Daxili İşlər Nazirliyi (DİN) Mərkəzi Seçki Komissiyasının (MSK) binası qarşısında keçirilən icazəsiz aksiya ilə bağlı yeni açıqlama yayıb.

Rubrika.az-ın virtualaz.org-a istinadla əlumatına görə, DİN-in Mətbuat xidmətinin rəisi, polis polkovniki Ehsan Zahidov bildirib ki, bu gün saat 18:00-dan başlayaraq bir qrup şəxs MSK-nın qarşısında razılaşdırılmamış aksiya keçirməyə cəhd göstərib. Təxminən 2 saat MSK nümayəndələrinin onlarla izahedici söhbətlər aparmasına baxmayaraq, həmin şəxslər qanunsuz əməllərini davam etdiriblər: "Daha sonra MSK nümayəndələri ərazi polis orqanına müraciət edərək razılaşdırılmamış aksiyanın qarşısının alınmasını xahiş edib. Əraziyə gələn polis əməkdaşları onları qanunun aliliyinə dəvət edərək, dağılışmalarını tələb edib.

Lakin aksiya iştirakçıları polisin qanuni tələb və xəbərdarlığına məhəl qoymayıb. Belə olan halda polis qanunsuz aksiyanın qarşısını alaraq, onları ərazidən uzaqlaşdırıb. Bu zaman polisə müqavimət göstərən bir nəfər şəxs saxlanılıb".

E.Zahidov qeyd edib ki, hazırda araşdırma aparılır, nəticədən asılı olaraq məsələyə hüquqi qiymət veriləcək.

* * *21:37

MSK-nın binası qarşısındakı qanunsuz etiraz aksiyasına seçkilərin nəticələrindən narazı qalmış digər namizədlər, həmçinin müxalifət xadimləri də qoşulublar.

Onların arasında ReAl-ın keçmiş liderlərindən olan Azər Qasımlı, NIDA üzvü Turqut Qəmbər, deputatlığa namizəd Fərhad Mehdiyev və başqaları da olublar.

MSK-nın katibi etiraz edən namizədlərin qarşısına çıxıb, onları maraqlandıran suallar üzrə sabah şərh veriləcəyini bildirərək dağılışmalarını xahiş edib. O həmçinin bildirib ki, MSK-da seçkilərdəki pozuntular haqda sosial şəbəkələrində yayılmış videolardan xəbərdadırlar və komissiya onları araşdıracaq.

Ancaq deputatlığa namizədlər və onların tərəfdarları ərazini tərk etməkdən imtina edərək, onların qarşısına MSK sədri Məzahir Pənahovun çıxmasını tələb ediblər.

Bir müddət sonra əraziyə onlarla polis gəlib, onlar da etirazçılardan əraziləri azad etmələrini tələb ediblər. Tələbləri qulaqardına vurulduqda, onlar qanunsuz aksiyanı dağıtmağa və üzvlərini saxlamağa başlayıblar.

Saxlanılanların hamısı hadisə yerinə gətirilən avtobuslara mindirilib.

* * *20:52

Bir qrup deputatlığa namizəd Azərbaycan Mərkəzi Seçki Komissiyasının (MSK) binası qarşısında qanunsuz etiraz aksiyası keçirməyə cəhd edib.

Aksiyada 10 saylı Binəqədi Üçüncü Dairəsindən deputatlığa namizəd Rəbiyə Məmmədova, Müsavat partiyasından deputatlığa namizəd Elman Quliyev və başqaları iştirak ediblər.

Daxili İşlər Nazirliyinin Mətbuat xidmətindən saytımıza verilən məlumata görə, polis əməkdaşları namizədlərə aksiyanın qanunsuz olduğu barədə xəbərdarlıq edərək ərazini boşaltmalarını xahiş ediblər.

Aksiyaçılar arasında saxlanılanlar olmayıb.

Rubrika.Az

Facebook-da paylaş