Türkiyə Prezidenti Rəcəb Tayyib Ərdoğan Ədalət və İnkişaf Partiyasının (AKP) toplantısında ölkədə baş verən son siyasi hadisələrə münasibət bildirib.

Rubrika.Az bu barədə Türkiyə KİV-nə istinadən xəbər verir.

Türkiyə lideri vurğulayıb ki, siyasətdə rəqabət ola bilər, düşmənçilik yox.

"Siyasətdə küçə terroruna, zorakılığa, dağıntılara və xüsusən də təhqirə yer yoxdur və ola da bilməz. Siyasətdə qanuni yollar açıq olduğu halda, problemlər küçələrdə həll olunmamalıdır", - deyə R.T.Ərdoğan vurğulayıb.

Türkiyə prezidenti vurğulayıb ki, CHP (Cümhuriyyət Xalq Partiyası - red.) demokratik prinsiplərə əsaslanaraq siyasətlə məşğul olan bir partiya deyil, marjinal təşkilat kimi fəaliyyət göstərir.

"CHP sədri məsuliyyətli davranmaq, məhkəməyə öz işini görməyə kömək etmək əvəzinə, yüz milyardlarla lirəlik korrupsiya araşdırmasına mane olmağı üstün tutub. O, Maliyyə Cinayətlərini Araşdırma Qurumuna (MASAK) böhtan ataraq, dövlət məmurlarını ittiham edərək, İstanbulda məskunlaşan cinayət təşkilatlarının oğurladıqlarını ört-basdır etməyə çalışıb. Əslində, CHP rəhbərliyi də qışqırmaqla ört-basdır edə bilməyəcəyi böyük bir korrupsiyanın olduğunun fərqindədir. İctimai rəydə əksini tapan aysberqin yalnız görünən hissəsidir və onlar bunu çox gözəl bilirlər. CHP rəhbərliyi İstanbulun necə talan edildiyini, rüşvət xəttinin necə aparıldığını çox gözəl bilir. Onların təlaşının əsas səbəbi budur. Bu ucuz siyasətdən istifadə edirlər. Görünən kəndə bələdçiyə lazım deyil. Siz ədalətin bərqərar olmasına mane ola bilməzsiniz", - deyə Türkiyə prezidenti vurğulayıb.

Rubrika.Az

Facebook-da paylaş