"Təhsil Nazirliyi bu ilin büdcəsindən məktəblərin təmiri, maddi-texniki təminatın möhkəmləndirilməsi və dezinfeksiyaedici tədbirlərinin maliyyələşdirilməsinə dair ayrılmış vəsaitin məbləğini açıqlasın”.

Rubrika.Az Qaynarinfo-ya istiandla xəbər verir ki, bunu iqtisadçı ekspert Qubad İbadoğlu koronavirusla əlaqədar məktəblərin bağlanmasından sonra atılacaq addımlardan danışarkən deyib.

O, qeyd edib ki, məktəblərin müvəqqəti qapadılması təşəbbüsünü irəli sürüb ictimailəşdirməklə 2 dəyişikliyə nail olmağı hədəfləmişik:

"Birincisi, uşaqların və gənclərin sağlamlığına olan təhlükələri və riskləri azaltmaq, ikincisi, təlim-təhsil müəssisələrində sanitar-epidomoloji infrastrukturun yenidən qurulması və dezinfeksiyasını həyata keçirmək üçün məktəblərə əlavə vaxt qazandırmaq. Nazirlər Kabinetinin 02 Mart 2020-ci il tarixli "Azərbaycan Respublikasının ərazisində fəaliyyət göstərən bütün təhsil müəssisələrində tədris və təlim-tərbiyə prosesinin dayandırılması barədə” sərəncamının 3-cü hissəsində aidiyyəti dövlət orqanları və qurumlarına tapşırılır ki, təhsil müəssisələrində tibbi-profilaktik və dezinfeksiyaedici tədbirlərin davam etdirilməsini təmin etsinlər.

İstərdim ki, 2020-ci il üçün dövlət büdcəsindən "qazıb çıxartdığım" təhsil müəssisələrinin təmiri və tikintisi, eləcə də malların (iş və xidmətlərin) satınalınmasına nə qədər vəsaitin nəzərdə tutulması barədə məlumatlı olasınız. Cari il üçün "Təhsil” büdcəsi 3 milyard 155 milyon 800 min manat müəyyənləşdirilib ki, bu da ötən ilin büdcəsinin gözlənilən icrasından 912,8 milyon manat çoxdur. Bu ilin təhsil büdcəsi əvvəlki illə müqayisədə 40,7 faiz artımla proqnozlaşdırılıb. 2020-ci ilin büdcəsində "Təhsil” bölməsinin inzibati təsnifat üzrə strukturunda nəzərdə tutulmuş xərclərin 68,8 faizi və ya 2188,67 milyon manatı Təhsil Nazirliyinin payına düşür. Dövlət sifarişi ilə ali təhsilin maliyyələşdirilməsi və təhsil sahəsində digər tədbirlərə nəzərdə tutulmuş vəsaitin bölmə üzrə payı 10,8 faiz, yerli icra hakimiyyəti orqanları üzrə proqnozlaşdırılmış vəsaitin xüsusi çəkisi 10,3 faiz təşkil edəcək”.

Qubad İbadoğlu 2020-ci ilin büdcəsində dövlət əsaslı vəsait qoyuluşu üzrə təhsil müəssisələrinin təmiri və tikintisi üçün 256,3 mln. manat vəsaitin ayrıldığını vurğulayıb:

"Maddi-texniki təminatın möhkəmləndirilməsi və əsaslı təmir üçün Təhsil Nazirliyinə əlavə 10 milyon manat da ayrılıb. Bundan əlavə "Təhsil” büdcəsindən 653,4 milyon manat da malların (iş və xidmətlərin) satınalınmasına proznozlaşdırılıb. Təhsil Nazirliyinin tabeçiliyində olan tədris müəssisələrində malların (iş və xidmətlərin) satınalınmasına, təhsil müəssisələrinin təmiri və tikintisinə, eləcə də maddi-texniki təminatın möhkəmləndirilməsinə bütövlükdə 919,7 milyon manat nəzərdə tutulub. Göründüyü kimi, məktəblərdə sanitar-su qovşağının, tualetlərin təmiri, eləcə də tibbi-profilaktik və dezinfeksiyaedici tədbirlərinin maliyyələşdirilməsi üçün kifayət qədər büdcə vəsaiti proqnozlaşdıırlıb. Büdcədən ayrılmış vəsaitlərin son təyinatı üzrə düzgün xərclənməsi həm də valideynlərin və ictimaiyyətin bu prosesə vətəndaş nəzarətinin təşkilindən asılıdır”.

Qubad İbadoğlu təklif edib ki, Təhsil Nazirliyi bu ilin büdcəsindən məktəblərin təmiri və maddi-texniki təminatın möhkəmləndirilməsi, eləcə də tibbi-profilaktik və dezinfeksiyaedici tədbirlərinin maliyyələşdirilməsi üçün ayrılmış vəsaitin məbləğini açıqlasın:

"Eyni zamanda valideynlərin rəsmi və qeyri-rəsmi birlikləri bu həftə ərzində məktəbləri nəzarətdə saxlasın ki, Nazirlər Kabinetinin sərəncamında nəzərdə tutulan tibbi-profilaktik və dezinfeksiyaedici tədbirləri həyata keçirildiyinə əmin ola bilək”.

Rubrika.Az

Facebook-da paylaş