Müstəqillik tariximizin elə bir mərhələsi yoxdur ki, iqtisadi inkişafımızın, tərəqqimizin flaqmanı kimi SOCAR ön planda olmasın. Dünyada qara qızıl ölkəsi kimi tanınan Azərbaycanın bir nömrəli neft şirkəti Ulu öndərin əsasını qoyduğu strategiyanın uğurlu tətbiqi nəticəsində həm də ölkəmizin vizit kartına çevrilib. Bu gün SOCAR brendi dünyada həm də Azərbaycanın müsbət imici, inkişaf modelidir. Qardaş Türkiyədə, eləcə də Avropanın digər aparıcı ölkələrində reallaşdırılan böyük layihələr ölkəmizə təkcə maddi qazanc gətirməyib. Bu həm də Azərbaycanın neft sənayesində qlobal gücə çevrilməsi, dövlətimizə siyasi dividentlər qazanılması baxımından böyük əhəmiyyət daşıyır. 

Hər bir uğurun arxasında peşəkar idarəçilik, gərgin əmək dayanır. SOCAR Azərbaycanın bir nömrəli şirkəti kimi hər zaman diqqət mərkəzindədir. Təbii ki, neft ölkəsinin aparıcı şirkəti, iqtisadiyyatının məhək daşı olmağın da məsuliyyəti böyükdür. Tam əminliklə söyləmək olar ki, SOCAR rəhbərliyinin, şəxsən R.Abdullayevin idarəetmə modeli Azərbaycanın vizit kartı olan şirkətin bütün dünyada müsbət və son dərəcə müasir imicini formalaşdırıb. Məhz bunun nəticəsi olaraq Azərbaycan dünyada etibarlı iqtisadi tərəfdar, azad zona kimi tanınır. 

Uğurlar heç də hamını sevindirmir. Zəfər təntənəsi ilə torpaqlarını işğaldan azad edərək ərazi bütövlüyünü bərpa edən Azərbaycana qarşı total cəbhə açıldığı heç kimə sirr deyil. Təxribatlar, təhdidlər ara vermir, yerli və beynəlxalq araqarışdıranlar dinclik tapmırlar. Belə halda ölkənin əsas şirkətini, iqtisadi nəhəngini hədəfə almaq, ləkələmək, rəhbər heyəti haqqında dezinformasiyalar yazmaq təxribatçılar üçün prioritet təşkil edir. Bu gün R.Abdullayev və digər SOCAR rəhbərləri haqqında tirajlanan dezoların əsas hədəfi də budur-Azərbaycanın müsbət imicini ləkələmək, beynəlxalq layihələrə kölgə salmaq, dost ölkələrlə münasibətlərini zədələmək. Sirr deyil ki, qardaş Türkiyədə həyata keçirilən böyük layihələr çoxlarının yuxusuna haram qatıb. Hələ digər ölkələri demirik. Balaca Azərbaycanın reallaşdırdığı bu böyüklüyündə layihələri həzm etmək sizə asanmı gəlir? Güclü iqtisadiyyata malik olaraq gündən-günə qüdrətlənən bir ölkəni “demokratiya aşiqləri” sizcə sevə bilərmi? Əsla, çünki bu onların “demokratik tələblərinə” cavab vermir. Yeganə yol təxribatlar, dezinformasiyalar yolu ilə aranı qarışdırmağa qalır. 

Bir çox yerli və xarici KİV-lərdə yayılan qeyri-ciddi məlumatlar eyni "mətbəxdə" hazırlanır. SOCAR-ın bir korrupsiya yuvası, onun rəhbərlərinin isə az qala ölkənin yarısına nəzarət etdikləri barədə uydurulan nağıllar artıq çeynənmiş tikə kimi ürək bulandırır. Burada məqsəd təkcə R.Abdullayevi, yaxud digər SOCAR yetkililərini hədəfə almaq deyil, həm də dövlətin imicinə zərbə vurmaqdır. 

Baxın, Qazax neft bazasının direktoru Zeynal Əhmədov haqqında elə yalanlar yazırlar ki, heyrətlənməmək olmur. Adamın övladları heç vaxt Britaniyada olmayıblar, yazırlar ki, uşaqlarını Londonda oxutdurub, mülklər alıb. 4 mərtəbəli klinika, restoranlar, otellər və ağlınıza gələn bütün biznes obyektlərini adamın hesabına yazırlar. Amma bu obyektlər haradadır, özlərindən başqa bilən yoxdur. Bu əslində olduqca məkrli bir planın tərkib hissəsidir. Beləcə yalançı çete dövlətin beynəlxalq imicini zədələmək üçün bu qədər məkrli bir planı reallaşdırır. 

Azərbaycanda siyasi stabilliyi pozmağa hesablanan belə təxribatların qarşısı qətiyyətlə alınmalı, yalan məlumatlar yayan şəbəkə ifşa olunmalıdır. 

Yalançının evi yananda heç kim inanmasa da , yalançının evinin bir gün yanacağına hamı inanır. Bax onda kimlərin başından tüstü çıxacağını hamı görəcək!

Nicat Mahmudov 
Rubrika.Az 

Facebook-da paylaş