Hava gəmilərində istifadə edilən külli miqdarda cihazı ölkədən aparmağa çalışarkən saxlanılan şəxslər hakim qarşısına çıxarılıb.

Rubrika.Az Musavat.com -a istinaden xəbər verir ki, Bakı Ağır Cinayətlər Məhkəməsində Qarayev Ələddin Fəyyaz oğlu, Əhmədov Fərman Allahyar oğlu, Mehdiyeva Südabə Gülməmməd qızı və Rusiya vətəndaşı Axundov İdris Nəsib oğlunun cinayət işi üzrə məhkəmə iclası keçirilib.

Məhkəmə iclasında təqsirləndirilən şəxslərdən Südabə Mehdiyeva ifadə verib.

O, ittihamla özünü təqsirli bilmədiyini deyib və bunları qeyd edib:

"Mən yalnız Fərman Əhmədovu tanıyıram. Zəng edib dedi ki, soyuducu, televizor və paltaryuyan maşınların ehtiyat hissələri var. Məndən xahiş elədi ki, onları gömrükdən keçirməyi xahiş elədi. Mən də razılaşdım.

Malı görməyə apardım və aparatlardan keçirdim. Yoxlama olduğu üçün neytral ərazidə saxlanıldı. Mənə dedilər ki, nə vaxt icazə olsa gəlib keçirərsən. Mən də gedib iki gün sonra qayıtdım. Çatanda mənə gömrükdən zəng elədilər. Dedilər ki, qutularda olan maldan xəbərin var? Mən də əlbəttə xəbərimin olduğunu dedim. Ora çatanda dedilər ki, vertolyotun ehtiyat hissələridir. Mallar 12 qutu idi".

Gömrük bəyannaməsinin verilməməsi ilə bağlı suala cavab verən Südabə Mehdiyeva qeyd edib ki, bu işdə günahsızdır: "Məndən bəyannamə istəməyiblər. Şifahi soruşdular, mən də dedim. Malı ora qoyub getdim. Neytralda qaldı. Amma sonradan yenə bizim görməyə qaytarıb yoxlayıblar. Mənim yanımda açmayıblar".

Təqsirləndirilən şəxs bildirib ki, daha əvvəl də Fərmanın istəyi ilə elektrik qızdırıcılarını gömrükdən keçirib və heç vaxt da problemlə qarşılaşmayıb: "Mənə 300 manat verdi. Malı gömrükdən keçirib Mahaçqalaya göndərəcəkdim".

Dövlət ittihamçısı bildirib ki, qeyd edilən malların gömrük bəyannaməsi olmadan gömrükdən keçirildiyinə 3 işçiyə töhmət verilib.

Südabə Mehdiyevanın dediklərindən məlum olub ki, qutularda olan malın yenidən geri qaytarılmasını və yoxlanılmasını gömrükdə olan hərbçilər tələb edib.

Daha sonra digər təqsirləndirilən Fərman Əhmədov ifadə verib. O deyib ki, saxlanılan mallar Ələddin Qarayevin olub:

"Ələddin Qarayev zəng elədi ki, belə bir mal var və keçirmək lazımdır. Mən də Südabə xanıma zəng edib dedim. Südabə xanım da keçirəcəyini dedi. Mən malı görməmişəm. Mallar gedəndən sonra mənə zəng gəldi və polisə çağırıldım".

Növbəti prosesdə digər iki təqsirləndirilən şəxs ifadə verəcək.

Məhkəmə iclası oktyabrın 3-də davam etdiriləcək.

Təqsirləndirilənlərdən Südabə Mehdiyeva və Fərman Əhmədov barəsində həbs qətimkan tədbiri seçilməyib. Onlar hazırda ev dustaqlığındadır.

Xatırladaq ki, Dövlət Gömrük Komitəsi (DGK) Xaçmaz Gömrük İdarəsində hava gəmilərində istifadə edilən külli miqdarda cihazın ölkə ərazisindən qanunsuz yolla aparılması cəhdinin qarşısının alınması ilə bağlı məlumat yayıb.

Məlumatda bildirilir ki, həmin cihazlar cinayətkar qrupun üzvü tərəfindən qaçaqmalçılıq yolu ilə Azərbaycandan Rusiyaya aparılarkən "Samur" gömrük postunda aşkar edilib. Fakt əsasında Komitənin İstintaq İdarəsində Cinayət Məcəlləsinin 206.3.2-ci maddəsi ilə cinayət işinin istintaqı aparılıb. İstintaq nəticəsində cinayətkar qrupun 4 üzvü, Azərbaycan vətəndaşları - Qarayev Ələddin Fəyyaz oğlu, Əhmədov Fərman Allahyar oğlu, Mehdiyeva Südabə Gülməmməd qızı və Rusiya vətəndaşı Axundov İdris Nəsib oğlu təqsirləndirilən şəxs qismində cəlb edilərək həmin maddə ilə onlara ittiham elan edilib.

Əldə edilən razılığa və ümumi cinayətkar niyyətə uyğun olaraq Ə.Qarayev gömrük sərhədindən qaçaqmalçılıq yolu ilə keçirilərək qonşu ölkəyə göndərmək məqsədilə ümumilikdə 68 adda cihazı yaşadığı Ağcabədi rayonunun Qaradolaq kəndindən Bakı şəhərinə, F.Əhmədova göndərib. O, isə həmin malları Bakının Qaradağ rayonundakı "Sədərək" bazarında S.Mehdiyevaya təhvil verib. Həhayət, həmin mallar sonuncu şəxs tərəfindən ölkənin gömrük sərhədindən bəyan etmədən qaçaqmalçılıq yolu ilə keçirilərkən gömrük əməkdaşları tərəfindən aşkar edilərək götürülüb.


Rubrika.Az

Facebook-da paylaş