Etiraf edək ki ,Azərbaycanda vətəndaşlar heç də bütün dövlət qurumlarının rəhbərlərinin qəbuluna düşə bilmirlər. Bir çox məmurların qəbuluna düşmək "Bəyin oğurlanması" filmində Səməndər Rzayevin dediyi kimi, həm qəliz, həm də ki vacibdir. Ancaq bizdə çox vaxtı dövlət idarəsinə giriş də arxa qapıdan olur, əsas qapı Çin səddi kimi keçilməz olur. Bu nə mərəzdirsə, belə məmurlar ucbatından qurulan iş sisteminin nə dövlətə, nə millətə xeyri dəyir. Lakin elə strukturlar da var ki, nümunəvi davranışını müşahidə edəndə, fəaliyyətinə baxanda adamın ürəyi açılır. Bax, onda "niyə hamıda elə deyil" sualını verirsən.



Axı o zaman ölkəmizdə məmur-vətəndaş münasibətləri yağ kimi gedərdi, heç bir şikayət olmazdı. Götürək elə İcbari Tibbi Sığorta üzrə Dövlət Agentliyini və onun İdarə Heyətinin sədri Zaur Əliyevi. Azərbaycan Prezidentinin sözün həqiqi mənasında daha bir uğurlu layihəsidir. Çünki fəaliyyətə başladığı gündən yalnız və yalnız icbari tibbi sığorta sisteminin təkmilləşməsi üçün çalışır. Siz indiyədək nə Zaur Əliyevin işindən şikayət eşidərsiniz, nə bir ittiham. Dövlət də ondan razıdır, ona görə ki üzünü xalqdan çevirməyib, qapısını bağlamayıb, vətəndaşdan qaçmır, onun sözünü eşidir, onunla görüşə gəlir.



O baxımdan İcbari Tibbi Sığorta üzrə Dövlət Agentliyi "arxa qapı" prinsipi ilə işləmir. Elə noyabrın 7-də hörmətli Zaur Əliyevin vətəndaşlarla daha bir görüşü oldu. Agentliyinin İdarə Heyətinin sədri üçün ən vacib iş məhz vətəndaş qəbulu və onu dinləmək idi. Ən gözəli isə bilirsinizmi nə idi? Jurnalist müşahidələrimiz göstərir ki, qəbula girənə qədər vətəndaşların üzündən həyəcan, nigaranlıq, intizar, narahatlıq yağırdı, az qala ağlamaq həddinə çatsınlar, amma Zaur Əliyevlə görüşdən çıxanda obrazlı desək, vur çatlasın, çal oynasın, xoşbəxtlik, sevinc göz yaşları var idi.



Çünki Agentliyin rəhbəri onun qəbuluna ümidlə gələn heç bir vətəndaşı əliboş yola salmamışdı, hər birinin problemi, müraciəti ilə bağlı ən yüksək səviyyədə tapşırıq vermiş, həllinə dərhal göstəriş vermişdi.
Ümumiyyətlə, İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev qəbul qrafikinə uyğun olaraq vətəndaşları həmişə qəbul edir. Vətəndaşların müraciətləri diqqətlə dinlənilir və araşdırılaraq qanunvericiliyə uyğun baxılması məqsədilə Agentliyin aidiyyəti struktur bölmələrinin rəhbərlərinə müvafiq tapşırıqlar verilir. Bu dəfə də Zaur Əliyevin qəbulundan çıxan vətəndaşlar bizimlə söhbət əsnasında razılıqlarını ifadə edirdilər. Onlar ən müxtəlif məsələlər barədə sədrə müraciət etmişdilər ki, çıxanda artıq üzləri gülür, sevinirdilər.



Çünki icbari tibbi sığortanın verdiyi imkanlardan istifadə etməklə yanaşı, həm də narahatedici məsələləri
birbaşa rəhbərliyə çatdıranda yüksək nəticəsi olur. Zaur Əliyev həqiqətən də dövlətin və xalqın qulluqçusu kimi xidmət göstərdiyini nümayiş etdirməkdədir. Onun qəbuluna düşmək də çətin deyil, hər bir vətəndaşa şərait yaradılır, ona müraciət edəndə problemin həll edilməməsi də mümkün deyil, operativ şəkildə yoluna qoyur. Bu mənada onu dövlətin və xalqın xidmətçisi adlandırmaq olar. Agentliyin rəhbəri özü də qarşısında o hədəfi qoyub ki, icbari tibbi sığorta ilə bağlı ən ideal səviyyədə nəticə əldə olunsun, xalq razı qalsın və prezident İlham Əliyevin qoyduğu tapşırıqlar tamamilə yerinə yetirilsin. Bu yolda Zaur Əliyevin irəlilədiyini görmək olar və onun vətəndaşlarla görüşləri də təsdiq edir ki, xalq qarşısında alnıaçıq, başıucadır...

Nicat Mahmudov