CAVANŞİR PAŞAZADƏYƏ QARŞI NÖQTƏ, VERGÜL TƏXRİBATI — DİQQƏTLİ OLUN CƏNABLAR ELƏ CÜMLƏLƏR VAR Kİ, SONUNA ÜÇ NÖQTƏ QOYMAQ LAZIMDIR...
Allah bizim deputatlardan razı olsun, camaatı heç vaxt yaddan çıxartmırlar. Düzdür, imanımızı yandırıb deyə bilmərik ki, tez-tez onlarla görüşə gedib problemlərini həll edirlər, yaxud da parlamentdə odlu-alovlu çıxışlar edərək bahalaşmaya, Tarif şurasının məzələnmələrinə qarşı çıxırlar. Baxmayaraq ki, parlament sözünün mənası danışmaqdır, bizim deputatlar orda əsla belə sözlər danışmazlar. Amma, sosial şəbəkələrdə öz çıxışları ilə seçicilərinə əyləncəli anlar yaşadırlar. Elə həftə olmasın ki, hansısa deputatın hikmətli kəlamları xalqımızın kefini açmasın, dodağına gülüş qondurmasın. Hətta xalqımızın baməzə kəsimi buna o qədər öyrənib ki, hansısa deputat hikmət xəzinəsindən bir-iki abzas buraxmasa darıxırlar. Söz də ki, quş kimi bir şeydir, dedin sənin deyil, uçub gedir.
Bu gün də sosial şəbəkələr deputat Cavanşir Paşazadənin yazdığı status ətrafında yaranan qalmaqalla çalxalanıb. Hörmətli deputatın statusunda bir neçə qrammatik səhv tutan qələm əhli əsib-coşur ki, bəs niyə Cavanşir müəllim respublika sözündə “R” hərfini kiçik hərflə yazıb, bütün cümhuriyyət dəyərlərimizi yerlə bir edib. Yaxud “Azərbaycan” yerinə “Azarbaycan” yazaraq azarkeşləri təhqir edib. Vallah, adam bilmir neyləsin. Bu yaxa cıranların çoxu respublika sözünü böyük hərflərlə yazaraq altını üstünə çevirənlərə qarşı qıkını belə çıxara bilməyənlərdir. Hələ də “da, də”-nin bitişik, yoxsa ayrı yazıldığını öyrənə bilməyənlər Paşazadənin statusundakı bir neçə səhvi milli ədəbiyyatımızın süqutu kimi tirajlayırlar.
Əvvəla, mən o statusun həqiqətən də deputat tərəfindən yazıldığına inanmıram. Hər halda bu barədə açıqlama verildi. Burada söhbət heç də nöqtə-vergüldən getmir, necə deyərlər "vnimatelni" olmaqdan gedir. Cavanşir müəllimin qələm əhlinə, xüsusilə jurnalistlərə qarşı olan xoş münasibətinin (məsələnin şəxsimə heç bir aidiyyatı yoxdur) dəfələrlə şahidi olmuşam. Onlarla media mənsublarına təmənnasız köməyini də görmüşəm, xeyir-şərində fəal iştirakının da şahidi olmuşam. Nədənsə bütün bunları görməzdən gələnlər nöqtə-vergül davası edirlər. Hər halda Cavanşir müəllim sözü quş kimi uçurmayıb ki, günlərlə müzakirə oluna. Köməkçinin və yaxud açıqlamada bildirilidiyi kimi sürücünün bir-iki hərflik xətasıdır ki, onu da anındaca düzəltmək mümkündür. O səbəbdən Cavanşir müəllimin statusundakı bir-iki hərflik səhvi əldə bayraq edən həriflərə demək istəyirəm ki, cümlənizə nöqtə qoyanda diqqətli olun. Elə cümlələr var ki, sonuna 3 nöqtə qoymaq lazımdır...
Nicat Mahmudov
Rubrika.Az
Facebook-da paylaş
