Henri Kuelyar Federal Təhqiqat Bürosu tərəfindən dindirilib, lakin təfərrüat açıqlanmır

ABŞ konqresmeni Henri Kuelyar Azərbaycanla əlaqələrdə şübhəli bilindiyi üçün Federal Təhqiqat Bürosu tərəfindən dindirilib. “Yeni Müsavat” xəbər verir ki, onun evində və ofisində axtarış aparılıb. FTX reydin yeni təfərrüatlarını açıqlayıb və bildirib ki, məhkəmə konqresmenə, onun xanımına və ən azı əməkdaşlarından birinə və onların Azərbaycan şirkətləri ilə əlaqələrinə dair sənədlərin əldə edilməsi üçün sanksiya verib.

Əsasən söhbət Kamal Öksüzlə bağlı sənədlərdən gedir. Hyustondan olan keçmiş iş adamı, 10 konqresmenin Bakı səfərinin maliyyələşdirilməsində Azərbaycanın rolu ilə bağlı Konqresə yalan söylədiyinə görə mühakimə olunub. Kuelyar və ya xanımının birbaşa istintaq obyektləri olub-olmadığı hələlik aydın deyil, lakin hakimiyyət Kuelyarın bəzi biznes- liderlər və xarici rəsmi şəxslərlə əlaqələrini, habelə Kuelyarın xarici şirkətlərə göstərə biləcəyi xidmətləri və ya hərəkətləri araşdırır.

Bu yaxınlara qədər Kuelyar Konqresdə Azərbaycan fraksiyasının həmsədri olub və çoxsaylı azərbaycanlı rəsmi şəxslərlə, o cümlədən ötən ilin noyabrında bir qrup azərbaycanlı parlamentari ilə görüşüb. Bundan öncə “CNN” bildirib ki, istintaqa Ədliyyə Nazirliyinin ictimai etika məsələləri üzrə bölməsi cəlb olunub, hökumətin ələ alınıb-alınmaması və rüşvətxorluq hallarını araşdırır. Kuelyarın ofisi və Ədliyyə Nazirliyinin nümayəndəsi şərh verməkdən imtina ediblər.

ABC News məsələdən xəbərdar olan mənbələrə istinadən xəbər verir ki, bu hadisə Azərbaycan və bir neçə ABŞ biznesmeni arasında əlaqələrə dair geniş federal təhqiqatla bağlıdır. Bu da bildirilir ki, Vaşinqtonda böyük jüri bu məsələni araşdırır, amma Kuelyarın bu təhqiqatın hədəfi olub-olmadığı məlum deyil.

FTB xəfiyyələri Kuelyarın Texas ştatının Laredo şəhərindəki evinin axtarılması barədə orderi təqdim edəndən sonra millət vəkilinin köməkçisi bildirib ki, konqresmen “istənilən təhqiqatla tam şəkildə əməkdaşlıq etməyə hazırdır”. Bu, ABŞ-dakı erməni diasporunun işi ola bilərmi? Amerikalı konqresmenlərin bir işi də müxtəlif ölkələrdən bəxşiş alıb iş görməkdir. Bunu etməyən konqresmen varmı?

Asim Mollazadə: Azərbaycanda həyata keçirilən sosial dəstək tədbirləri nümunəvi xarakter daşıyır

Asim Mollazadə: “Bunu erməni mənbələri belə yayıb ki, guya Azərbaycanla əlaqələrdə şübhəli bilindiyi üçün araşdırılıb, əslində...”

Azərbaycan Demokratik İslahatlar Partiyasının sədri, deputat Asim Mollazadə “Yeni Müsavat”a bildirdi ki, bu axtarışın Azərbaycanla əlaqəsi olması haqda erməni mənbələri məlumat yayıb: “Hansı səbəbdən axtarış olub, FTB tərəfindən hər hansı açıqlama yoxdur. Sadəcə, bunu ermənilər belə hədəf seçiblər ki, guya dindirmə Azərbaycanla əlaqəlidir. Kuelyar Azərbaycan dostluq qrupunun həmsədridir. Ona görə ermənilərə xidmət edən lobbi qrupları hücuma keçiblər. Ümumiyyətlə, erməni lobbisinə bağlı amerikalı konqresmenlər və senatorlar da bizə hücum edir, böhtan kampaniyası aparırlar”. A.Mollazadə qeyd etdi ki, ermənilərin Senatda və Konqresdə çox ciddi lobbiçiləri var: “Erməni diasporası və lobbi təşkilatları Azərbaycana qarşı müharibə aparır. Onlar peşəkar təşkilatlanıblar və siyasi korrupsiya üsullarından istifadə edirlər”.

Rubrika.Az

Facebook-da paylaş