Prezident İlham Əliyev qaçqın və məcburi köçkünlər üçün dövlət tərəfindən tikilən evlərin çox zaman müəyyən məbləğ qarşılığında verildiyini və ya ümumiyyətlə kənar şəxslərə satıldığını bildirib və bununla "Qaçqınkom”un sabiq rəhbərinin korrupsiya ilə məşğul olduğuna işarə edib: "Bu yaxınlarda mənə məlumat verildi, - bir binada yaşayanların 20 faizi heç köçkün deyildi. Necə gəliblər oraya? Kim onları yerləşdirib? Kim onları qeydiyyata alıb? Dövlət orqanları. Nəyinsə müqabilində bunu ediblər".

Əslində Əli Həsənovun keçmiş fəaliyyətilə bağlı deyilənlər ictimaiyyətə çoxdan bəllidir və onun "Qaçqınkom"dan mənimsədiyi və ailə üzvləri tərəfindən xaricə daşıdığı milyonlarla vəsait çoxdan burnundan gətirilməli idi. Amma hələ ki, gətirilməyib. Rubrika.az yenisabah.az-a istinadla bildirir ki, Əli Həsənov 1998-2018-ci illərdə Qaçqınların və Məcburi Köçkünlərin İşləri üzrə Dövlət Komitəsinin sədri, 2018-2019-cu illərdə baş nazirin müavini olub, hazırda YAP sədrinin müavinidir. Hələ 2017-ci ildə Əli Həsənovun nəvəsi Nail Allahverdiyevin harınlıqdan törətdiyi qəza, nəticədə iki nəfərin ölümü və iki nəfərin yaralanması ciddi rezonans doğurmuşdu. Amma yüksək vəzifə sahibi olan babasının sayəsində iki il sonra azadlığa buraxıldı. Nail Allahverdiyevin bahalı avtomobillər kolleksiyası və yüksək sürət həvəskarı olduğu heç kimə sirr deyil.

Jurnalist Cavanşir Həsənlinin araşdırmasına görə, Nail Allahverdiyevin atası Elman Allahverdiyev də 2017-ci ildə Almaniyada milyonlarla avroya aldığı otellə bağlı Qərb mətbuatının "qəhrəmanına" çevrilmişdi. Mətbuatda onu Əli Həsənovun kürəkəni kimi təqdim edirlər, amma atasının adı qrafasında keçmiş "Qaçqınkom" sədrinin adı yazılıb..

O hələ Əli Həsənov qaçqın çörəyini görməmişcəsinə yeyəndə Almaniyanın Hamburq şəhərində ilk şirkətini - LOHIMEX GMBH-ni 2014-cü ildə qeydiyyatdan keçirib. Bu şirkət hazırda logistika sahəsində fəaliyyət göstərir. Elman Allahverdiyev 2015-ci ilin martında Almaniyanın Lüneburg ədliyyəsində GLORIOUS HOTELS RESORTS GMBH şirkətini qeydiyyatdan keçirərək Bad Bevensen kiçik kurort şəhərində, Lerchenweg 1-də yerləşən və bir neçə miyon avro dəyərində olan Kieferneck otelini satın almışdı. 2016-cı il maliyyə ilini şirkət 300 min avro zərər vurduqdan sonra Elman Allahverdiyev oteli dəyər-dəyməzinə satıb. Qaçqınların pulu idi, nə vecinə... C.Həsənli yazır ki, Azərbaycanda da Elman Allahverdiyevin və Əli Həsənovun qızı Roza Allahverdiyevanın çoxşaxəli biznesi var və bu şirkətlər vasitəsilə keçmiş "Qaçqınkom" sədrinin əziz xələfləri hələ də büdcəyə yol tapırlar.

Məsələn, Elman Allahverdiyevin 2004-cü ildə təsis etdiyi "GARDENİA" MƏHDUD MƏSULİYYƏTLİ CƏMİYYƏTİ (hüquqi ünvanı AZ1069, BAKI ŞƏHƏRİ NƏRİMANOV RAYONU, YUSİF VƏZİR ÇƏMƏNZƏMİNLİ, ev 134) yaşıllaşdırma, suvarma sistemlərinin quraşdırılması və satışı sahəsində ixtisaslaşıb, Hollandiya, İtaliya, Almaniya, İsrail, Türkiyə, Rusiyadan müvafiq sistemlərin, gübrələrin, dekorativ ağac və güllərin idxalını həyata keçirir. Şirkət Əli Həsənovun nüfuzu sayəsində iri dövlət sifarişlərindən külli-miqdarda vəsait əldə edib.
Hazırda paytaxtın Atatürk prospektində, Novxanıda və Sumqayıtda hektarlarla ərazidə yaşıllaşdırma sahələri və 3 satış mərkəzi var. Onun 2007-ci ilin aprelin 3-də təsis etdiyi "SEMARİ" MƏHDUD MƏSULİYYƏTLİ CƏMİYYƏTİ də (hüquqi ünvanı YASAMAL RAYONU, MƏHƏMMƏD İBN HİNDUŞAH, ev 618 MƏH.10, m. 16) bitkiçilik və yaşıllaşdırma sahəsində fəaliyyət göstərir. Elman Allahverdiyevin təsiçiliyi ilə daha bir şirkət - "C.T.S. AUTOMOTİV" MƏHDUD MƏSULİYYƏTLİ CƏMİYYƏTİ 2006-cı ilin iyulunda qeydiyyatdan keçib, hüquqi ünvanı BAKI ŞƏHƏRİ YASAMAL RAYONU, MƏHƏMMƏD İBN HİNDUŞAH, ev 618 MƏH.10, m. 16. Əli Həsənovun qızı ROZA ƏLİ qızı ALLAHVERDİYEVA "GARDENİA" MMC-nin maliyyə direktorudur. Əli Həsənovun qızı həmçinin 2016--cı ilin mayında qeydiyyatdan keçmiş "GOLDEN HOUSE" MƏNZİL TİKİNTİ KOOPERATİVİnin təsisçisidir. Şirkət tikinti sektorunda fəaliyyət göstərir və dövlət sifarişlərinin icrasında iştirak edir. Bunlar hələ bəlli olanlardır.

Rubrika.Az

Facebook-da paylaş