Leyla Şıxliskayanın rəhbərlik etdiyi klinikanın işçiləri növbəti dəfə hakim qarşısına çıxarılıb. Onlar külli miqdarda vergidən yayınmaqda ittiham edilirlər.

Rubrika.az musavat.com-a istinadla xəbər verir ki, təqsirləndirilən şəxslərin cinayət işi üzrə məhkəmə iclası Bakı Ağır Cinayətlər Məhkəməsində hakim Əfqan Hacıyevin sədrliyi ilə baş tutub.

Məhkəmə prosesində klinikanın baş mühasib Şəhla Abbasova ifadə verib.

Ş.Abbasova qeyd edib ki, klinikanın rəhbəri Leyla Şıxliniskaya ilə əvvəllər münasibətləri yaxşı olub: "Hər gün xəstələr qeydiyyat şöbəsinə yaxınlaşırdı və onlar da həkimlərə yönəldilirdi. Qeydiyyat şöbəsində olan pullar da mühasibə göndərilirdi. Klinikada olan xərclər barədə mənə məlumat verilirdi. Cinayət işi başlanmazdan əvvəl yoxlama oldu. Hələ Leyla xanım bizə mükafat da verdi ki, "yaxşı işləmisiz". Sonra bizim münasibətlərimiz pozuldu. Bir neçə dəfə işdən çıxmağımla bağlı ərizə yazdım, lakin Leyla Şıxliniskaya mənimlə barışdı. Sonda kadrlar şöbəsinə sənədlərimi verdim. Həmin gündən sonra klinikada yoxlama başladı. Mən çıxmaq istədiyimi deyəndə Leyla Şıxliniskaya mənə bildirdi ki, "səni tutduracam". Bir neçə həkim öz xoşu ilə oradan ayrılmayıb".

Növbəti məhkəmə iclası yanvarın 4-nə təyin edilib.

Qeyd edək ki, təqsirləndirilən şəxslər arasında klinikanın baş mühasibi olmuş Şəhla Abbasova, Polad Əliyev, Səkinə Qasımova, Aytən Hüseynova, Mədinə Hüseyeva, Yelena Abdullayevadır.

Onların hər biri barəsində polis nəzarətinə verilmə qətimkan tədbiri seçilib. Təqsirləndirilən şəxslər Leyla Şıxliniskayanı, klinikanın təsisçisi isə keçmiş işçilərini ittiham edir.

Klinikanın fəaliyyəti ilə əlaqədar açılan cinayət işi ilə bağlı məlum olan budur ki, adı çəkilən şəxslərin əməlləri barədə əvvəlcə Baş prokuror yanında Korrupsiyaya Qarşı Mübarizə İdarəsində cinayət işi başlanıb. İstintaq davam etdirilməsi üçün Vergilər Nazirliyinin Vergi Cinayətlərinin İbtidai Araşdırması Departamentinə göndərilmişdi.

Bu ittihamı da Leyla Şıxlinskaya rəhbərlik etdiyi klinikanın yeddi əməkdaşına qarşı irəli sürmüşdü.

Qeyd edək ki, təqsirləndirilən şəxslər Cinayət Məcəlləsinin 179.3.2-ci (mənimsəmə; külli miqdarda törədildikdə) və 213-cü (vergidən yayınma) maddələri ilə ittiham edilirlər.

Rubrika.Az

Facebook-da paylaş