Ukraynanın Təhlükəsizlik Xidməti (SBU) Ukraynanın keçmiş müdafiə nazirinin müavinini hərbçilər üçün geyim forması alarkən təxminən 1 milyard qrivnanı mənimsədiyinə görə saxlayıb. Söhbət Vyaçeslav Şapovalovdan gedir.

RUBRİKA.AZ xəbər verir ki, bu barədə RBC-Ukrayna məlumat yayıb.

2023-cü il yanvarın sonunda Ukrayna Silahlı Qüvvələrinin maddi-texniki təminatına cavabdeh olan Şapovalov tutduğu vəzifədən istefa verib.

SBU-nun məlumatına görə, 2022-ci ildə o, tabeliyində olan şəxslərlə əlbir olaraq özəl şirkətdən təxminən 1 milyard qrivna dəyərində aşağı keyfiyyətli hərbi geyimlər alıb.

"Ukrayna Silahlı Qüvvələri qeyd olunan formadan istifadə edə bilməz, çünki o, gərgin döyüş əməliyyatları şəraitində soyuq mövsümdə istifadə üçün yararsızdır", - xüsusi xidmət orqanı qeyd edir.

Toplanmış materiallar əsasında Təhlükəsizlik Xidmətinin müstəntiqləri tərəfindən keçmiş nazir müavininə Ukrayna Cinayət Məcəlləsinin 191-ci maddəsinin 5-ci hissəsi (mənimsəmə, mənimsəmə və ya vəzifə səlahiyyətlərindən sui-istifadə etməklə əmlakı ələ keçirmə) 28-ci maddənin 2-ci hissəsi və 114-1-ci maddənin 1-ci hissəsi (Ukrayna Silahlı Qüvvələrinin və digər hərbi birləşmələrin qanuni fəaliyyətinə mane olma) ilə ittiham irəli sürülüb.

Onunla əlbir olan şəxsə - Müdafiə nazirliyinin dövlət satınalmaları Departamentinin keçmiş direktor vəzifəsini icra edənə də həmin maddələrlə ittiham irəli sürülüb.

Hazırda hər ikisi həbsdədir. Onları əmlakı müsadirə olunmaqla 12 ilədək müddətə azadlıqdan məhrum etmə cəzası gözləyir.

Xatırladaq ki, mətbuatda Ukrayna Müdafiə Nazirliyinin Ukrayna Silahlı Qüvvələri üçün ərzaq məhsullarını Kiyev supermarketlərindəki qiymətlərlə müqayisədə 2-3 dəfə baha qiymətə aldığı iddia edilən araşdırma dərc edilib.

Bundan sonra Müdafiə Nazirliyi SBU-ya müraciət edib və hərbçilər üçün satınalmalar zamanı şişirdilmiş qiymətlərlə bağlı qalmaqalla bağlı araşdırmaya başlayıb.
Yanvarın 24-də məlum olub ki, Ukrayna müdafiə nazirinin müavini Vyaçeslav Şapovalov istefa verib.

Yanvarın 25-də isə Müdafiə Nazirliyinin dövlət satınalmaları departamentinin direktoru Boqdan Xmelnitski də tutduğu vəzifədən azad edilib.

RUBRİKA.AZ

Facebook-da paylaş