Azərbaycanın iqtisadi qüdrətinin artması ölkənin hər yerində olduğu kimi, işğaldan azad olunmuş torpaqlarımızda da geniş tikinti-quruculuq işlərinin aparılmasına imkan yaradıb. Artıq Qarabağ və Şərqi Zəngəzurda bərpa-quruculuq işləri geniş vüsət alıb. Bu yerlərdə həyatın əvvəlki məcrasına qaytarılması üçün sosial infrastruktur yaradılır, yeni yaşayış məskənləri salınır. Ərazilərin minadan təmizlənməsi, iş adamları üçün yaradılmış əlverişli investisiya mühiti bölgədə bir sıra sosial təşəbbüslərin irəli sürülməsinə də imkan yaradır. 

Milli İnkişaf İctimai Birliyinin Təşəbbüs qrupu tərəfindən irəli sürülmüş Heydərabad şəhəri layihəsi bu baxımdan diqqət çəkir.  Artıq Təşəbbüs qrupunun üzvləri tərəfindən Azərbaycan Respublikasının Prezidenti cənab İlham Əliyevə, birinci vitse-prezident Mehriban xanım Əliyevaya və Milli Məclisə Araz çayı boyunca, Füzuli və Zəngilan Beynəlxalq hava limanları ətrafında Ulu Öndərin şərəfinə çoxmilyonluq Heydərabad şəhərinin salınmasına razılıq və tikintisinə sərəncam verilməsi xahişi ilə müraciət ünvanlanıb.

Xatırladaq ki, gələn il ümummilli lider Heydər Əliyevin anadan olmasının 100 ili tamam olur. Prezident İlham Əliyevin məlum sərəncamı ilə 2023-cü il Azərbaycanda "Heydər Əliyev ili" elan olunub.

Milli İnkişaf İctimai Birliyinin sədri, iqtisad elmləri üzrə fəlsəfə doktoru, professor Arzuman Muradlı mətbuata verdiyi açıqlamasında qeyd edib ki, dünyaya səs sala biləcək belə bir investisiya layihəsinin əlverişli coğrafi mövqeyi, zəngin təbiəti, münbit və bərəkətli torpağı, saf havası olan Qarabağ ərazisində həyata keçirilməsinin xüsusi əhəmiyyəti vardır. Layihənin reallaşdırılması bütün dünya azərbaycanlılarının ürəyincə olar. Bu baxımdan çoxmilyonluq Heydərabad şəhərinin salınması ideyasını sosial sifariş adlandırmaq olar. Bununla, həm də dümənlərimizə bir daha bildirərik ku, biz milyonlarla burdayıq, bu yerlərin əbədi sahibiyik. 

Heydərabad şəhərinin tikintisinə sərancamın verilməsi Ümummilli Liderin 100 illik yubileyinə və "Heydər Əliyev ili"nə layiqli töhfə olar. A. Muradlı bildirib ki, müraciətdə Heydərabad şəhərində Ulu Öndərin irsinin öyrənilməsi üçün Elmi Tədqiqat İnstitutu, Heydər Əliyev Mərkəzi, mədəniyyət mərkəzləri, ali təhsil ocaqları açılsın, sənaye-istehsalat zonası yaradılması və s. məsələlər əksini tapıb. Onun fikrincə, təqribən 2500 kvadratkilometr ərazidə salınacaq şəhərdə iri sənaye müəssisələrinin, xidmət sahələrinin yaradılması, eyni zamanda, ərazinin turizmin inkişafı üçün cəlbediciliyi ölkə üzrə məşğulluğun təmin olunmasına və ümumi daxili məhsulun artmasına mühüm töhfələr verəcəkdir. "Müasir, dünya şəhərsalma standartlarına uyğun salınacaq çoxmilyonluq Heydərabad şəhərinin mərkəzində hər bir hərfi bir bina (hündürlüyü təxminən 100 metr) olmaq şərtilə QARABAĞ AZƏRBAYCANDIR! kompleksinin tikilməsi də müraciətdə əks olunub. Kompleksdə diplomatik nümayəndəliklər, beynəlxalq təşkilatların ofisləri, biznes, idman, ticarət, istirahət mərkəzləri, otellər yer almasını da təklif etmişik. Bu kompleks Heydərabad şəhərinin döyünən ürəyi və simvoluna çevrilməlidir. Onu da deyim ki, təkliflər paketində Heydərabad şəhərinin azad iqtisadi zona olması nəzərdə tutulub. Bu isə şəhərin beynəlxalq əhəmiyyətini yüksəldəcək".

Qeyd edək ki,  bu yaxınlarda"Milli İnkişaf" İctimai Birliyi tərəfindən "Qarabağda Heydərabad şəhəri" adlı məlumat kitabçası nəşr olunub. Burada Heydərabad şəhərinin Qarabağda tikilməsi ideyasının yaranma səbəbi, şəhərin ərazisi və tikintisi üçün şərait, şəhərin layihəsi, baş planı, dizaynı, maliyyə mənbələri, tarixi, siyasi, iqtisadi əhəmiyyəti, əhalinin məşğuliyyəti, şəhərin tikintisinə maneçilik törədən daxili və xarici qüvvələr və s. məsələlər öz əksini tapıb. 

Mirbağır Yaqubzadə,
Azərbaycan Jurnalistlər Birliyinin üzvü




Facebook-da paylaş