Bu yaxınlarda Prezidentin fərmanı ilə Elnur Əliyev İqtisadiyyat nazirinin müavini təyin olundu. Bütün karyera yüksəlişi Mikayıl Cabbarovla bağlı olan E.Əliyevin sonunda arzusunda olduğu yüksək posta təyinatı münasibətilə bir-iki kəlmə də mən yazmaq qərarına gəldim. Bəlkə də bunu gecikmiş təbrik hesab edə də bilərlər, amma əsas olanı təbrikin səmimi olmasıdır.

Elnur Əliyevi indi təbrik edənlər daha çoxdur, özü də daha böyük dairələrdən. Amma bir qələm əhli olaraq mən də öz köhnə dostumu kutlamaq istədim. Çünki,uzun illər onun haqqında çox yazılar yazmışam, ünvanına çox tənqidlər səsləndirmişəm. Təqdirə layiq işlərini də hər zaman xüsusilə qeyd etmişəm. Bu gün E.Əliyev karyerasında hələ ki, ən yüksək postdadır. İndi təbrik edirəm ki, sonra yazanda məni unutqanlıqda günahlandırmasın. Heç kefini,əhvalını da soruşmağa ehtiyac duymuram. Dediyim kimi indi onun əhvalını gündə on dəfə soruşanlar daha çoxdur. Mən indiyə qədər də heç vaxt onun kefini soruşmamışam, bəlkə də dəfələrlə keyfinə soğan da doğramışam. Amma, etiraf edək ki, bu gün çevrəsində dolananlardan daha çox onun iş fəaliyyəti haqqında mən yazmışam. Atalar demişkən, əsl dost tərifləyən deyil,səhvləri üzə deyəndir!

Neyniyim,lənət olsun içimdəki məmur sevgisinə. Bu dəfə də fikirləşdim ki, növbəti görəvində köhnə dostumu unutmayım. Amma açıq etitraf edim ki, bir vaxtlar siz indiki Təhsil naziri Ceyhun Bayramov haqqında olan fikirlərinizdə haqlı olmusunuz. Bunu gec də olsa təqdirəlayiq qiymətləndirmək yerinə düşər. İnanıram ki, cənab Prezidentin fərmanında mühüm rol oynayan, bu təqdimatı verən hörmətli Mikayıl müəllimin də növbəti etimadını doğruldacaqsınız. İndiyə qədər bu etimadları necə doğrultduğunuzu əlahəzrət tarixin ixtiyarına buraxaq. Amma,bundan sonra keçmişdəki səhvlər yəqin ki, olmayacaq. Ümid edirəm ki, hər zaman yaxşı xəbərlər eşidəcək, müsbət əməllərinizi işıqlandıracağam.

Bir daha təbrik edirəm. Hesab edirəm ki, bir qələm əhli olaraq tənqid etdiyim kimi təbrik də etmək borcumdur. İşinizdə uğurlar, İnanıram ki,məni bir daha şəxsinizi tənqid etmək zorunda buraxmayacaqsınız.

Nicat Mahmudov
Rubrika.Az 

Facebook-da paylaş