Bu gün Bakı Ağır Cinayətlər Məhkəməsində mənimsəmədə təqsirləndirilən “Azərbaycan Beynəlxalq Bankı” ASC-nin İdarə Heyətinin sabiq sədri Cahangir Hacıyev, onun bacanağı İsmayıl Hidayət-zadə, sabiq deputat Dünyamin Xəlilov, Camal Həsənov, Sərxan Rəsulov, Natiq İmanov, Samir Hacıyev, Təbriz Əbdülhəmidov, Mahir Qafarov, Sadıx Murtuzayev, Tərlan Məhərrəmov, Fəxrəddin Heybətov, Ramin Əhmədov, Fariz Muradov, Səlahəddin Qədirov, Erxan Cavad, Arif Ramazanov, Navai Şirinov, Svetlana Əsədullayeva, Arif Mədətov, Adil Mikayılov, Ramis Kərimovun cinayət işi üzrə məhkəmə iclası davam etdirilib.

Rubrika.Az-ın "Report"a istinadla xəbərinə görə, hakim Faiq Qəniyevin sədrliyi ilə keçirilən prosesdə sənədlərin tədqiqi mərhələsi davam etdirilib.

Hakim C.Hacıyevin vəkillərinin ötən prosesdə beynəlxalq orbitraj məhkəmlərinin qərarlarının alınması, xarici layihələrlə bağlı sənədlərin əldə olunması və s. məsələlərlə bağlı qaldırdıqları vəsayətlərin təmin edilməməsi barədə qərarı elan edib.

C.Hacıyevin vəkili Fəxrəddin Mehdiyev Beynəlxalq Bankın Müşahidə Şurasının üzvü Vəli Kərimovun əlavə şahid qismində dindirilməsi barədə vəsatət qaldırıb.

Vəkil Aqil Layıcov isə bildirib ki, C.Hacıyevə qanunsuz veksellərlə bağlı ittiham verilib. O vurğulayıb ki, həmin veksellər Qiymətli Kağızlar üzrə Dövlət Komitəsində qeydiyyatdan keçib. Vəkil bildirib ki, həmin veksellərin bir çoxunun müddəti başa çatmayıb. Bu səbəbdən Qiymətli Kağızlar üzrə Dövlət Komitəsinin varisi olan Maliyyə Bazarlarına Nəzarət Palatasından həmin sənədlərlə bağlı məlumat alınmasını istəyib.

Prokuror vəsatətə münasibət bildirməsi üçün məhkəmədən vaxt istəyib.

Növbəti proses iyulun 15-də davam etdiriləcək.

Qeyd edək ki, rəsmi məlumata əsasən, aparılmış istintaqla 2001-2015-ci illərdə “Azərbaycan Beynəlxalq Bankı” ASC-nin İdarə Heyətinin sədri vəzifəsində işləmiş C.Hacıyevin göstərişləri əsasında ayrı-ayrı ölkələrdə yaradılmış hüquqi şəxslərlə real dəyəri olmayan sadə veksellərin alqı-satqısına dair 3,4 milyard ABŞ dolları və 987 milyon avro məbləğində (müvafiq dövrün məzənnəsi ilə 3,8 milyard manat) müqavilələr bağlanılaraq qanunsuz veksel əməliyyatları aparılmasına dair əsaslı şübhələr müəyyən edilib.

Aparılmış istintaqla C.Hacıyevin tanışı Dünyamin Xəlilov, digər 20 nəfər və qeyriləri ilə birlikdə qanunsuz maliyyə əməliyyatları aparılan və real dəyəri olmayan veksellərin alınması, eləcə də təminatı olmayan kreditlərin verilməsi yolu ilə ümumilikdə 4,7 milyard manat məbləğində pul vəsaitinin mənimsəmə və digər cinayətlər yolu ilə 2,5 milyard manat hissəsini ələ keçirməklə cinayət yolu ilə əldə edilmiş həmin vəsaitin 2 milyard manatını leqallaşdırmasında, digər 2,2 milyard manat məbləğində pul vəsaitinin isə müxtəlif əməliyyatlara yönəltməklə “Azərbaycan Beynəlxalq Bankı” ASC-yə ziyan vurmasına əsaslı şübhələr müəyyən edilib.

Xatırladaq ki, C.Hacıyev Bakı Ağır Cinayətlər Məhkəməsinin hökmü ilə 15 il, D.Xəlilov 13 il və İ.Hidayət-zadə isə 7 il müddətinə azadlıqdan məhrum edilib. Bakı Aplyasiya Məhkəməsinin qərarı ilə D.Xəlilovun cəzası 13 ildən 12 il 9 aya, Ali Məhkəmə isə İ.Hidayət-zadənin cəzasını 5 ilə endirib.

Rubrika.Az

Facebook-da paylaş