Uşaqların sağlam inkişafı üçün yuxu vacib amillərdən biridir. Yuxu zamanı bədə və beyin dincəlir, immun sistemi güclənir və yaddaş möhkəmlənir. Lakin bir çox valideynlər uşaqlarının yuxuya getməkdə çətinlik çəkdiyini, gecə tez-tez oyandığını və ya səhərlər yorğun olduğunu müşahidə edirlər. Bu tip yuxu problemləri uşaqların fiziki və psixoloji sağlamlığına mənfi təsir edə bilər.

Uşaqlarda yuxu problemləri müxtəlif formalarda özünü göstərə bilər: bəziləri uzun müddət yuxuya gedə bilmir, digərləri tez-tez oyanır və ya gecə kabuslar görür. Bəzi uşaqlar isə erkən yaşda yuxu zamanı qorxu kimi problemlər yaşayır. Bu hallar uşağın gündüz yorğun və əsəbi olmasına, diqqət və yaddaş problemlərinə, məktəbdə zəif nəticələr göstərməsinə səbəb ola bilər. Uzunmüddətli yuxu problemi isə immun sisteminin zəifləməsinə, böyümə hormonunun düzgün ifraz olunmamasına və hətta piylənmə riskinin artmasına gətirib çıxara bilər.

RUBRKA.AZ bildirir ki, modern.az-a danışan uşaq psixoloqu Zeynəb Əyyubovanın sözlərinə görə, uşaqlarda yuxu problemi bir çox amillərlə əlaqədar ola bilər:

1.Psixoloji amillər: Stress, narahatlıq, qorxular, ailədaxili münaqişələr və ya məktəb problemləri uşaqlarda yuxusuzluğa və ya yuxu keyfiyyətinin aşağı düşməsinə səbəb ola bilər. Xüsusilə gecə kabusları və ya qorxulu yuxular uşaqların rahat yuxu almasına mane ola bilər.

2.Fiziki amillər: Sağlamlıq problemləri, allergiyalar, həddindən artıq aktivlik və ya balanssız qidalanma da yuxu problemlərinə səbəb ola bilər. Məsələn, şəkərli və kofeinli qidalar uşağın yuxu ritmini poza bilər.

3.Ətraf mühit amilləri: Uşağın yatdığı mühitin rahat olmaması (səs-küy, çox işıq, yüksək temperatur) və ya telefon, planşet, televiziya həddindən artıq istifadə yuxu problemlərinə səbəb ola bilər”.

Psixoloq bildiirb ki, valideynlər daimi yuxu rejimi yaratmalıdır:
"Uşaqların müəyyən bir saatda yatması və eyni saatda oyanması vacibdir. Daimi rejim uşağın bədən saatını nizamlayır.Uşağın yatdığı otaq qaranlıq, sakit və rahat temperaturda olmalıdır. Yatmazdan ən azı bir saat əvvəl uşaqları ekranlardan uzaqlaşdırmaq lazımdır. Gündəlik fiziki fəaliyyət uşağın yorulmasını və daha yaxşı yatmasını təmin edə bilər. Yatmazdan əvvəl ağır və şəkərli qidalar verməkdən çəkinin. Əgər uşaq qorxular və ya narahatlıqlarla üzləşirsə, onu dinləyin və dəstək verin. Lazım gələrsə, mütəxəssisə müraciət edin”.

RUBRİKA.AZ

Facebook-da paylaş