A.Alxanov adına Sabir qəsəbə tam orta məktəbinin direktoru Gülnurə Babaşovaya qarşı oynanılan çirkin oyunlar üzə çıxdı

Son illər ölkəmizdə təhsil sahəsində aparılan əsaslı islahatlar artıq öz məntiqi nəticələrini göstərməkdədir. Etiraf etmək lazımdır ki, təhsil sistemi istər keyfiyyət, istərsə də kəmiyyət baxımından qabaqcıl dünya standartlarına yaxınlaşmaqdadır. Bu sahədə hələ də müəyyən problemlər müşahidə olunsa da görülən işləri danmaq ən azından insafsızlıq olardı.
Təbii ki, istənilən islahat proqramının kökündə insan amili dayanır. Ən yüksək islahat proqramını bacarıqsız komanda ilə iflasa uğratmaq olar.
Bu gün Azərbaycanın təhsil sistemində qazanılan uğurların kökündə də məhz peşəkar, savadlı, xalqına, dövlətinə sədaqətli pedaqoji kadrlar dayanır. Məhz onların vahid komanda şəklində verdikləri mücadilə nəticəsində Azərbaycan təhsili ildən-ilə daha yüksək zirvələri fəth edir.
Bu prosesdə Şamaxı rayonunun çoxminli pedaqoji ictimaiyyətinin böyük rolu vardır. Tarixən elm, mədəniyyət, təhsil beşiyi olan Şamaxı bu gün də proseslərin mərkəzində dayanan qüvvədir.
A.Alxanov adına Sabir qəsəbə tam orta məktəbi rayonda öz ənənələri ilə seçilən təhsil ocağıdır. Məktəb hər il qəbul imtahanlarında yüksək nəticələr göstərir. Eləcə də istər rayon, istərsə də respublika miqyaslı tədbirlərdə məktəbin yetirmələri fərqlənirlər. Qəsəbə sakinləri məktəbdə təhsil-tərbiyə prosesinin yüksək səviyyədə qurulduğunu bildirdilər. Məktəbin direktoru Gülnurə Babaşovanın gərgin əməyi nəticəsində təhsil ocağının nailiyyətləri ildən-ilə artır. Bu isə yüksək peşəkarlığın, pedaqoji ustalığın nətcəsidir.
Təəssüflər olsun ki, qazanılan uğurlara gölgə salmaq istəyən qüvvələr hər zaman olub. Yaxşını təqdir etmək, layiqli qiymətini vermək əvəzinə ona ləkə vurmaq, böhtan atmaq ancaq xəbis xislətin, bəd niyyətin təzahürü ola biər. Elə A.Alxanov adına Sabir qəsəbə tam orta məktəbinin direktoru Gülnurə Babaşovaya böhtan atanlar da belələridir.
Xatırladaq ki, bir sıra saytlarda G. Babaşovaya aid olduğu bildirilən səs yazısı yayılıb. Səs yazısında direktor guya müəllimlərdən işıq pulunu (?) və “aylığ”ı verməyi tələb edir. Məsələ ilə bağlı G. Babaşova ilə əlaqə saxlayaraq münasibət bildirməsini xahiş etdik. Direktor bildirdi ki, saytlarda yayılan məlumatlar tamamilə cəfəngiyyatdır və səs yazısı montaj olunub. Bu kiminsə qərəzli bir oyunudur. “Məktəbdə işıq pulu yığılması nə deməkdir? Səs yazısını montaj edərək məni və məktəbimizi ləkələmək istəyirlər. Mən əslində sinif rəhbərləri ilə uşaq birliyi rəhbərlərinə şagirdlərin dərsə davamiyyətini siyahı üzrə yoxlayacağımı bildirmişəm. Ancaq, mənim dediklərimi təhrif edərək böhtan atırlar” deyə G. Babaşova saytımıza açıqlamasında bildirdi.
Görünür son illər A.Alxanov adına Sabir qəsəbə tam orta məktəbinin qazandığı uğurlar kimlərisə narahat edir. Qazanılan hər uğur, əldə edilən hər nailiyyət onlar üçün çəkilməz bir yükdür. Deyəsən pedaqogikada öz yerini tapa bilməyən, müasir təhsilin tələblərinə cavab verməyənlər məktəbdə səsyazma studiyası açmaq qərarına gəliblər. Amma, görünür heç yazılası səsləri də olmadığından direktorun səsini yazıb şantaj etmək yolunu tutublar. Yaxşı müəllim ola bilməyəndən sizcə yaxşı səsyazan olarmı? Bu dəfə də alınmayıb, həm yazıb, həm də montajlasalar da işlərini peşəkarcasına görə bilməyiblər. Çünki, səs yazısının primitiv montajı elə ilk baxışdanca hiss edilir. Bu dəfə də haqqa nahaq, düzə əyri demək istəyənlərin arzusu gözündə qaldı. Çünki, haqq nazilsə də üzülmür.

P.S. Böyük Sabirin adını daşıyan bir qəsəbədə belə bir olayın yaşanması heç də ürəkaçan hal deyil. Sabir demişkən,

Adətimiz das idi də’va günü,
Tullarıdıq əldə sapan qıjhaqıj!
Hər kəsə dəysəydi edərdi haman
Bir neçə gün ahü fəgan, ufhauf!

Nicat Mahmudov
Rubrika.Az

Facebook-da paylaş