"Bizə Şuşa lazım idimi? Əgər lazım idisə, niyə belə vəziyyətdə idi? Bizə bu "azad edilmiş ərazilər” lazım idimi? Əgər lazım idisə, niyə?.. İndi deyirlər ki, niyə "Qarabağ prezidenti"nin (keçmiş qondarma "dqr”in "lideri” Araik Arutyunyan nəzərdə tutulur – red.) inauqurasiyası Şuşada keçirilib. Təsəvvür edin, 30 il bütün erməni elitası hesab edirdi ki, Şuşa Dağlıq Qarabağ şəhəridir və "Qarabağ prezidenti"nin orada tədbir keçirmək haqqı yoxdur. Bax, Şuşa şəhəri onda - fikirlərdə olmayanda satılmışdı. Əgər beyinlərdə olsaydı, belə sual ortaya çıxmazdı. Deyirlər, Şuşanı satmışıq. Şuşanı kim satıb? Əgər satmışıqsa, son 30 il ərzində satmışıq. Ona görə ki, Şuşa bədbəxt, boz şəhər idi”.

Bu fikirləri Ermənistan baş naziri Nikol Paşinyan dünən parlamentdə məğlub olmalarının səbəbləri haqqında etdiyi çıxışında bildirib. Əslində isə Paşinyanın dediklərini düşmən tərəfinin Qarabağ münaqişəsi ilə bağlı ilk ciddi etirafı kimi də qiymətləndirmək olar. Çünki Qarabağ münaqişəsi regionda ən çox ermənilərə zərbə vurdu. Belə ki, 90-cı illərlə müqayisədə əhalisinin sayı rəsmən 700 min nəfər azalan Ermənistan siyasi və iqtisadi baxımdan çökmüş vəziyyətə düşdü. Ən əsası isə münaqişə vəziyyətindən istifadə edən Rusiya Ermənistanı özündən tam asılı bir ölkəyə çevirdi və böyük dövlət şirkətlərini ələ keçirdi.

Məhz bütün bunların nəticəsində Cənubi Qafqaz ölkələri arasında Ermənistan miqrasiyaya görə də lider oldu. Təkcə bir rəqəm əhalinin hansı səviyyədə Ermənistandan köçməsini əyani nümayiş etdirir – 44 günlük davam edən hərbi əməliyyatlar zamanı işğalçı ölkənin rəsmiləri təkcə Rusiyada 150 min çağırışçının olduğunu bildirdi.


XX əsrin ən qəddar və vəhşi insanlıq faciəsi sayılan Xocalı soyqırımının yaşandığı Qarabağ münaqişəsi həm də Ermənistanı regiondakı layihələrdən tam təcrid olunmasına gətirib çıxardı. İndiyə kimi Cənubi Qafqazda mövcud olan konyukturadan isə ən çox yararlanan Gürcüstan oldu. Halbuki regional layihələr üçün Ermənistan ərazisi iqtisadi baxımdan Gürcüstanla müqayisədə daha səmərəli idi.


Belə bir ağır sosial-iqtisadi durumda yaşayan Ermənistanın işğal etdiyi Azərbaycan şəhər və rayonlarında Paşinyanın dediyi vəziyyətin olması tam təbiidir. Belə ki, mövcud beynəlxalq sərhədləri daxilində normal iqtisadiyyat qurmaq imkanı olmayan rəsmi Yerevanın işğal etdiyi ərazilərimizdən səmərəli istifadə edəcəyini gözləmək sadəlövhlük olardı. Ona görə də erməni tərəfi Azərbaycanın işğal olunmuş torpaqlarında hər cür barbarlığa əl atır, ibtidai-icma quruluşunun qaydalarına uyğun olaraq təbiətini məhv edirdi. Bu baxımdan Paşinyanın sözügedən fikirləri Ermənistanın hələ də davam etdirdiyi siyasətin vəziyyətə adekvat olmadığını göstərdi.


Azərbaycan başda olmaqla qonşu Türkiyə və Gürcüstana da ərazi iddiaları ilə çıxış edən Ermənistanın düşdüyü ağır sosial-iqtisadi vəziyyətin yaxın perspektivdə yaxşılaşacağına ümid də çox azdır. Çünki Ermənistan cəmiyyəti və siyasətində qonşu xalqlara qarşı düşmənçilik meylləri hələ də ön plandadır. Faşizm ideologiyasının hakim olduğu Ermənistan cəmiyyətinin reallıqlarla yaşaması lazımdır. 44 günlük döyüşləri bu baxımdan Ermənistan cəmiyyətinin sağalması üçün bir imkan kimi qiymətləndirmək olar…(qaynarinfo)

Rubrika.Az

Facebook-da paylaş