Artıq bir müddətdir ki, ölkəmizdə körpələrini ana südü ilə qidalandıran anaların sayı getdikcə azalmağa başlayıb. Bu məsələ dəfələrlə müzakirəyə çıxarılsa da, yenə də gənc anaların əksəriyyəti öz körpələrinə ana südü verməkdən imtina edir. Təbii ki, bunun da öz səbəbləri olur.

Bəzi analar öz bədən quruluşlarını formada saxlamaq üçün, digərləri isə işlədiklərini əsas gətirərək süni qidaya üstünlük verirlər.
Pediatrlar isə uşaqların iki yaşa qədər ana südü ilə qidalanmasını dəfələrlə qeyd edirlər. Ümumdünya Səhiyyə Təşkilatı da bildirib ki, 6 aya qədər körpələrə heç bir əlavə qida, maye verilməməlidir. Çünki ana südündə bütün elementlər var. Körpə 6 aya çatdıqda isə artıq əlavə qida vermək olar.

Beləliklə araşdırmalar da onu göstərir ki, hazırda ölkəmizdə yeni doğulan körpələrin təxminən 50 faizi süni qida ilə qidalanır. Ekspertlər qeyd edirdi ki, bunun əsas səbəblərindən biri də süni qidaların reklamı ilə bağlıdır. Bu səbəbdən 2017-ci ilin yanvarında ölkə prezidentinin sərəncamı ilə süni qidaların hamilə qadınlar, analar arasında, tibb müəssisələrində reklamı qadağan olundu. Lakin bu da təsiri yetərincə olmadı.

Məlumat üçün qeyd edək ki, süni qidalar əsasən inək südündən hazırlanır. Ana südü etalon götürülərək təbii inək südü fermentləşdirilir və tərkibindəki komponentlər balanslaşdırılır. Südün tərkibindəki qida komponentləri balanslaşdırıldığı üçün körpələr həmin qidanı rahatlıqla həzm edə bilir. Mövcud qanunvericiliyə görə, körpə qidaları 20 dərəcədən aşağı temperaturda saxlanılmalıdır. Bəzən isə buna əməl etmədikdə körpələrdə mədə-bağırsaq xəstəliklərinin yaranmasına səbəb olur.

Süni qidaların qiymətinə gəldikdə isə məlum olduğu kimi ölkəmizdə bu cür qidalar çox baha qiymətə satılır. Belə ki, müqayisə etdikdə digər qonşu ölkələrdən 25 faiz bahadır. Qiymətlər təxminən 10-50 manat civarında dəyişir. Bu isə bir il ərzində 1000-3500 manat deməkdir.
Həkim Vaqif Qarayev mövzu ilə bağlı musavat.com-a danışıb:

“Körpə üçün yeganə təbii qida ananın südüdür. Bu təbiətin də, təbabətin də qanunudur. Məlum olduğu kimi ana südü körpəni xəstəliklərdən qoruyur, immuniteti gücləndirir, müqaviməti artırır, onun fiziki və əqli inkişafına köməklik edir. Əgər təbiətdə heyvanlar, canlılar öz balalarını südü ilə qidalandırırsa, deməli insanlar da körpələrinə mütləq şəkildə ana südü verməlidir".

Bəzən analar əsas gətirir ki, ilk doğuş zamanı südü az olub. Bu təbiidir, əksər hallarda ilk doğuşdan sonra ananın südü az ola bilər. Çünki orqanizm buna tam hazır olmur. Lakin südün az olması o demək deyil ki, süni qidaya keçilməlidir. Bu halda ananı maarifləndirmək lazımdır ki, körpəni əmizdirdikcə süd daha da artmağa başlayır, öz qaydasına düşür. Əgər hansısa tibbi səbəbdən ananın südü tamamilə yoxdursa, bu halda süni qidaya keçmək olar. Lakin bəzən şahidi oluruq ki, hansısa doğum evində ananın südü az olanda dərhal ona süni qida məsləhət görülür ki, bu da doğru deyil. Bunun da qarşısını almağın bir yolu var, süni qida şirkətlərini doğum evlərinə girişini qadağan etmək. Lakin bu o qədər də asan deyil.

Bir daha qeyd edirəm ki, ana südünün tərkibindəki bioloji aktiv maddələr uşaqların gələcəyi üçün həddindən vacibdir, mütləqdir. Bunun üçün ciddi əsas olmadığı halda bütün analar körpələrinə ana südü verməlidir”.


Rubrika.Az

Facebook-da paylaş