İşğalçı ölkədə maraqlı proseslər baş verir. Ermənistan parlamentinin deputatları Robert Köçəryanın azadlığa buraxılması üçün Baş Prokurorluğa və məhkəməyə müraciət edib. Respublikaçılar Partiyasının başlatdığı imzatoplama kampaniyasına 41 deputat, spiker Ara Babloyan, vitse-spikerlər Arpine Ovannisyan və Edurad Şarmazanov imza atıb.

Nikol Paşinyanın hökumət başına keçdikdən sonra Serj Sərkisyanın rəhbərlik etdiyi Respublikaçılar Partiyasında sanki “qurbağa gölünə daş atılmışdı”, səs-səmir eşidilmirdi. Çünki deputatlar öz talelərindən narahat idilər.

Hətta Köçəryanın həbsinə qarşı çıxan deputat Vardan Bostandjyanın mandatının ləğv olunması gündəmə gəlmişdi. İndi nə baş verdi ki, 41 deputat Köçəryanı müdafiəyə qalxdı?

Burada Rusiya XİN başçısı Sergey Lavrovun Ermənistanda baş verənlərə reaksiyasının xüsusi rol oynadığı şübhəsizdir. Rusiyanın baş diplomatı nə dedi? Sitat: “Ermənistandakı hadisələr ölkənin yeni rəhbərliyinin öz siyasi sələflərini təqib etməmək barədə bəyanatları ilə ziddiyyət təşkil edir, orada baş verənlər bizi narahat etməyə bilməz”.

Diplomatik dillə Ermənistan hökumətinə, xüsusilə də Nikol Paşinyana yönəlmiş hədədir. Yəni “özünü yığışdır, yoxsa səni də yola salarıq!”

Göründüyü kimi, Rusiya Paşinyanın davranışlarına heç 100 gün dözə bilmədi, nəhayət, barmaq silkələdi. Özü də bu, erməni əsilli rusiyalı nazirin barmağı oldu. Moskva İrəvanı elə ermənilərin hamisinin dili ilə təhdid etdi. Dünənə qədər Ermənistanı himayə edən, ermənilərin dar günündə onların yanında olan – məsələn, aprel döyüşlərindən sonra – Lavrov artıq Rusiyanın forpostunun mərkəzdənqaçma meyillərini sinirə bilmədi. Təbii ki, bu, Kremlin siyasətidir, Lavrov siyasi iradəyə uyğun davranıb.

Çoxları üçün maraqlı idi ki, Rusiya nə əcəb Ermənistan hökumətinə Qərb təhsilli və dünyagörüşlü kadrların toplanmasına göz yumur? Nəhayət, Rusiya gözlərini ağartdı. Əslində bu “gözağartma” əvvəlki günlərdə də olmuşdu. Məsələn, Azərbaycan ordusu Naxçıvan istiqamətindən torpaqlarının bir hissəsini düşməndən təmizləyəndə ermənilərin gözləntilərinə rəğmən Rusiya sakit davranmışdı, aprel döyüşlərində 4 gün susduğu kimi... Sonrakı günlərdə Rusiyanın Gümrüdəki hərbçiləri Panik kəndinə girib əhalini panikaya salan atış təlimi keçirmişdilər. Ondan sonra Ermənistanda antirusiya meylləri qabarmağa başladı. Hətta hökumət o dərəcədə uzağa getdi ki, Rusiyanın Ermənistandakı hərbi bazasının statusuna yenidən baxılacağını bəyan etdi. Düzdür, bir gün sonra bu bəyanat təkzib olundu, amma ox yaydan çıxmışdı.

Bizə elə gəlirdi ki, Rusiya bütün bunları sakitcə müşahidə edir. Ancaq demə, belə deyilmiş. Hər halda Lavrovun “Son günlər biz öz narahatlığımızı bir neçə dəfə Ermənistan rəhbərliyinin nəzərinə çatdırmışıq. Ümid edirik ki, vəziyyət konstruktiv məcrada davam edəcək” –sözləri bundan xəbər verir. Rusiya prezidenti Vladimir Putinlə Paşinyan arasında telefon danışığının mahiyyəti açıqlanmamışdı. Amma belə görünür ki, elə müzakirə mövzusu Ermənistan daxilində baş verənlər olub. Ardınca da İrəvanın Gürcüstandakı NATO hərbi təlimlərinə qatılması...

Rusiya Ermənistanı özündən kənara buraxmaq istəmir, xüsusilə də NATO həndəvərinə. Elə Gümrüdəki rus hərbçilər də Paşinyanın Brüssel səfərindən sonra küçələrə çıxmışdılar. Azərbaycanından fərqli olaraq, İrəvanın Rusiya qarşısında öhdəlikləri var və ona əməl etməlidir, Moskva bunu xatırladır Paşinyan hökumətinə.

Nəhayət, Ermənistan parlamentindəki deputatların az qala yarısının Köçəryanı müdafiə qalxması Rusiyadan verilən işarənin nəticəsidir. Lavrov öz bəyanatı ilə Ermənistandakı ruspərəstlərə, həmçinin anti-paşinyançılara “irəli” əmri vermiş oldu. Özü də erməni deputatlar təkcə Köçəryanı xilas etmək istəmirlər. Onlar həm də Serj Sərkisyanı, onun rəhbərlik etdiyi partiyanı, həbsə atılmış oliqarxları, generalları, Qarabağ klanını xilas etməyə çalışır, revanşa nail olmaq istəyirlər.

Görünür bu səbəbdən Nikol Paşinyan 17 avqustda ümumxalq mitinqi elan edib, özünün 100 günlüyü münasibətilə. Paşinyan bu yolla “xalqın böyük dəstəyi ilə əhatə olunduğu” mesajını vermək istəyir Rusiyaya.

Amma Kreml çətin ki, Paşinyanı bağışlasın. Erməni hökuməti hətta “Rus NATO”-sunun baş katibi Yuri Xaçaturovu da həbs etməyə cəsarət etdi. Bunun bədəli ağır olacaq. Elə Rusiyanın Xaçaturovu başqa bir şəxslə əvəzləmək təklifinə məhəl qoymaması da bunu təsdiqləyir. Kəsəsi, Moskva düyməni basdı-Lavrovun əli və dili ilə...İstefası tələb olunan Qaregin də Moskvaya əbəs yerə getməmişdi... Musavat.com


Rubrika.az

Facebook-da paylaş