“Sentyabrın 6-da “İTV”-də Ermənistan-Qarabağ mövzusunda geniş müsahibəmdə də deyilən məsələyə toxundum. Yəni söhbət ondan gedir ki, Ermənistan Qarabağ və Zəngəzurla bağlı taktikasını dəyişib. Onlar Zəngəzur mövzusundan ehtiyat edərək çalışırlar ki, bu prosesdən uzaqlaşsınlar. Ona görə də indi məqsəd odur ki, Ermənistan rəhbərliyi Qarabağ müzakirələrində birbaşa iştirak etməsin. Və orada qalan separatçı ünsürləri maliyyə və digər cəhətdən hansısa fondlar-filanlar vasitəsilə erməni diasporu dəstəkləsin. Bundan sonra Ermənistan deyəcək ki, artıq mən Azərbaycanın ərazi bütövlüyünü tanıyıram, onun Qarabağla bağlı daxili işlərinə qarışmıram. Bu işlərə qarışan Ermənistan dövləti ilə birbaşa rəsmi əlaqəsi olmayan erməni fondlarıdır. Azərbaycan iradlarını onlara bildirsin”.

RUBRİKA.AZ xəbər verir ki, bu fikirləri Moderator.az-a açıqlamasında axırıncı Brüssel danışıqlarındann sonrakı günlər Ermənistanın atəşkəsi pozmasının səbəblərindən bəhs edən keçmiş xarici işlər naziri Tofiq Zülfüqarov ifadə edib.

“Ancaq paralel olaraq Ermənistan çalışır ki, Rusiya hərbi kontingentinin müvəqqəti nəzarətində olan Azərbaycan ərazilərində bir təmas xətti formalaşdırsın və oradakı ermənilərin partizan hərəkatı şəklində bir müqaviməti təşkil edilsin. Yəni bölgədə yeni silahlı qarşıdurma baş versin ki, nəticə də müəyyən vasitəçilər cəlb edərək hansısa bir siyasi proses başlatsınlar. Və həmin siyasi prosesdə ermənilərə dəstək verən, onlara sponsorluq edən müəyyən dövlətlər birbaşa iştirak edərək Azərbaycana təzyiq göstərsinlər. Yəni ssenari təxminən bu istiqamətdə inkişaf edir. Rusiyada fəaliyyət göstərən erməni milyarder Vardanyanın gəlişi də məhz bu taktikaya işarə edir. Burada həm də məqsəd ondan ibarətdir ki, Azərbaycan guya Ermənistanın iştirakı olmadan birbaşa Qarabağdakı ermənilərlə münaqişəyə çəkilsin və gələcəkdə oradakı separatçı-terrorçu qurumla danışıqlara məcbur edilsin. Yekun nəticədə bu yolla Azərbaycan torpaqlarındakı ermənilər üçün hansısa statusa nail olsunlar”- açıqlamasının davamında bunları deyən sabiq baş diplomat “Necə hesab edirsiz, Ermənistan baş naziri N.Paşinyanın atəşkəsin bilərəkdən pozulmasından birbaşa xəbəri var, yoxsa bu da Rusiya, yaxud Qərblə bağlı hansısa qüvvələrin təxribatıdır?” sualını belə cavablandırıb:

“Bilirsiz, atəşkəsi pozmaqla bir növ görüntü yaratmaq istəyirlər ki, məsələ bizlik deyil. Hələ Qarabağdakı separatçı rejimlə İrəvandakı hakimiyyət arasında ciddi küskünlüyü də istisna etmirəm. Yəni Ermənistan hər bir vəchlə sübut etməyə çalışır ki, məsələ bizlik deyil, gedin məsələni Xankəndindəkilərlə həll edin. Paşinyanın birbaşa məlumatı olub-olmadığını demək çətindir, amma bütün hallarda o da başa düşür ki, indiki mərhələdə Ermənistan hökumətinin birbaşa Qarabağdakı separatçılara dəstəyi dünya tərəfindən qəbul olunmur. Və bu, eyni zamanda təhlükə yaradır ki, Azərbaycan buna cavab olaraq Zəngəzurda əməliyyat keçirsin. Yaxud ən azı Zəngəzur dəhlizinin daha ciddi şəkildə danışıqların mövzusuna çevirsin. Bilirsiz ki, artıq bu istiqamətdə Azərbaycan tərəfinin bəyanatları da var”.

“O ki qaldı konkret atəşkəsin pozulmasına, bu hərbi əməliyyatların göstəricisi kimi yox, ermənilər bunu daha çox partizan müharibəsinin bir elementi kimi göstərmək niyyətindədirlər. Yəni geniş əməliyyatlar yox, amma Qarabağdakı ermənilərin silahlı müqaviməti kimi təqdim etməyə çalışırlar”- deyən həmsöhbətmiz “Axı son günlər atəşkəs əsasən Ermənistan istiqamətindən pozulur” fikrinə də münasibət ifadə edib.

“Ola bilər ki, bu, müvəqqəti hal olsun. Amma mən gözləyirəm ki, əsas məsələlər sərhəddən Qarabağ istiqamətinə keçəcək... Yəni dediyim kimi, sülhməramlıların nəzarəti altında olan zonanın sərhədində ermənilərin bir təmas xətti yaratmaq niyyətləri olacaq”- deyə politoloq vurğulayıb.

Rubrika.Az

Facebook-da paylaş