Sabiq nazirin siyasətdə uğur qazana bilməməsinin səbəbləri

Sabiq səhiyyə naziri Əli İnsanovun həbsdən çıxmasının bir ili yaxınlaşır. Ötən il Novruz bayramında prezident İlham Əliyevin əfv fərmanı ilə azadlığa buraxılan Əli İnsanov elə həbsxana önündəcə sərt bəyanatlarla çıxış etmiş və siyasi fəaliyyətlə məşğul olacağını bildirmişdi. Bir müddət hakimiyyətə qarşı sərt açıqlamalar və müsahibələri ilə ictimai marağı özünə cəlb edən sabiq nazir 2019-cu ilin 24 noyabrında Haqq Ədalət Partiyası adlı siyasi partiya yaratdığını elan etdi. Siyasi həmfikirləri ilə birlikdə toplantı keçirən Əli İnsanov Haqq Ədalət Partiyasının təşkilat komitəsinin formalaşdırıldığını da bəyan elədi. Təşkilat komitəsində Əli İnsanovun özündən və sabiq səfir İsfəndiyar Vahabzadədən başqa cəmiyyətdə tanınmış heç kim yox idi.

Partiyanı elan etdikdən bir müddət sonra Əli İnsanov ənənəvi müxalifət partiyaları Müsavat və AXCP ilə birgə toplantılara, müzakirələrə qatıldı. Müsavat Partiyasının qərargahında Müsavat başqanı Arif Hacılının təşəbbüsü ilə baş tutan dəyirmi masada da Əli İnsanov müxalifət partiyasının sədri qismində iştirak və çıxış etdi.

Yuxarıda xatırlatdığımız kimi, Əli İnsanovun həbsdən çıxması və partiya elan etməsindən xeyli vaxt keçir. Lakin belə görünür ki, siyasətdə iddiaları səviyyəsində uğur qazana bilmir. Əli İnsanovun müxalifətçi obrazında siyasətdə uğur qazana bilməməsinin səbəbləri nədir?

AĞ Partiya sədrinin müavini, siyasi ekspert Əhəd Məmmədli bildirdi ki, İnsanovdan daha güclü performans gözlənilirdi, lakin sabiq nazir partiya qurmaqda tələsdi. Məlum zəif tərkiblə partiya qurmaq səhv addım idi. O tərkiblə qurulan partiyanın siyasətdə uğur qazanması mümkün deyildi: “Əli İnsanovun daha bir taktiki səhvi tez-tez Qərbə müraciət edərək ”Böyük Amerika məni azad etdi" tipli ifadələri işlətməsi və dolayısı ilə ABŞ-a siyasi xidmətini təklif etməsi idi. Hesab edirəm ki, bir ciddi siyasətçi üçün o qədər də uğurlu ifadə deyildi. Hansısa rus yazıçısına istinad edib sultan Abdulhəmid xanı diktator adlandırması da yanlış idi. Rus istinadlarına əsaslanıb bir Türk rəhbərini diktator adlandırmaq yolverilməzdir və cəmiyyətdə müsbət qarşılanmazdı. Türkün, müsəlmanın düşmənlərınə böyük zərbələr endirən bir rəhbərə diktator demək olmaz. Bu çox yanlış bir fikir idi. Hesab edirəm ki, bu cür siyasəti davam etsə ciddi bir uğur qazanacağı gözlənilmir. Böyük Amerika, Avropa, Çin və ya hansısa başqa bir dövlət deyil, böyük Azərbaycan xalqıdır. Həmçinin çıxışının birində adamın traybalist təfəkküründən də qurtulmamasını sezdim. Azərbaycan siyasəti iqtidarlı-müxalifətli traybalist, tayfabazlıq, yerlibazlıq təfəkküründən qurtulmalıdır.

Əli İnsanovun ehtimal edilən siyasi uğura nail ola bilməməsinin səbəblərindən biri də cəmiyyətdə onun 1993-cü ildən mövcud olan hakimiyyətin qurulmasında müstəsna xidmətlərinin unudulmamasıdır.

Eyni zamanda cəmiyyətdə belə bir rəy formalaşdı ki, Əli İnsanov 14 il həbsxanada saxlanmasının qisasını almaq arzusu ilə alışıb yanır, onun bütün məqsədi sadəcə qisasını almaqdır. Cəmiyyətdə yaranan bu rəy də sabiq nazirin siyasətdə uğurlu nəticələr əldə etməsinə mane olan faktorlardandır".

Qeyd etdiyimiz faktorlara görə, sosial şəbəkələrdə sabiq nazirə qarşı açıq tənqid mövqeyi vaxtaşırı müşahidə edilir. İqtidara və müxalifətə münasibətindən asılı olmayaraq, hələ də bir çoxları adı korrupsiya və rəqiblərinə qarşı amansız savaşda hallanan bu fiquru sərt tənqid edir.

Əli İnsanov həbsdən çıxandan sonra ilk açıqlamasında Qərbə yönəlik müsbət mesajlar verdi. Sonrakı dövrdə də bütün müsahibələrində qərbyönümlü mövqedə olduğunu bəyan edərək “Sizinlə işləməyə hazıram” mənasını daşıyan açıqlamalarla çıxış etdi. Lakin hələ Qərbdən-ABŞ-dan onun mesajlarına müsbət ciddi reaksiya verildiyi müşahidə olunmayıb. Sabiq nazirin qisasçılıq eşqi ilə yaşaması beynəlxalq təşkilatların da nəzərindən qaçmır".(musavat.com)

Rubrika.Az

Facebook-da paylaş