​
Rauf Arifoğlu illərdir ki, bu xalqa SÖZ verir. İndi SƏS vermək növbəsi əlahəzrət xalqındır!

Siyasi arenada son illərin ən isti fevralına qalan az zaman kəsiyində Azərbaycan seçicisi bir daha millətin ali məclisində görmək istədiyi namizədləri saf-çürük edir. Rəqabət ən üst səviyyədədir-ölkədə başladılan islahatlar bir çoxlarının illərlə buz tutan arzularının da donunu açıb. Vəkil olmaq istəyənlər çoxdur, amma millətin vəkil etmək istədikləri o qədər də çox deyil.

Bir çoxlarının namizədliyini hətta gülüş hədəfinə çevirən möhtərəm seçici içərisindən çıxan, ruhundan qanadlananları görəndə bir az da ümidlənir. Ali tribunadan onun sözünü deyənləri, səsini eşitdirənləri görmək əlahəzrət xalqın haqqıdır. Bu haqqı reallığa çevirmək istəyənlərdən biri-illərdir ki, söz adamı olaraq mücadilə verən,dar məqamda yaxasını kənara çəkməyən, ən ağır şərtlər altında ölkənin aparıcı medya qurumunun varlığını qoruyub saxlayan Rauf Arifoğlunun təkcə namizədliyi bu seçkilərin maraqlı mübarizə şəraitində keçməsi üçün kifayətdir. O mübarizə aparmağı yaxşı bacarır, zatən ömrünün çoxunu bu yolda keçirib. Sözün ucuzlaşdığı bir zamanda sözün dəyərini bilən, mübaliğəsiz ölkə gündəmini formalaşdıran bir media qrupunu zor şərtlər altında qoruyub saxlayan, millətə mandatsız vəkillik edən adam kimin adamdır Rauf Arifoğlu.

“Yeni Müsavat” həm də bu xalqın azadlıq tarixidir, müstəqillik yolunun səlnaməsidir. Həm də Rauf Arifoğlunun bir sənət əsəri, ömür kitabı olan “Yeni Müsavat” sosial şəbəkələrin bütün sahələri zəbt etdiyi bir dövrdə öz oxucu kütləsini qoruyub saxlamağı bacaran, yüz minlərin inandığı tribuna kimi etimadını saxlayan alınmaz söz qalasıdır. Rauf bəy illədir ki, tənqidlərə,bəzən amansız təhqirlərə, iftiralara sinə gərərək mücadilə verir. Bu aşırı poetik səslənsə də həqiqətən milli mücadilədir. Onun imzası, sözü bu xalqın imzasına çevrilib. Məmurların bağlı qapılarında sınan minlərlə ümüdlər onun çabasıyla reallığa çevrilib. Rauf Arifoğlu rəhbərlik etdiyi medya qurumunu millətin tribunası etməyi bacarıb.

Seçkilər hər bir xalqın iradəsini ifadə etmək üçün həyata keçirilən siyasi kompaniyadır. Bu mənada Azərbaycan xalqı böyük bir sınağın astanasındadır. Xalq onu seçənləri seçməlidir ki, sözünü deyən tapılsın.

Rauf Arifoğlu illərdir ki, bu xalqa SÖZ verir. İndi SƏS vermək növbəsi əlahəzrət xalqındır!

H.Məmmədova
Rublika.Az

Facebook-da paylaş