Azərbaycanın xarici işlər naziri Elmar Məmmədyarov Misirin Cənubi Sinay Vilayətinin qubernatoru, Şarm-əş-Şeyx şəhərinin meri Xalid Fudə Məhəmmədin rəhbərlik etdiyi nümayəndə heyətini qəbul edib.

Xarici İşlər Nazirliyinin Mətbuat xidmətindən verilən məlumata görə, Azərbaycanla Misir arasında tarixi əlaqələrə toxunan E.Məmmədyarov iki ölkə arasında mədəni və dini bağlılığının münasibətlərin inkişafına müsbət təsir göstərdiyini və əməkdaşlığın inkişafı üçün böyük potensialın olduğunu bildirib.

Azərbaycana xüsusi rəğbəti olduğunu bildirən Xalid Fudə Məhəmməd iki ölkə arasında birbaşa uçuşların bərpa edilməsinin ikitərəfli əməkdaşlığı gücləndirəcəyini və turizmin inkişafına təkan verəcəyini deyib.

Görüşdə iki ölkə arasında turizm sahəsində əməkdaşlığın cari vəziyyətinə nəzər salınıb və bu istiqamətdə səylərin artırılmasının vacibliyi vurğulanıb.

Keçən il Misirə rəsmi səfərini və keçirtdiyi görüşləri xatırladan Elmar Məmmədyarov yüksək səviyyəli qarşılıqlı səfərlərin ikitərəfli əməkdaşlığa töhfə verdiyini bildirib"...

P.P.S. Diplomatiyamızın “uğurları” göz qabağındadır...

Rubrika.az

Facebook-da paylaş