Bu gün Beynəlxalq Yenidənqurma və İnkişaf Bankı (IBRD, Dünya Bankı qrupunun üzvü) Trans-Anadolu Təbii Qaz Boru Kəməri (TANAP) layihəsinin tikintisi üçün "Cənub Qaz Dəhlizi" QSC-yə 108,4 mln. ABŞ dolları məbləğində ilk maliyyə tranşı ayrılıb.

Bu vəsait Dünya Bankı (WB) Direktorlar Şurasının 2016-cı il 20 dekabr tarixli qərarına əsasən, IBRD tərəfindən kredit ayrılmasına dair imzalanmış müqaviləyə uyğun olaraq, TANAP layihəsinin tikintisi üçün Azərbaycan dövlətinin zəmanəti ilə "Cənub Qaz Dəhlizi" QSC-yə 30 il müddətinə 400 mln. dollar həcmində ayrılması nəzərdə tutulan kredit xəttinin bir hissəsidir.
Layihələrin icrası üçün kreditin verilməsi üzrə IBRD tərəfindən qəbul edilmiş qərar, habelə onun layihələr üzrə apardığı təhlil tədbirlərin nəticələri Dünya Bankı qrupuna daxil olan Çoxtərəfli İnvestisiyalar üzrə Zəmanət Agentliyi (MIGA) tərəfindən borclanmaya onun Direktorlar Şurası tərəfindən müsbət qərarın verilməsi, o cümlədən Asiya İnfrastruktur İnvestisiya Bankı (AIIB) tərəfindən də borclanmaya razılığın verilməsi üçün əsas olub.
Bununla yanaşı, AIIB-in Direktorlar Şurasının 2016-cı il 21 dekabr tarixli qərarına əsasən, kredit ayrılmasına dair imzalanmış müqaviləyə uyğun olaraq, TANAP layihəsinin tikintisi üçün Azərbaycan dövlətinin zəmanəti ilə "Cənub Qaz Dəhlizi" QSC-yə 30 il müddətinə 600 mln. dollar həcmində ayırdığı kredit xətti üzrə 162,6 mln. dollar məbləğində maliyyə tranşının da fevralın 27-də icrası nəzərdə tutulur.(Report)
Qeyd edək ki, ötən gün Bakıda "Cənub Qaz Dəhlizi" Məşvərət Şurası çərçivəsində nazirlərin IIItoplantısı keçirilib. Toplantı çərçivəsində dörd plenar sessiya keçirilib, Cənub Qaz Dəhlizi layihəsinin bütün seqmentləri üzrə görülmüş işlərə dair hesabatlar iştirakçıların diqqətinə çatdırılıb, habelə "Dəyişən qlobal enerji paradiqması fonunda Cənub Qaz Dəhlizi layihəsinin maliyyələşdirilməsi" sessiyası çərçivəsində bir sıra beynəlxalq maliyyə institutları ilə görüşlər keçirilib, müzakirələr aparılıb. Yekun olaraq, "Cənub Qaz Dəhlizi" Məşvərət Şurası çərçivəsində nazirlərin görüşünün iştirakçıları tərəfindən Birgə Bəyannamə imzalanıb.
Xatırladaq ki, "Cənub Qaz Dəhlizi" Məşvərət Şurasının ilk iclası 2015-ci il fevralın 12-də, ikinci iclası ötən il fevralın 29-da keçirilib.

Rubrika.az

Facebook-da paylaş