Koronavirus epidemiyası dünyanı cənginə almağa davam edir. Bir çox ölkələr artıq karantin rejiminə keçib. Azərbaycan da həmin ölkələr sırasındadır. Koronavirus pandemiyası ilə mübarizədə əhalinin sağlamlığının qorunması məqsədi ilə 29 mart saat 00:00-dan etibarən ölkə ərazisində xüsusi karantin rejimi elan edilib.

Xüsusi karantin rejimi dövründə xüsusi təyinatlı, o cümlədən təcili tibbi yardım, qəza-bərpa, xilasedici, kənd təsərrüfatı, sosial xidmət məqsədli, habelə yük daşıyan avtomobillərin hərəkəti istisna olmaqla, rayonlararası və şəhərlərarası nəqliyyat hərəkəti tam dayandırılıb.

Bakı metrosunun iş vaxtı dəyişdirilib. Xüsusi karantin rejimi dövründə supermarketlər, ərzaq mağazaları və apteklər istisna olmaqla, bütün ticarət obyektlərində, müştərilərə yerində xidmət dayandırılıb, çatdırma və onlayn satışlara məhdudiyyətsiz icazə verilib.

Bütün bulvar, park və istirahət məkanlarına insanların sıxlığını tənzimləmək məqsədilə giriş məhdudlaşdırılıb.

Xüsusi karantin rejimi hər kəs kimi müğənnilərin də həyatına təsirsiz ötüşməyib. Bəs toy və tədbirləri təxirə salınan azərbaycanlı məşhurlar karantin dövrünü necə keçirir? Toy-biznesinin dayanması onların həyatına necə təsir edib?

Musavat.com sənətçilər arasında sorğu keçirib.

Müğənni Nura Suri evdən çıxmadığını bildirib: “Fevral ayı iş az oldu. Bütün müğənnilər mart-aprel ayını gözləyirdik ki, tədbirlərimiz, toylarımız olacaq. Lakin koronavirusa görə təxirə salındı. Aprelin sonu Orucluq ayı başlayacaq. Karantin müddəti nə zamana kimi çəkəcək bilmirik. Şükür Allaha ki, mənim kreditim yoxdur. Amma krediti olan müğənnilər üçün çox çətindir. Mən bir neçə gün öncə açıqlamışdım ki, karantindən sonra toy, reklam qiymətlərinə 50 faiz endirim edəcəm. Çünki toy etmək, reklam çəkmək insanlar üçün çətin olacaq. Bütün bunları nəzərə alıb, endirim haqqında düşündüm.

Hazırda isə koronavirusun yox olmasını gözləməkdən başqa çarəmiz yoxdur. Çoxları kimi mən də evdən çıxmıram, heç kimlə görüşmürəm. Evdə tez-tez havanı dəyişirəm, kalorisi az, piylənmə yaratmayan qidalar yeyirəm. Gigiyenik qaydalara əməl edirəm”.

Müğənni Günay İbrahimli də karantin günlərini evdə keçirənlərdəndir:

“Karantin rejimidir. Mən də karantin müddətində evdən çıxmamışam. Evdə günlərimi əyləncəli keçirməyə çalışıram. İnsanlardan evdə qalmasını istəyirəm. Əsas sağlamlıqdır”.

Müğənni Natavan Həbibi də bildirib ki, yeni layihələr üzərində çalışsa da, işləri yarımçıq qalıb:

“Bütün günü evdəyəm. Bəzən isə salona gedirəm. Çoxlu yeni layihəm var, amma yarımçıq qalıb. Mən müğənni Niyam Salamini aktyor kimi kəşf etdim. Onun aktyorluq qabiliyyətini də sizə göstərəcəyəm.Yeni mahnılar seçmişəm, hamısını oxuyacaqdım. Albom hazırlıqlarına başlamalı idik. Amma koronavirusa görə yarımçıq qaldı”.

Müğənni Aysel Əlizadə isə evdə qalmaqdan bezdiyini dilə gətirib:

“Bütün günü evdəyəm. Evdə darıxıram. Karantin bizə od qoydu. Heç kim heç kimi görmür deyə söz yoxdur. Danışmağa söz tapmırıq. Amma əsas can sağlığıdır. Ona görə evdə qalmalıyıq".

Rubrika.Az

Facebook-da paylaş