Biləsuvarda dayısını öldürən 16 yaşlı Röyal Qubadlının cinayət işi üzrə ibtidai istintaq başa çatıb.

Rubrika.Az-ın lent.az-a istinadən məlumatına görə, cinayət işi üzrə toplanan materiallar baxılması üçün Lənkəran Ağır Cinayətlər Məhkəməsinə göndərilib.

İş hakim Oruc Cəlilovun icraatına verilib. Şübəhli şəxs barəsində Cinayət Məcəlləsinin 120.2.4-cü (xüsusi amansızlıqla və ya ümumi təhlükəli üsulla adam öldürmə) maddəsilə ittiham elan olunub.

Qeyd edək ki, bu il aprelin 2-də saat 13 radələrində Biləsuvar şəhər sakini 44 yaşlı Vüqar Haxverən oğlu Hüseynovun yaşadığı evdə bıçaqlanaraq öldürülməsi barədə rayon prokurorluğuna məlumat daxil olub.

Cinayət prosessual qanunvericiliyinin tələblərinə əsasən, prokurorluq əməkdaşları tərəfindən məhkəmə-tibb ekspertinin iştirakı ilə hadisə yerinə və meyitə baxış keçirilib, digər prosessual hərəkətlər yerinə yetirilib.

Aparılmış ilkin araşdırmalarla zərərçəkmiş şəxsin bacısı oğlu 16 yaşlı Röyal Şahin oğlu Qubadlının şəxsi münasibətlər zəminində aralarında yaranmış mübahisə zamanı bıçaqla xəsarətlər yetirərək Vüqar Hüseynovu qəsdən öldürməsinə əsaslı şübhələr müəyyən edilib.

Röyal Qubadlı şübhəli şəxs qismində tutularaq istintaqa cəlb edilib.

Rubrika.Az

Facebook-da paylaş