"Türkiyə bizə qardaş ölkədir, İsrail isə bizim strateji tərəfdaşımızdır. Biz istəyirik ki, bizim dostlarımız bir-biriləri ilə dost olsunlar".

Azərbaycan prezidentinin köməkçisi Hikmət Hacıyev belə deyib. Bu barədə İsrailin “israelhayom.com” saytı yazır və qeyd edir ki, Hikmət Hacıyev Azərbaycanın xarici siyasətinin müəyyənləşməsində mühüm rol oynayır.

Hikmət Hacıyev sayta müsahibəsində bildirib ki, rəsmi Bakı Azərbaycan-İsrail-Türkiyə görüşünün keçirilməsinə ev sahibliyi etməyə hazırdır.

Saytın əməkdaşının “İsrail ilə Türkiyə arasındakı münasibətlərdə son vaxtlar müşahidə olunan inkişaf Prezident Əliyevin vasitəçiliyindən irəli gəlirmi?” sualına cavab olaraq H. Hacıyev deyib: “Biz inanırıq ki, İsrail və Türkiyə eyni maraqları bölüşür. Biz ona da inanırıq ki, bu iki ölkə arasındakı əməkdaşlıq bu marağa söykənir. Azərbaycan bu münasibətlərin inkişafı üçün əlindən gələn hər şeyi edəcək”.

Co Baydenin qondarma erməni genosidini tanıması məsələsinə toxunan H. Hacıyev deyib ki, bu qərar tarixi səhvdir və heç bir şey Holokostla müqayisə oluna bilməz.

“Vaşinqtondakı yəhudi lobbisi ilə əlaqəniz varmı?” sualına cavab verən prezidentin köməkçisi bildirib ki, biz təkcə Amerikada yaşayan yəhudilərlə deyil, dünyanın hər yerində olan yəhudilərlə dostluq edirik: “ABŞ-dakı yəhudi təşkilatları Azərbaycanın səsinin dünyada duyulmasında bizə yaxından kömək edir. Biz Cənubi Qafqazda sülh və sabitlik yaratmağa çalışırıq. Bu bölgədə yeni əməkdaşlıq sahələri qururuq”.

Təbii ki, müsahibə zamanı ,“Niyə Azərbaycanın İsraildə səfirliyi yoxdur”, sualı da səslənir. Bu suala cavab olaraq H. Hacıyev söyləyir ki, səfirlikləri olan ölkələr çoxdur, ancaq onların çoxu İsrail-Azərbaycan münasibətləri səviyyəsinə qibtə ilə baxırlar.

Prezidentin köməkçisi Qarabağda başlanacaq yenidənqurma işlərinə də toxunub: "İsrail şirkətləri ilə əlaqə qururuq və hökumətlərarası əlaqələri dərinləşdiririk. İsrail şirkətlərinin bizə kömək etmə potensialı böyükdür. İsrail şirkətlərinin Azərbaycanda ağıllı şəhərlər salmaqda və su sektorunda kömək etməsində maraqlıyıq".

Müsahibənin sonunda H. Hacıyev bir daha İsrail-Azərbaycan dostluğu məsələsinə toxunur: “Azərbaycan və İsrail xalqları tarixən dost olub. İsrail xalqı həmişə sülhün olmaması üzündən əziyyət çəkib. Onlara sülh diləyirik. Bu qədim xalq bizim dostumuzdur və biz ona davamlı uğurlar arzulayırıq”.

Qeyd edək ki, Azərbaycan prezidentinin Türkiyə ilə İsrail arasında dostluq körpüsü yaratmaq cəhdləri haqqında istərsə Türkiyə, istərsə də İsrail mediasında son aylarda müxtəlif materiallar gedib. H.Hacıyevin müsahibəsi bir daha göstərir ki, bu istiqamətdə işlər davam edir. İsrail tərəfi də Azərbaycanın bu cəhdini yüksək dəyərləndirir və Türkiyə ilə anlaşmağa meyllidir.

Rubrika.Az

Facebook-da paylaş