[

Dilşad Abbasova kimdir-DSK sədri,yoxsa hansısa namizədin vəkili?

Fevralın 9-na təyin edilmiş növbədənkənar parlament seçkilərinə sayılı günlər qalsa da bir çox Dairə Seçki Komissiyalarında hələ də özfəaliyyətlə məşğul olurlar. Başlanan islahatlar çərçivəsində zamanın tələblərinə cavab verən yeni parlamentin formalaşdırılması üçün təyin edilən seçkiləri “köhnə hamam köhnə tas” prinsipi ilə keçirmək istəyən 45 saylı Abşeron DSK-da namizədlərin qeydə alınması zamanı seçki qanunvericiliyinin tələbləri kobud şəkildə pozulur, namizədlərə süni maneələr yaradılır. DSK sədri Dilşad Abbasovanın təxəyyülünün məhsulu olan qanunsuz yollarla istəmədikləri namizədlərin qeydiyyatı əngəllənir.
Xatırladaq ki,artıq 45 saylı DSK bir namizədin qeydə alınması zamanı yol verdiyi qanunsuzluğa görə gündəmə gəlib və MSK həmin namizədin şikayətini təmin edib. Lakin “gecə qara cücə qara” metoduyla işləməyə üstünlük verən Dilşad xanım bu dəfə daha bir jurnalist həmkarımızı- Zahir Əzəməti hər vəchlə qeydiyyata almaq istəmir. Daha çox seçki qanunvericiliyiylə yox, icra strukturlarından gələn göstərişlərlə işləyən 45 saylı DSK qeydə almağı məsləhət bilmədiyi namizədlər üçün bütün vasitələrlə əngəllər yaradır.
Zahir Əzəmətin qeydiyyatı prosesində əvvəldən yaxından iştirak edən şəxs olaraq deməliyəm ki, 45 saylı DSK seçki prosesi kimi ciddi bir siyasi aksiyanı palatka toyu səviyyəsinə endirib. Zahir bəyin sənədlərini DSK-ya təqdim edərkən işıqlar sönmüşdü. Şam işığında hər şeyin daha romantik olduğu təfəkkürüylə işləyən DSK üzvləri qaranlığa salıb bir təhər sənədləri qəbul etdilər. İndi aydın olur ki, prosesin sonrakı gedişatının qaranlığı elə ilk gündəcə Azərişıq əməkdaşlarına agah olubmuş. Qeydə alma prosesinin sonrakı mərhələləri sübut etdi ki, 45 saylı DSK rayon icra hakimiyyətinin filialı kimi fəaliyyət göstərir. Özünə favorit namizəd saydığı O.Əsədovun seçki qərargahı funksiyasını yerinə yetirən DSK digər namizədlər üçün Çin səddinə çevrilib.
Namizədlərdən tələb olunan əmlak vəziyyəti haqqında arayışı da Zahir bəylə birlikdə almışıq. Maraqlıdır ki, Zahir bəyə və sonradan DSK-ya əmlak barədə arayış verən eyni dövlət qurumu müxtəlif məzmunlu arayışlar təqdim edib. Guya Z.Əzəmətin əmlakı barədə məlumatları gizlətdiyini qeyd edən DSK qeyri-ciddi arqumentlərlə onun namizədliyini qeydə almaqdan imtina edir. Təbii ki, bunun sifarişli olduğu, kimlərin maraqlarını qoruduğunu biz yaxşı bilirik. Sadəcə cənab Prezidentin başlatdığı demokratrik açılıma bu qədər zərbə vurmaq, heçdən narazılıq formalaşdırmaq kimlərin maraqlarına xidmət edir bilmirik. Dövlətçilikdən,prezidentə sədaqətdən danışanda ağzı köpüklənənlər sanki qəsdən onun siyasi kursuna xəyanət edirlər. 45 saylı DSK-nı icra hakimiyyətinin telefon zəngləriylə idarə edən Dilşad xanım özünü konkret namizədin vəkili kimi aparır. Elə bu səbəbdəndir ki, qapı-qapı düşüb Zahir bəy haqqında saxta arayışlar toplamaqla onun qeydiyyatını əngəlləməyə çalışır. İstədiyi namizədi işıqlı otaqlarda,istəmədiyini qaranlıq odalarda qəbul edən Dilşad xanım Abşeronda seçki qanunvericiliyini çoxdan dəfn edib. Mərhumun üçü,yeddisi də çıxıb. DSK-nın işıqları da sönüb. Bu zülmətdə isə seçki keçirmək mümkünsüzdür. İşıqları yandırın,cənablar, görün kimin əli kimin cibindən çıxacaq!

Nicat Mahmudov

Facebook-da paylaş